Read Ntcham 1 Chroniques 15 Bible Online

1 Chroniques 15 - Ntcham bible

1 Chroniques 15

¹Daafiidi máń u-ba adiin laakin bi yíì yii Daafiidi Tiŋkee, ní ki bɔ́ntì mpaan ŋubɔ ki cóoǹ tanti bí cáań Unimbɔti dakaau kí síiń poon.

²U dóòyee ní ki bí yii: «Leefii yab baba di cáá nsan kí túń Unimbɔti dakaau. Di sá yii bíǹ ní ti-Dindaan lēē yii bí nīn tūntí dakaa gbanti, kí nīn kpèé-u kí nīn cáa cá jaanjaan.»

³Niinee ní Daafiidi yíiń Isirayeel yab kɔkɔ ki kpáfì Jeerusaleem tiŋkin bí yòon̄ní Unimbɔti dakaau kí cùnnì laakin u bɔ́ntì kí yóoń-uee.

⁴U kpáfì Aarɔn naantiibi bisaraaŋaliibi nì Leefii yab mun.

⁵Keeyaati maaliŋunee, Uriyeel di nìn sá ukpil u nì u-nabiyaamu binib dilaataal nì mmuŋku.

⁶Meerarii maaliŋunee, Asaaya di sá ukpil, u nì u-nabiyaamu binib alaataa ali nì binib mmuŋku.

⁷Geersɔm maaliŋunee, Jooweel di sá ukpil u nì u-nabiyaamu binib dilaataal nì binib mmuŋku nì saalaa.

⁸Eeliisafan maaliŋunee, Seemaya di sá ukpil, u nì u-nabiyaamu binib alaataa ali.

⁹Eebrɔn maaliŋunee, Eeliyeel di sá ukpil u nì u-nabiyaamu binib imuŋku inaa.

¹⁰Usiyeel maaliŋunee, Amiinadaab di sá ukpil, u nì u-nabiyaamu binib dilaataal nì binib saalaa nì bili.

¹¹Daafiidi yíiń bisaraaŋakpilib Sadooki nì Abiyataar, nì Leefii yab Uriyeel nì Asaaya nì Jooweel nì Seemaya nì Eeliyeel nì Amiinadaab u-cee.

¹²Bi kpáfèe ní u bí-bi yii: «Nimbi di sá Leefii yab kpilib ki nóó nì ni nín pēē pēē mmaal puee. Ni nì ni-nabiyaamu ń bɔ́ntí ni-ba kí nīn bí circir, ní kí cùú yòon̄ní ti-Dindaan, Isirayeel Nimbɔtiu dakaau kí cáań laakin ní m bɔ́ntì kí yóoń-uee.

¹³Mpeekaamee, ni nín kaa nìn bí puee di nìn yāntì ti-Dindaan ti-Nimbɔtiu nìn fōō mbum ti-pu. Di sá yii taa nìn kpēē dakaayee kii an nín máaǹ puee.»

¹⁴Ní bisaraaŋaliibi nì Leefii yab bɔ́ntì ki ŋá bi-ba circir kí cùú yòon̄ní ti-Dindaan Isirayeel Nimbɔtiu dakaau.

¹⁵Niinee Leefii yab dū idɔ ki bɔ́ Unimbɔti dakaau buŋyin ki yōoǹ ki būkuǹ ki nóó nì ti-Dindaan nín nìn tùkū Mooyiisi bí ŋá puee[31].

¹⁶Daafiidi nìn tùkū Leefii yab kpilib yii bí lēē bi-dicaŋŋi yab poon bilaŋgaaliibi bí nīn gà ilan ki bɔ̀ɔ́ tibati nì saŋgub nì cancakantib, kí nīn fàal̀ nì dipɔɔpindi.

¹⁷Leefii yab nìn lēē Jooweel jipɔɔn Eeman, nì u-nabiki Asaafi, Beereekiya jipɔɔn. Meerarii maaliŋunee, bi nìn lēē Kusayawuu jipɔɔn Eetan.

¹⁸Bin bi nìn lēē ki kútì bi-pu bi bí bi-taapuee di sá Seekariyawuu nì Beeni nì Yaasiyeel nì Seemiiramooti nì Yeeyiyeel nì Unii nì Eeliyaab nì Beenayawuu nì Maseeyawuu nì Mataatiyawuu nì Eeliifileewuu nì Miikineeyawuu nì bipunyɔɔciitiliibi Oobeedi-Eedoom nì Yeeyiyeel.

¹⁹Bilaŋgaakpilib Eeman nì Asaafi nì Eetan di nìn bɔ̀ɔ́ tasa kúti cancakantib bin siim pɔ̄ɔ̄yee.

²⁰Seekariya nì Asiyeel nì Seemiiramooti nì Yeeyeel nì Unii nì Eeliyaab nì Maseeyawuu nì Beenayawuu di nìn bɔ̀ɔ́ tibati tin siim sá kineewaai siimee.

²¹Mataatiyawuu nì Eeliifileewuu nì Miikineeyawuu nì Oobeedi-Eedoom nì Yeeyiyeel nì Asaasiyawuu di nìn bɔ̀ɔ́ saŋgub bin sá nneen ŋun nyìm̀ee siim bi cáa kífí ilanee.

²²Keenaniyawuu un sá Leefii yab kpiliuee ní bi nìn dū dakaa túntam tundi ki ŋúbiǹ, kun puee u nìn baasii nyí ditundi gbanti tiŋan ní.

²³Beereekiya nì Eelkana di nìn sá Unimbɔti dakaau punyɔkɔciitiliibi,

²⁴bi nì Oobeedi-Eedoom nì Jeeya. Bisaraaŋaliibi Seebaniya nì Joosafaati nì Neetaneeyeel nì Amasaayi nì Seekariyawuu nì Beenayawuu nì Eeliyeeseer di nìn búǹ akantán ki līī Unimbɔti dakaau nyɔkɔpu.

²⁵Daafiidi nì Isirayeel tindaŋkpilib nì bijanjakpilib nìn nín cá kí yòon̄ní ti-Dindaan dakaau Oobeedi-Eedoom dumpu. Bi-kɔkɔ nìn bí mmɔŋkpaan poon.

²⁶Unimbɔti nìn wúń Leefii yab bin nìn tú Dakaayee pu. Niinee ní bi kūū inajaa iluli nì ipijaa iluli ki ŋá Unimbɔti saraa.

²⁷Daafiidi nìn pēē iŋaabu in bí fálfalee bɔkutifɔkɔl. Leefii yab bin kɔkɔ nìn tú dakaayee nì bilaŋgaaliibi nì Keenaniyawuu un nìn sá bin tú dakaayee kpiliuee nìn pēē tiwambaantiil kii ubɔtee ní. Daafiidi nìn gíti dū bisaraaŋaliibi satab bin bi dū ŋŋaabu ŋun bí fálfal ki ŋáĺee ki páaǹ.

²⁸Isirayeel yab kɔkɔ nìn cáá ti-Dindaan Poondi dakaau ki cūnnì Jeerusaleem tiŋkin ki gbáà iwiliili, ki búǹ iyin nì akantán, ki cákafí cancakantib ní ki bɔ̀ɔ́ tibati nì saŋgub an tùm̀ dàii.

²⁹Ŋyunti ŋun ní bi cáá ti-Dindaan Poondi dakaau ki bàn̄ <Daafiidi Tiŋkinee>, Saayuul bisal Miikaal gbóoń tɔkɔla ki kpēē ní ki ká Ubɔti Daafiidi bí ki ŋōō nì dipɔɔpindi. Niinee ní u kpēē ki sīŋkiǹ-u u-pɔbilin.