Read Ntcham 1 Chroniques 10 Bible Online

1 Chroniques 10 - Ntcham bible

1 Chroniques 10

¹Dalba Fiiliistii yab jáń kujaau nì Isirayeel yab Giilboowa jool[19] pu. Isirayeel yab nìn sáǹ ní Fiiliistii yab kūū binib tikpil.

²Fiiliistii yab nìn jɔ́m̀ ki kāl̀ Saayuul nì u-jipɔmbi pu kàti kati. Bi nìn kūū Joonatan nì Abinadaab nì Meelkiisuwa.

³Niinee dikɔ̀ndi kóoǹ ki nyīŋfì Saayuul pu. Bipintɔliibi nín dāa ká-uee ní u-pɔbil bíil̀ ní u-wunti kíǹ ki gbáà kpàkpakpa.

⁴Ní Saayuul bí un ŋúb́ u-janjawantee yii: «Fúutí a-tàataajiki ki sāā kí kpɔ̀-mi. Maa là yii Fiiliistii yab bin kaa gíí akpancan nee ń kpɔ̀-mi kí nīn cáa bèel̄-mi.» Ama ní un ŋúb́ u-janjawantee fāŋkì ní ki yíì. Niinee ní Saayuul yōoǹ úǹ u-ba tàataajiki ki cóoǹ ki lítì ki-pu.

⁵Un ŋúb́ u-janjawantee nín ká yii u-kpiliu kpíìyee, ní u mun dū u-tàataajiki ki cóoǹ ki lítì ki-pu ki kpíì.

⁶An nín dī min ní Saayuul nì u-jipɔmbi taatil kpíìyee dee. Mimmee ubɔti dicaŋku kúntì mun dee.

⁷Isirayeel yab bin kóò ditantakalinee[20] ká yii Isirayeel yab sáǹ ní Saayuul nì u-jipɔmbi taatil kpíì. Niinee ní bi yíkìi sáǹ ki fá bi-timmu, ní Fiiliistii yab dɔ́miń ki kāl̀.

⁸Ku wúntì Fiiliistii yab dɔ́miń kí fūkul̀ bin bi kūūyee wantee ní ki ká yii Saayuul nì u-jipɔmbi taatil kpíì ki dɔ̄ Giilboowa jool pu.

⁹Bi nìn lēē u-yil, ki pēetì u-janjawanti, ní ki tú ki yìiǹ Fiiliistii yab timmu kɔkɔn nì awaadiinni nì aniwulin ki sòoǹ nì báà ŋma bi-jajil pu.

¹⁰Boonee ní bi cáá u-janjawanti ki yóoǹ bi-waadiiku kubɔn. Bi nìn dū u-yil ki lúntì bi-waal Daagɔn diikun.

¹¹Bin kóò Yabeesi Galaadi tiŋkinee[21] gbìl̄ Fiiliistii yab nín ŋá Saayuul puee.

¹²Bininjab bin cáá dibaatandee yíkì ki cūtìi yōoǹní Saayuul nì u-jipɔmbi. Bi nín cáá-bi ki bāań Yabeesee ní bi dū bi-kpabiŋ ki síb́ teereebinti subu bubɔ taapu Yabeesi tiŋkin, ki bóob́ kinyɔkɔ iwiin iluli.

¹³Kun pu Saayuul nìn kpíìyee di sá yii waa nìn yúl̀ nì ti-Dindaan deedee. Waa nìn tɔ́ u-marab. Áli gba u cūtì un kàal̀ dibɔɔjal pu ki yíì bitaŋkpiibee cee dibalifil[22],

¹⁴kaa mēē ti-Dindaan ú kpòotī-u. An pu ní Unimbɔti yāntì Saayuul kpíì ní u dū dibeel ki tīī Isayi jipɔɔn Daafiidi.