Read Ntcham 1 Chroniques 16 Bible Online

1 Chroniques 16 - Ntcham bible

1 Chroniques 16

¹Daafiidi nìn gāā tanti bí dū Unimbɔti dakaau kí síiń poon. Bi nìn cáá dakaayee ki síiǹ tantee kansikin. Míǹ boonee ní Daafiidi ŋá bisaraawɔkaabi nì mpèé saraabi ki tīī Unimbɔti.

²U ŋá saraabi gbanti ki dóòyee ní ki mēē ki bīiǹ samaa pu ti-Dindaan yindi pu.

³Boonee ní u yākatì tijin ki tīī Isirayeel yab kɔkɔ. Uninjaaa, unimpuɔɔɔ, báà ŋma nìn fōō kpɔnɔ ubɔ nì daati subiliŋ kalaau nì fiinyi subikuliŋ kalaau[32].

⁴Daafiidi nìn dū Leefii yab bin bí ditundin ŋyunti gbantee biba ki síiǹ ti-Dindaan Dakaau nyɔkɔpu bí gāā ilan kí pàkà ti-Dindaan Isirayeel Nimbɔtiu, kí jāam̀-u ní kí nyɔ̄ŋkì u-yindi.

⁵Asaafi di nìn kpòotī-bi ní Seekariyawuu tútúǹ-u. Yeeyiyeel nì Seemiiramooti nì Yeekiyeel nì Maatitiyawuu nì Eeliyaab nì Beenayawuu nì Oobeedi-Eedoom nì Yeeyiyeel bɔ̀ɔ́ tibati nì saŋgub ní Asaafi cákafí cancakantib.

⁶Bisaraaŋaliibi Beenayawuu nì Yasiyeel di nìn yú Unimbɔti Dakaau nyɔkɔpu ki búǹ akantán kaa gbèentí.

⁷Ŋwiin gbanti sá mpeekaa ŋun Daafiidi tīī Asaafi nì u-nabiyaamu ditundi bí nīn gà ilan ki nyɔ́ŋkí ti-Dindaanee.

⁸Nlan ŋun bi nìn gāāyee sèé: Ní nyɔ̄ŋkìmaan ti-Dindaan kí yòon̄ u-yindi yilpu, ní yàntīmaan anibul kɔkɔ ń gbìl̄ atuŋkpaan ŋin u ŋáaǹee pu.

⁹Ní gāāmaan ilan kí pàkà-u, ní bɔ̀ɔ̀maan tibɔɔkaal kí nyɔ̄ŋkì-u. Ní māafìmaan atuŋkpaan ŋin kɔkɔ u túńee.

¹⁰Ní nīn fàal̀maan u-circir yindi pu, nín̄ bímaan mmɔnni, nimbi bin nyàab̀ ti-Dindaanee.

¹¹Nyàab̀maan ti-Dindaan nì u-pɔŋŋu, pée nyàab̀maan kí wāl̀ u-nimbiin.

¹²Ní téetímaan maamaacib bin kɔkɔ u ŋée, nì atulim nì ibɔsoon in nyáń u-nyɔkɔnee pu.

¹³Nimbi u-tɔntɔnliibi Isirayeel naantiibi, nimbi Jaakɔb naantiibi, nimbi bin u lútèe, téetímaan.

¹⁴Úǹ di sá ti-Dindaan Unimbɔti, úǹ di sá duulinya kɔkɔ bɔsoonliu.

¹⁵Ní taa pée súntí u-poondi pu dalba dalba, tibɔti tin u sòon̄ ki tīī anaantitɔntɔkɔ kutuku puee.

¹⁶Dipoondi gbanti ní u pōoǹ Abraam, díǹ dibaantiil ní u pūtì ki pōoǹ Isaaki.

¹⁷Dipoondi gbanti ní u dūu kpántì mara ki tīī Jaakɔb, talku poondi din u pōoǹ Isirayeel,

¹⁸ki lī yii: «M làá dū Kanaan tiŋki kí tīī-si, án nīn sá si nì a-naantiibi fakal»[33].

¹⁹Ti-naanjab kaa nìn náaǹ báà fiii, bi nìn pée sá binicambi bikaaŋkaabi yéè ní kitiŋ nee pu.

²⁰Bi nìn kàal̀ atimbunni ní ki kpántí, ní kí kàl̄ dibeel diban kí póotí din kíǹ.

²¹Ama Unimbɔti kaa kíí báà unil ń sàaǹ-bi. Bi-puee, Unimbɔti dáaĺ bibɔtiibi tafal ki lī yii:

²²«Ní taa gbēē bin m lútèe, kí taa ŋá m-bɔnaatiliibi tikpitil tiba.»[34]

²³Duulinya kɔkɔ nib, gāāmaan ilan kí pàkà ti-Dindaan. Ŋwiin kamaayee, ní nīn báakí ki lì yii úǹ di sá Ufiil.

²⁴Māafìmaan atimbun kɔkɔ nib u-nyooti, kí māafìmaan duulinya kɔkɔn u-maamaaci tuuŋŋi.

²⁵Di sá yii ti-Dindaan di sá ukpaan ní ki máaǹ inyɔŋki. U sá kuwambiiu ní ki jítiǹ awaa kɔkɔ.

²⁶Anibul ŋin kíǹee waaŋi kaa bí tiban, ama ní ti-Dindaan di náań yilpu.

²⁷U-nimbiin ní tikpaandi nì dibeel bí, mpɔn nì mmɔn gbí u-kɔŋkooŋŋun.

²⁸Ntimu kɔkɔ nibuliŋ, dāá tīīmaan ti-Dindaan tinyool, ní bāakìmaan u-nyooti nì u-pɔŋŋu.

²⁹Dāá nyɔ̄ŋkìmaan u-yiŋkpaandi. Cáaḿmaan ni-saraabi u-nimbiin. Bòom̄maan taapu ti-Dindaan nimbiin, ŋyunti ŋun u yaa lēē u-ba ki dàkēe.

³⁰Duulinyan kɔkɔ nib, ni-wunti ń nīn gbáà kpàkpakpa u-nimbiin! Tiŋman kitiŋ bá ki pɔ̄ɔ̄, ní kì kpá kí lábití kí cìb̄.

³¹Kutagbɔŋu, nín̄ fàal̀, kitiŋ, nín̄ bí dipɔɔpindin! Lìmaan atimbun kɔkɔ nib cee yii: «Ti-Dindaan di sá ubɔti!»

³²Tiŋku ń nīn wòoǹ ki kpáaǹ tin kɔkɔ bí u-poonee! Tisati ń nīn fàal̀ ki kpáaǹ tin kɔkɔ bí ti-poonee!

³³Kubambaŋŋun sufii ń nīn gbáà iwiliili ti-Dindaan nimbiin, di sá yii u dòoń kí sòoǹ duulinya bɔti.

³⁴Tí nyɔ̄ŋkì ti-Dindaan, di sá yii u ŋān̄, ní u-neeŋkpaandi bí ki cá jaanjaan[35]!

³⁵Ní lìmaan yii: «Unimbɔti ti-Fiiliu, fīī-ti, kóoǹ-ti kí kpāfì, ní kí fīī-ti kí nyāntí atimbun ŋin kíǹee ŋaan. A-yindi sá circir yindi ní. Niinee ti làá ŋmā kí tùkù-si yii si nì ditundi, ní án nīn mɔ̄ǹ-ti tí nyɔ̄ŋkì-si.»

³⁶Ní jāam̀maan ti-Dindaan Isirayeel Nimbɔtiu, kí nīn cá abin abin. Ní samaa kɔkɔ kíí yii «Ameeni! Nyɔ̄ŋkìmaan ti-Dindaan!»

³⁷Boonee ní Daafiidi tīī Asaafi nì u-nabiyaamu mara yii bí gbíntí ti-Dindaan Poondi Dakaau cee. Niin ní bi làá nīn bí ki tūǹ bi-tundi baabadal kí nóó nì ŋwiin kamaa koobil nín sá puee.

³⁸Daafiidi nìn lēē Oobeedi-Eedoom nì u-nabiyaamu binib imuŋku ita nì binii bí nīn cí ti-Dindaan dakaau, kí kūtì Yeedutun jipɔɔn Oobeedi-Eedoom nì Koosa.

³⁹Daafiidi nìn dū ti-Dindaan circir kɔŋkooŋŋu ŋun bí Gabawɔn tiŋkinee tundi ki ŋúbiǹ usaraaŋakpil Sadooki nì u-nabiyaamu[36].

⁴⁰Niin ní bi làá nīn ŋáań kutaafaau nì kujoou bisaraawɔkaabi. Bíǹ di làá nīn ŋáań tin kɔkɔ ŋmàn̄ ki kā marab bin ti-Dindaan nìn dūu tīī Isirayeelee gbɔŋku poon.

⁴¹Binib bin nìn kútì bi-puee di sá Eeman nì Yeedutun nì bin bi nìn pée lēē bí nīn gà ilan ki nyɔ́ŋkí ti-Dindaanee. Di sá yii u-ŋanti bí ní ki cá jaanjaan.

⁴²Eeman nì Yeedutun di nìn kpèé akantán nì cancakantib nì tiwan tin kɔkɔ bi nìn cáa bɔ̀ɔ́ ki gà ilanee. Yeedutun dicaŋkun yab di nìn cí kipunyɔkɔ.

⁴³Míǹ boonee ní báà ŋma nín kùǹ, ní Daafiidi mun nín gítí kí cùú màntì u-dicaŋku yab pu[37].