Read Ntcham 1 Chroniques 11 Bible Online

1 Chroniques 11 - Ntcham bible

1 Chroniques 11

¹Isirayeel yab nibul kɔkɔ nìn kóoǹ ki kpáfì Daafiidi cee Eebrɔn[23] tiŋkin ní ki bí-u yii: «Ti baasii pēē dinabiil ní.

²Iyunti in jítèe, min Saayuul nìn sá ti-bɔtiuee, sii di nìn līī Isirayeel yab janjaliibi nyɔkɔpu ki cáǹ-bi kujaau. Ní ti-Dindaan nìn pōoǹ-si yii: <Sii di làá dāá kpàà Isirayeel yab man nibul kí nīn sá bi-bɔtiu>»

³Isirayeel yab kpilib kɔkɔ nìn dɔ́miń Eebrɔn tiŋkin Daafiidi cee. Niin ní u nì bi ŋá mpèé ti-Dindaan nimbiin, ní bi bātì ŋkpam ki sītì u-yil pu ú nīn sá Isirayeel yab bɔtiu kí nóó nì ti-Dindaan nín nìn dī Samiyeel pu ki sòon̄ tiŋyee.

⁴Daafiidi nì Isirayeel yab kɔkɔ nìn cūtì kí já nì Jeerusaleem tiŋki. Bi nìn gíti yíì kitiŋ gbanti yii Jeebusi tiŋki, di sá yii Jeebusi yab di nìn kóò niin.

⁵Jeebusi yab nìn bí Daafiidi yii: «Ni kpá kí kɔ́nní ti-tiŋkin!» Ama ní Daafiidi jáń ki fōō Siiyɔn tiŋki laakin bi nìn máń digundi ki túee. Kí yòon̄ ŋyunti gbanti ní bi kíǹ ki yíì niin yii Daafiidi Tiŋki.

⁶Daafiidi nìn lī yii: «Unil un làá péé kí já nì Jeebusi yabee di làá nīn sá bijanjaliibi kɔkɔ kpiliu.» Seeruya jipɔɔn Joowaab di nìn līntì nsan ki cūtìi jáń nì Jeebusi yab, ní ki kpántì bijanjaliibi kɔkɔ kpiliu.

⁷Daafiidi nìn cūtìi kāl̀ kitiŋ pɔ̀ti pu laakin bi máń diguŋkpaandi ki túee ní ki pú niin diyindi yii <Daafiidi Tiŋki>.

⁸Boonee, u nìn fātìi máń ki māntìi tú Miiloo tiŋki ki wāaǹ-kì, ní Joowaab máń kitiŋ laakin kíǹee kɔkɔ.

⁹Daafiidi nìn mɔ̀tīi kāntí mpɔn ki cá, ní ti-Dindaan Unimbɔti Mpɔŋkɔdaan nìn bí u-cee.

¹⁰Daafiidi janjakpilib bin nìn tíkí-uee sèé. Bíǹ nì Isirayeel yab kɔkɔ di nìn kāaǹ-u dibeel kii ti-Dindaan nín nìn sòon̄ u-nibul pu puee.

¹¹Daafiidi janjakpilib gbanti yiŋŋi sèé[24]: Uakimoonja Iseebaal di nìn sá bin cí ubɔtee kpiliu. Dalba úǹ di dū u-kpaŋki ki jáń ki kūū bijanjaliibi alaataa ata kɔkɔ dikɔmbaantiil poon.

¹²Úǹ boonee, Doodoo un nìn sá Ayooya tiŋkinee jipɔɔn Eelasaar di nìn pá. U nìn kútì <bibaatandambi Bitee kitil> poon.

¹³Úǹ di nìn bí Daafiidi cee Paasi-Damiim tiŋkin, ŋyunti ŋun Fiiliistii yab nìn kpáfì kí já nì Isirayeel yab kujaauee. Isirayeel yab nìn sáǹ. Ɔɔji kpaabu bubɔ nìn dɔ̄ niin.

¹⁴Eelasaar nì u-naacimbi nìn síl̀ bukpaayee kansikin ní ki jáń ki fōō-bu ki pɔ́ɔkiǹ Fiiliistii yab. Míǹ ní ti-Dindaan nìn tīī Isirayeel yab dijajikpaandi.

¹⁵Dalba Fiiliistii yab ŋātì bi-janjanaapaal Rafayii yab tantakalin. Niinee bijanjaliibi bimɔntiibi Mmuŋku nì Saalaa bin cīití ubɔtee kitil poon bita dɔ́miń ki ká Daafiidi Adulaam taŋkpalɔkɔlin[25].

¹⁶Daafiidi nìn bál̀ kutaŋkpanaakoouee poon, ní Fiiliistii yab gɔminau nìn bí Beetileem tiŋkin.

¹⁷Ní kpɔkɔsi ubɔ cúú Daafiidi ní u bí yii: «Ŋma di làá cùú cáań-mi lɔkɔ un bí Beetileem punyɔkɔki caŋinee nyim ḿ nyɔ̀ dee?»

¹⁸Niinee bijanjaliibi bitee kɔ́ Fiiliistii yab janjanaapaalin, ki lúnní nnyim lɔkɔ un dɔ̄ Beetileem punyɔkɔki caŋinee ki cáań ki tīī Daafiidi. Ama u nìn yíì kaa nyùn̄-mì. U nìn dū-mi ki fá ti-Dindaan ní.

¹⁹Ní u bí yii: «Ti-Dindaan ń cúú-mi ḿ taa nyɔ̀ nnyim nee! Mì sá-mi kii binib bin kaa mɔ́tì bi-ba pu ki cūtìi nyàabìń-mèe fatikuu ní.» Ní u yíì kaa nyùn̄-mì. Bibaatandambi bitee nín nìn túń dituŋkpaandi diŋyee dee.

²⁰Joowaab naal Abisayi di nìn sá <Bibaatandambi Bitee kitil> kpiliu. Dalba úǹ di dū u-kpaŋki ki jáń nì binannanliibi alaataa ata, ki kūū-bi ní ki nyáń diyindi Bibaatandambi Bitee kitil poon.

²¹U nìn nyáń diyindi mili pu ki jítiǹ bibaatandambi bili bin kíǹee. Úǹ di nìn kpántì bi-kpiliu gba. Waa cáá juti bíǹ Bitee kitil poon.

²²Yooyadaa jipɔɔn Beenaya un sá Kabiseeyeel tiŋkinee nìn sá ubaatandaan un dàkā tininjati ŋfunyɔm kupaauee. Úǹ di nìn kūū Moowaab tiŋkin janjakpaambi bili. Dalba mun ntaayim nìn lítì ki bīī kitiŋ pu ní u kɔ́ mbòó ŋubɔ poon ki kūū gbikinti.

²³U nìn tí kūū ueejipitija ubɔ u fɔ̀kɔ̀ ki bàn̄ kii meetab bili nì dijandi nyɔkɔm. Kikpaŋ kin unaaciinee nìn ŋúb̀ee nìn gbìfì kii ndɔfɔkɔ ŋun bi cáa lù satabee ní. Beenaya nìn ŋúb́ ditambɔndi ní ki kpìl̄ unaaciinee, ki cúú u-kpaŋki ki fōō u-ŋaan ní ki gíiǹ ki kūū-u.

²⁴Beenaya nín nìn ŋá puee dee. Míǹ ní u nyáń diyindi kii bibaatandambi bitee.

²⁵Dikitil mmuŋku nì saalaayee kansikinee, úǹ di nìn nyáń diyindi ki jítiǹ bin kíǹee, ama waa nín kútì <Bibaatandambi Bitee kitil> poon ní. Daafiidi nìn dū-u ki ŋá bijanjaliibi bin cí-uee kpiliu ní.

²⁶Bibaatandambi bin kíǹee di nìn sá Joowaab naal Asayeel, nì Doodoo un sá Beetileem tiŋkinee jipɔɔn Eelanan,

²⁷nì Samooti un sá Arɔɔr tiŋkinee, nì Eeleesi un sá Peelɔn tiŋkinee,

²⁸nì Ikeesi un sá Teekoowa tiŋkinee jipɔɔn Ira, nì Abiyeeseer un sá Anatooti tiŋkinee,

²⁹nì Siibkayi un sá Usa tiŋkinee, nì Ilayi un sá Ayooya tiŋkinee,

³⁰nì Maraayi un sá Neetoofa tiŋkinee, nì Baana un sá Neetoofa tiŋkinee jipɔɔn Eeleedi,

³¹nì Riibayi un sá Giibeeya tiŋkin Beenjameen naakookunee jipɔɔn Itaayii, nì Beenaya un sá Piiratɔn tiŋkinee,

³²nì Urayi un nyánní Gaasi buŋyi caŋinee, nì Abiyeel un sá Beeti-Arabaa tiŋkinee,

³³nì Asimafeeti un sá Bawuriim tiŋkinee, nì Eeliyaba un sá Saalbɔn tiŋkinee,

³⁴nì Beenee Aseem un sá Giisɔn tiŋkinee, nì Saagee un sá Araar tiŋkinee jipɔɔn Joonatan,

³⁵nì Saakaar un sá Araar tiŋkinee jipɔɔn Akiyaam, nì Uur jipɔɔn Eeliifaal,

³⁶nì Eefeer un sá Meekeera tiŋkinee, nì Ayiiya un sá Peelɔn tiŋkinee,

³⁷nì Eesiroo un sá Kaarmeel tiŋkinee, nì Eesbayi jipɔɔn Naarayi,

³⁸nì Naatan naal Jooweel, nì Agrii jipɔɔn Miibaar,

³⁹nì Seeleeki un sá Amɔn tiŋkinee, nì Seeruya jipɔɔn Nakirayi un sá Beerooti tiŋkin ki nìn ŋúb̀ Joowaab janjawantee,

⁴⁰nì Ira un sá Yiitirii maaliŋunee, nì Gareeb un mun sá Yiitirii maaliŋunee,

⁴¹nì Urii un sá Eeti maaliŋunee, nì Alayi jipɔɔn Sabaadi,

⁴²nì Siisa jipɔɔn Adina un sá Rubeen naakookun kpilib ubɔee, u nì bijanjaliibi mmuŋku nì saalaa,

⁴³nì Maaka jipɔɔn Anan, nì Joosafaati un sá Miiteen tiŋkinee,

⁴⁴nì Usiya un sá Asitarooti tiŋkinee, nì Ootam jipɔmbi Saama nì Yeeyeel bin sá Arooweer tiŋkinee,

⁴⁵nì Simrii jipɔɔn Yeediyayeel nì u-nabiki Joowa un sá Tiisi tiŋkinee,

⁴⁶nì Eeliyeel un sá Maafa tiŋkinee, nì Eelnaam jipɔmbi Jeeriibayi nì Joosafiya, nì Yiitima un sá Moowaab tiŋkinee,

⁴⁷nì Eeliyeel nì Oobeedi nì Jaasiyeel bin sá Sooba tiŋkinee.