Read Ntcham 2 Rois 9 Bible Online

2 Rois 9 - Ntcham bible

2 Rois 9

¹Dalbee ní Unimbɔti bɔnaatiliu Eeliisee yíiń bibɔnaatiliibi kitil kansikin unaacimpɔɔn ubɔ ní ki bí-u yii: «Bɔ́ntí a-ba kí yòon̄ circir kpam kpalba kí nīn cá Ramooti tiŋkin Galaadi tiŋkpaaŋkin.

²A yaa bàn̄ niinee, á pɔ́ɔǹ a-ba kí ká Joosafaati jipɔɔn Jeewuu, Nimisii naantiu. Á yíiń-u ní kàkatī ni-ba kí wàatī u-nabiyaamu kí kɔ́ kudii kubɔn.

³Kudiin niinee ní á yòon̄ ŋkpam kpalbee kí bàtī kí sìtī u-yil pu kí tùkù-u yii: <Ti-Dindaan nín sòon̄ puee sɔ̀. Nì ŋkpam min m bātì ki sītì a-yil pu nee, m kāaǹ-si Isirayeel beelin ubɔti dee!> A yaa ŋá míǹ ki dóòyee, ní á pìitī kudii kí sāǹní kí taa ti tàan̄.»

⁴Eeliisee lī míǹ ki dóòyee ní kinaacimpɔmbikee nín cá Ramooti tiŋkin Galaadi tiŋkpaaŋkin.

⁵Ŋyunti ŋun u bàn̄ee, Isirayeel janjakpilib bíi ŋáań dikpafil. Ní unaacimpɔɔnee bí yii: «Ukpil, m cáá tiba ki làá tùkù-si!» Ní Jeewuu bí yii: «Ti-kansikin ŋma ní a là kí sòoǹ nì ní?» Ní kinaacimpɔmbikee kíí yii: «Ukpil, sii ní an sá!»

⁶Niinee Jeewuu yíkì ki nín kóò dicindin, ní kinaacimpɔmbikee bātì ŋkpam ki sītì u-yil pu ki lī yii: «Ti-Dindaan, Isirayeel Nimbɔtiu nín sòon̄ puee sèé: <Nì ŋkpam min m bātì ki sītì a-yil pu nee, m dū-si ki kāaǹ man ni-Dindaan nibul Isirayeel pu ubɔti.

⁷Sii di làá kpɔ̀ a-kpiliu Akaab naantiibi. A yaa ŋá mimmee, a tɔ̀n̄ m-tɔntɔnliibi bibɔnaatiliibi nì bin kɔkɔ Jeesabeel kūūyee pɔntooŋyi dee.

⁸Akaab dicaŋkun yab kɔkɔ máaǹ kí kpú ní. M làá nàan̄ u-dicaŋkun bin kɔkɔ bí ki sá bininjabee Isirayeel tiŋkin. Maa làá kíń uyumbuɔɔɔ, kaa làá kíń un tɔ́ u-bee mun.

⁹M làá ŋá u-dicaŋku kii m nín ŋá Neebaati jipɔɔn Jeerooboowaam dicaŋku nì Ayiiya jipɔɔn Bayeesa puee ní[15].

¹⁰An yaa kíǹ Jeesabeel úŋ̀wuee, baa làá síb́-u, di sá yii iboo di làá ŋmɔ́-u tisatin[16].>» U lī mimmee ní ki pīitì kudii ki sáǹ ki kátì.

¹¹Jeewuu nyánnée ní ki nín gítí ubɔti janjakpilib bin kíǹee cee ní bíǹ bālifì-u yii: «An mɔ̄ deeee? Uwaati gbanti nyàab̀ ba ní a-cee ní?» Ní u kíí-bi yii: «Nimbi ni-ba, ni pée nyí bibɔnaatiliibi nee nì tin bi sòoǹee.»

¹²Ní bin kíǹee bí-u yii: «A mɔ́ntí, māafì-ti tin jítèe!» Ní u kíí-bi yii: «Too, u bí-mi yii: <Ti-Dindaan nín sòon̄ puee sɔ̀. Nì ŋkpam min m bātì ki sītì a-yil pu nee, m kāaǹ-si ubɔti Isirayeel beelin dee.>»

¹³Bijanjakpilibee gbìl̄ mimmee ní báà ŋma ŋá malaa ki kpátì u-wanti tin u pēēyee ki bíl̀ dikɔl pu ki dū Jeewuu ki kāaǹ. Bi nìn búń ŋyin ní bi-kɔkɔ kíĺ ki kíǹ ki tátí yii: «Ubɔti Jeewuu ń ká mmaŋfafɔkɔn!»

¹⁴Joosafaati jipɔɔn Jeewuu, Nimisii naantiu bɔ́ntì kí kpɔ̀ Jooram. Ŋyunti gbantee úǹ nì Isirayeel yab kɔkɔ bí Ramooti tiŋki kin bí Galaadi tiŋkpaaŋkinee ki jáà nì Siirii bɔtiu Asayeel ú taa fōō-kì.

¹⁵Ama bi nín bíi jáàyee ubɔti Jooram nìn fōō tiweendi. An pu ní u nìn fātìi gítìń Jisirayeel kí cáaǹ u-ba. Jeewuu nìn tùkū bijanjakpilibee yii: «Nimbi di sá bin bí m-jandi púee, an puee ubɔ ń taa nyā kitiŋ nee poon kí cù Jisirayeel kí dū tin jítì dooyee kí māafì.»

¹⁶Niinee Jeewuu jɔ́m̀ u-janjatɔrɔkuu pu ki nín cá Jisirayeel. Jooram nìn dɔ̄ u-dooŋu pu ní Juuda bɔtiu Akasiyasi cūtì kí màntì u-pu.

¹⁷Un nìn sí sintil Jisirayeel tiŋkinee nín ká Jeewuu nì dijanjakitil din nìn táá-uee dòońee ní u bí ubɔti yii: «M wāĺ dijanjakitil diba dòoń.» Ní ubɔti Jooram bí yii: «Nyàab̀ utanjakal ubɔ kí tɔ̄ ú cùú tūŋkì-bi kí bàlifì-bi yii bi dòoń nì ŋgbansɔŋfaaa?»

¹⁸Ní utanjakalee nín cá kí tūŋkì-bi. U bàn̄-bee ní ki bí yii: «Ubɔti bí yii ḿ bàlifì-ni yii an mɔ̄ deeee?» Ní Jeewuu kíí yii: «Ŋgbansɔŋfi bɔti ká-si la? Páań m-boon!» Ní un sí sintilee bí yii: «Ntuunee bàn̄ bi-cee, ama ŋuaa ti gítìń.»

¹⁹Ní ubɔti gíti lēē utanjakal uliliiti ki tú ní u mun bàn̄ bi-cee ki bí yii: «Ubɔti bí yii ḿ bàlifì-ni yii an mɔ̄ deeee?» Ní Jeewuu kíí yii: «Ŋgbansɔŋfi bɔti ká-si la? Páań m-boon!»

²⁰Ní un sí sintilee bí yii: «Ntuun nliliitee bàn̄ bi-cee, ama ŋuaa ti gítìń. Bi nín jàkāń puee m béè un ní an sée. An sá Nimisii naantiu Jeewuu, di sá yii u jàkāń kii uwaatee ní.»

²¹Ní ubɔti Jooram yāntì bi kpàl̄ u-taamuu ní u jɔ́m̀ ki kāl̀, ní Juuda bɔtiu Akasiyasi mun jɔ́m̀ ki kāl̀ u-taamuu pu ní bi-liitil nín túŋkí Jeewuu, ní ki tin dūu tú-u ujiseeraayeelja Nabooti kpaatantin.

²²Ŋyunti ŋun ní Jooram nyáń Jeewuu puee ní u bālifì-u yii: «An mɔ̄ deeee, Jeewuu?» Ní Jeewuu kíí-u yii: «Mana ní a ŋūǹ kí bàlifì-mi míǹ? Sii a-ba nyí yii a-na Jeesabeel gbíntìi tòotī awaa ki ŋáań kukpaŋkpantiiu tuuŋŋi.»

²³Niinee Jooram fātìi lábitì u-ba ki bíi sáń, ní ki bí Akasiyasi yii: «Á nīn nyí nì a-ba Akasiyasi, bi nyáń ti-boon ní!»

²⁴Niinee Jeewuu lēē mpiin ki páaǹ u-tɔbu pu ki dáaĺ ní an cūtìi cúú Jooram gbigbipati kansikin ki kɔ́ ki pūutì diŋuul ní ki tin nyáń ki lítì. Úǹ u-ba nìn nyáń u-tɔrɔkuu poon ki lítì.

²⁵Ní Jeewuu bí un bí u-cee ki tútúǹ-u bi yíì-u yii Bidikaaree yii: «Nyāntí-u tɔrɔkun kí dū-u kí tɔ̄ ujiseeraayeelja Nabooti kpaatantin. A yaa téetí ŋyunti ŋun ní man nì sii nìn kā tɔrɔkun dicilpu ki cēentí u-baa Akaabee, ti-Dindaan nìn sòon̄ tibɔti tiba ki tɔ́ u-pu[17].

²⁶Ti-Dindaan nìn bí-u yii: <Fool a nín fu kūū Nabooti nì u-jipɔmbee, man a-Dindaan, m fu ká kɔkɔ. Bukpaa bun poon a fu kūū-bee, bukpaa gbanti bubaantiiu poon ní m làá dáaĺ a-tafal, man ni-Dindaan di sòon̄ míǹ[18]!> An puee nyāntí Jooram kí dū-u kí tɔ̄ bukpaayee poon, kii ti-Dindaan nín nìn sòon̄ puee.»

²⁷Juuda bɔtiu Akasiyasi nín ká mimmee, ní u cúú Beeti-Gan saŋŋu ki sáń ki cá, ama ní Jeewuu kùl̄ ki páaǹ u-boon. Jeewuu nìn tīī u-naacimbi mara yii bí kpɔ̀ u mun! Ŋyunti ŋun u kā u-tɔrɔkuun ki bíi dàb̀ Guur gbantaŋki kin kaa dátì nì Ibileeyamee ní bi yá u mun mpiin. Ama u nìn pɔ́ɔǹ ki sáǹ ki bàn̄ Meegiidoo tiŋkin ní ki kpíì niin.

²⁸U-tɔntɔnliibi nìn dū-u ki ŋá u-tɔrɔkuun ní ki cáá-u ki cūnnì Jeerusaleem, ní ki tin síb́-u u-baabi kaakulin, Daafiidi Tiŋkin.

²⁹Akaab jipɔɔn Jooram nín jíń dibeel abin saalaa nì diba poonee ní Akasiyasi kpántì ubɔti Juuda tiŋkin.

³⁰Jeewuu nìn kíǹ fiii kí kɔ́ Jisirayeel tiŋkin ní Jeesabeel gbìl̄ tin jítèe kɔkɔ. Ní u nyàab̄ culoo ki bɔ̄ntì ní ki nyáantì u-ba ní ki cūtìi kíǹ ki ŋōō tɔkɔla pu.

³¹Ŋyunti ŋun Jeewuu lákatì kitiŋ punyɔkɔki kí kɔ́ee ní Jeesabeel téeń yii: «Simrii, sii un kūū a-kpiliuee, an mɔ̄ deeee[19]?»

³²Jeewuu wáaǹ ki kpēē tɔkɔla watil púee ní ki bí yii: «Ŋma bí m-jandi púee?» Niinee ubɔti cindin bifaabi bili kii bita ŋɔ̄ntìń tɔkɔlabin.

³³Ní u bí-bi yii: «Téeḿmaan-u kí lúkuń kitiŋ!» Ní bíǹ téeń-u ki lúkú kitiŋ. U lítèe ní u-fatikuu yāaǹ kitiŋ gundi nì itaamu pu, ní Jeewuu dū u-tɔrɔkuu ki tāā-u ki jítì.

³⁴Míǹ boonee ní Jeewuu nín cá dibeecindin ki jíń ki nyùn̄, ní ki bí u-naacimbi yii: «Ní bɔ́ntímaan unimpusoopu nee kí síb́-u, di sá yii u sá ubɔti bisal ní.»

³⁵Niinee bi nyáń kí síb́-u, ama kun bi pée kée di sá kuyikpabiku nì ataa nì iŋal.

³⁶Ní bi fātìi gítìń ki tùkū Jeewuu ní úǹ bí yii: «Ti-Dindaan nín nìn dī u-bɔnaatiliu Eelii, utiiseebeeja pu ki sòon̄ tiŋyee dee yii: <Iboo làá dāá ŋmɔ́ Jeesabeel wunti Jisirayeel satin[20],

³⁷ní u-wunti ń yàl̄ tisatin kii tinaabin tin bi bīil̀ kitiŋ tì yàntī tiwan lòoǹee, áli gba baa dāa gíti ŋūǹ kí lì yii: Jeesabeel sèé!>»