Read Ntcham 1 Chroniques 14 Bible Online

1 Chroniques 14 - Ntcham bible

1 Chroniques 14

¹Tiir yab bɔtiu Iram nìn túnní binib Daafiidi cee. Bi nìn cáań-u busubu bun bi yíì seediree dɔi nì kapintab nì bitaŋkpakpitiliibi bí mā-u dibeecindi.

²Niinee Daafiidi nìn béè yii ti-Dindaan u-ba di kāaǹ-u Isirayeel tiŋki pu dibeel, ní Isirayeel u-nibul puee, u bíi yòontí u-beel yilpu.

³Daafiidi gíti cáá binimpoobi biba Jeerusaleem tiŋkin. Binimpoobi gbanti màl̄-u mbininjabiyaamu nì nnimpubiyaamu ki kútì.

⁴Mbininjabiyaamu mun u màl̄ Jeerusaleem tiŋkinee di sá Samuwa nì Soobaab nì Naatan nì Saloomɔn,

⁵nì Yiibaar nì Eeliisuwa nì Eel-Peeleeti,

⁶nì Nooga nì Neefeegi nì Yaafiya,

⁷nì Eeliisama nì Beelyadaa nì Eeliifeeleeti.

⁸Fiiliistii yab nín nìn gbìl̄ yii bi bātì ŋkpam ki sītì Daafiidi yil pu ki kāaǹ-u dibeelee, ní bi-kɔkɔ nín cá kí nyàab̀-u kí cúú-u. Daafiidi gbìl̄ an bɔtee ní ki nyáń ki túŋkì-bi nsanni.

⁹Fiiliistii yab bàn̄ee ní ki yàl̄ ki gbí Reefayiim tantakalin.

¹⁰Ní Daafiidi bālifì ti-Dindaan yii: «Ḿ cùú já nì Fiiliistii yabaaa? A làá dū-bi kí ŋá m-ŋaanaaa?» Ní ti-Dindaan kíí Daafiidi yii: «Cùú já nì bi, m làá dū-bi kí ŋá a-ŋaan.»

¹¹Niinee Fiiliistii yab nín cá áli Baal Peerasiim ní Daafiidi jáń ki pɔ́ɔkiǹ-bi niin. U nìn bí yii: «Kii nnyim nín cífí nnyimbilkaam gundi dibundi puee, míǹ ní m-Dindaan cátì nsan m-nimbiin m-nannanliibi kansikin!» An pu ní bi pú niin diyindi yii Baal-Peerasiim. Taapu di sá yii: «Un cífí dibundee Kpiliu.»

¹²Fiiliistii yab nìn sáǹ ki fá bi-waaŋi niin, ní Daafiidi yāntì bi wùn̄-ŋi ŋŋmi.

¹³Fiiliistii yab fātìi tí gítìń ki yàl̄ ki gbí Reefayiim tantakal kí já nì Daafiidi.

¹⁴Ní Daafiidi bālifì ti-Dindaan ní úǹ kíí-u yii: «Á taa bíití bi-nimbiin pú kí já nì bi! Màntī bi-boon pú, ní kí dāá nyā bi-pu isufi taapu.

¹⁵A yaa láa gbìl̄ bi-tagbiŋŋi pu isufee yilpuee, á yáb́ malaa. Ti-Dindaan di līntì a-nyɔkɔpu kí já nì Fiiliistii yab janjakitil.»

¹⁶Ní Daafiidi ŋá kii ti-Dindaan nín bí ú ŋá puee, ní ki jáń ki pɔ́ɔkiǹ-bi, ki jìn̄-bi kí yòon̄ Gabawɔn kí tin cáá sāā Geeseer kpaanyɔkɔ[30].

¹⁷Niinee ní Daafiidi yindi dūu gbītì ntimu kɔkɔ poon ní báà ŋma kíǹ ki sòoǹ u-bɔti, ní ti-Dindaan yāntì atimbun kɔkɔ nib fāŋkì-u.