Read Ntcham 1 Chroniques 21 Bible Online

1 Chroniques 21 - Ntcham bible

1 Chroniques 21

¹Ŋwiin ŋubɔee, Sitaan yíkì kí já nì Isirayeel yab ní ki lūkutì Daafiidi ú kàaǹ Isirayeel yab kɔkɔ.

²Daafiidi nìn bí Joowaab nì u-janjakpilib bin kíǹee yii: «Ní cùú kàam̀maan Isirayeel yab kɔkɔ, kí yòon̄ Beerseeba tiŋki ŋgiil pú kí cáá sāā Daani tiŋki ŋgan pú. Ni yaa kàan̄ ki dóòyee, ní gítiń kí dāá tùkù-mi ḿ béé bi-wíiŋŋu nyɔkɔm.»

³Ní Joowaab kíí-u yii: «Ti-baa ubɔti, m mèé yii ti-Dindaan ń yàntī u-nibul Isirayeel yab ń bùtī ŋfunyɔm dilaataal pu. Bi-kɔkɔ bí díǹ pu nee sii ti-baa ubɔti taapu ní. Kin ba pu ní a baasii nyàab̀ kí kàaǹ Isirayeel yab kí yàntī bí yìntī míǹ?[48]»

⁴Nì míǹ kɔkɔee ubɔti marau nìn pɔ̄ɔ̄ ki jítiǹ Joowaab nín nìn dàkafī puee, ní úǹ dāa gīī ki ŋá míǹ. Joowaab nìn cúú nsan ki yìin̄ Isirayeel tiŋki kɔkɔn ní ki fātìi gítìń Jeerusaleem tiŋkin.

⁵Joowaab bāańee ní ki tùkū Daafiidi u nín kàan̄ binib bi-nyɔkɔm nyáń puee. U bí yii Isirayeel naakookun yab bin bàn̄ kí cù kujaauee sá binib miiliyɔn ubɔ nì binib kutukub dilaataal, ní Juuda naakookun yab bin bàn̄ kí cù kujaauee sá binib kutukub alaataa anaa nì imuŋku ita nì saalaa.

⁶Joowaab kaa nìn kàan̄ Leefii naakookun yab nì Beenjameen naakookun yab ki kútì bin kíǹee pu. Di sá yii ubɔti marauee kaa nìn kāliǹ-u báà fiii.

⁷Tibɔti gbanti kaa nìn mɔ́ɔkiǹ Unimbɔti, ní u dáaĺ Isirayeel yab tafal.

⁸Ní Daafiidi bí Unimbɔti yii: «Ikpitikpaan ní m ŋá nee. Ama kɔŋkɔnnee m mèé-si yii á dū m-yìntitam gbanti kí pɔ̄-mi, kun puee m lafun ŋá kii m sá uwaatee ní.»

⁹Niinee ní ti-Dindaan sòon̄ nì ubɔnaatil Gaadi un di kpòotī Daafiidee ní ki bí-u yii:

¹⁰«Cùú tùkù Daafiidi yii man ni-Dindaan nín lī puee sèé: <Man ni-Dindaan, m dū tiwan tita ní ki bíl̀ u-nimbiin ú lēē tin u là ḿ dūú dáaĺ u-tafalee.>»

¹¹Ní Gaadi cūtì Daafiidi cee ki bí-u yii: «Ti-Dindaan nín lī puee sèé. Ba ní a là ḿ dūú dáaĺ a-tafal ní?

¹²Ŋkùm ń nyā a-tiŋki pu abin ataaa, binannanliibi ń já kí pɔ̄ɔkiǹ-si iŋmal itaaa, bìlbil kúm ń jēetí kitiŋ nee pu ní ntuun ń dū ti-Dindaan tàataajiki kí pɔ̀fì binib Isirayeel tiŋki kɔkɔn iwiin ita? Kɔŋkɔnnee, dàkafì tiŋan kí tùkù-mi tin m làá tin kíí un túnní-mee.»

¹³Ní Daafiidi bí Gaadi yii: «M bí kunimbaakpaaŋŋu poon ní. Ama an sɔ́ ḿ kɔ́ ti-Dindaan ŋaan ki jítiǹ ḿ kɔ́ unil ŋaan, di sá yii ti-Dindaan úǹ poon mɔ̄ ní.»

¹⁴Di sá ní ti-Dindaan dū bìlbil kúm ki tɔ́ Isirayeel yab pu ní an kūū binib kutukub imuŋku ita nì saalaa.

¹⁵Unimbɔti nìn tú ntuun ŋú cùú nàan̄ Jeerusaleem tiŋki. Ama ti-Dindaan nín ká ntuunee bí ki nà binib puee, ní an gíti kɔ́-u falaa nnaabu gbanti pu. Di sá ní u bí ntuunee yii: «An ŋmāntèe, gbèen̄ee!» Ŋyunti gbantee ti-Dindaan tuuŋŋu nìn yú ujeebusja[49] Araafina bileegbanaapaal caŋin.

¹⁶Daafiidi wáaǹ ki kpēēyee ní ki ká ntuunee yú yilpu nì taapu kansikin ki fɔ́fì kitàataajiki ki túĺ Jeerusaleem tiŋki. Niinee ní Daafiidi nì bitindaŋkpilib tātìi gbāaǹ bi-yigbeeŋi tūū kitiŋ ki pēē kutukub.

¹⁷Ní Daafiidi bí Unimbɔti yii: «Man di kaa bí yii bí kàaǹ binibaaa? Man di ŋá ikpiti, man di yīntì, m-nibul mun ŋá ba? An sá man nì m-dicaŋku tafal ní á dáaĺ? Ti-Dindaan m-Nimbɔtiu, an sá man nì m-dicaŋku yab tafal ní á dáaĺ. Taa dū iween nee kí tɔ̄ a-nibul pu.»

¹⁸Ti-Dindaan tuuŋŋu bí Gaadi ń tùkù Daafiidi yii: «Jɔ̄m̀ ujeebusja Araafina bileegbanaapaal pu kí mā ti-Dindaan nsaraafan.»

¹⁹Ní Daafiidi nín jɔ́ḿ kii ti-Dindaan nín dī Gaadi pu ki tīī mara puee.

²⁰Ŋyunti gbantee Ɔrinan nìn bí u-naapaal pu ki gbáà bilee. U fātèe ní ki ká ntuun, ní u-jipɔmbi binaa bin nìn bí u-cee niinee sáǹ ki bál̀.

²¹Ní Daafiidi cōom̀ ki nín cá Ɔrinan cee. Ɔrinan kpēēyee Daafiidi dee ní u nyáń ki túŋkì-u ní ki tātìi gbāaǹ u-yigbeel tūū kitiŋ ubɔti nimbiin.

²²Ní Daafiidi bí Ɔrinan yii: «Dū a-naapaal nee kí tīī-mi. M là kí mā ti-Dindaan nsaraafan ŋu-pu. Mimmee nnaabu ŋun jéetì dinibul pu nee làá gbèen̄. Dū-ŋu kí tīī-mi ḿ pà-si ŋu-daaku nín sá puee.»

²³Ní Ɔrinan kíí Daafiidi yii: «Ti-baa ubɔti, yòon̄ tin kɔkɔ fáatì-see kí dūú ŋá saraabi. Kpèè inaa sèé á dūú ŋá saraawɔkaa. Tɔrɔku dɔkpalkaai mun sèé á dūú kpāā ŋŋmi kí wà saraabi, bilee mun sèé á dūú ŋá tijimpin saraau. M dū kɔkɔ ki tīī-si.»

²⁴Ama ní ubɔti Daafiidi bí Ɔrinan yii: «Aayee, m làá dā a-bileegbanaapaal ní kí pà-si kunimbiŋmiiu nín sá puee. Maa là kí dū tin sá a-wantee nì faalaa wanti kí ŋá saraawɔkaa kí tīī m-Dindaan m-Nimbɔtiu.»

²⁵Di sá ní Daafiidi pàn̄-u animbil jitɔmbi alaataa aluu dibileegbanaapaal pu.

²⁶Daafiidi máń ti-Dindaan nsaraafan niin ní ki ŋá bisaraawɔkaabi nì mpèé saraabi. U nìn mēē ti-Dindaan ní úǹ kíí-u ki yāntì ŋŋmi nyánní yilpu ki wùn̄ bisaraawɔkaabi bin pá ŋfan puee.

²⁷Niinee ní ti-Dindaan tùkū ntuunee yii ŋú gíiǹ kitàataajiki kí fúuń kujitooun.

²⁸Daafiidi nìn ká yii ti-Dindaan kíí ki fōō u-wimmeem Ɔrinan un sá Jeebusi tiŋkinee bileegbanaapaal pu. Kí yòon̄ ŋyunti gbantee ní u kíǹ ki cáà niin múlmul ki ŋáań saraabi.

²⁹Ŋyunti gbantee, circir kɔŋkooŋŋu ŋun Mooyiisi nìn ŋá kuteeunee nì bisaraawɔkaabi faŋŋu nìn bíń nsaraaŋapaan laŋki Gabawɔn[50] tiŋkin ní.

³⁰Ama Daafiidi kaa nìn gíti ŋūǹ kí cù niin kí bàlifì Unimbɔti, kun puee u nìn fāŋkì ti-Dindaan tuuŋŋu jikee tikpil.