Read Ntcham 1 Chroniques 23 Bible Online

1 Chroniques 23 - Ntcham bible

1 Chroniques 23

¹Daafiidi nìn púĺ tikpil tikpil. U nìn dū u-jipɔɔn Saloomɔn ki kāaǹ dibeel Isirayeel tiŋki pu[53].

²Míǹ boonee ní u tú bi yíiń Isirayeel bɔtibiliŋ kɔkɔ ki kpáfì u-cee, ki kpáaǹ bisaraaŋaliibi nì Leefii yab.

³Niin ní u yāntì bi kàan̄ Leefii yab binicikitikaabi bin cáá kí yòon̄ abin mmuŋku nì saalaa kí nīn jɔ́ḿee. Bi nìn nyáń binib kutukub bili kpá imuŋku ili.

⁴Daafiidi nìn lēē bi-kansikin binib kutukub mmuŋku nì binaa bí nīn kpèé ti-Dindaan Diiku mātam tuuŋŋi, binib kutukub biluu bí nīn sá bigbaŋŋmaliibi nì bibɔsoonliibi,

⁵binib kutukub binaa bí nīn sá bipunyɔɔciitiliibi. U nìn lēē binib kutukub binaa bí nīn gà ilan ki nyɔ́ŋkí ti-Dindaan, kí nīn bɔ̀ɔ́ tibɔɔkaal tin úǹ Daafiidi u-ba mɔ́ɔ́ bí nīn cáa nyɔ́ŋkí ti-Dindaanee.

⁶U nìn yākatì Leefii yab akiti akiti ki nóó nì bi nín pēē pēē mmaal pu Leefii jipɔmbi Geersɔn nì Keeyaati nì Meerarii dicaŋŋinee.

⁷Geersɔn jipɔmbi Laadan nì Simeeyii dicaŋŋi di nìn náań Geersɔn kitil.

⁸Laadan nìn màl̄ mbininjabiyaamu muta ní, ujipɔŋkpil di sá Yeeyiyeel ní bin kíǹee sá Seetam nì Jooweel.

⁹Simeeyii mun nìn màl̄ mbininjabiyaamu muta ní. Múǹ di sá Seeloomiiti nì Asiyeel nì Aran ní ki sá Laadan yab dicaŋŋi kpilib.

¹⁰Simeeyii nìn gíti màl̄ mbininjabiyaamu munaa mubɔ mun. Múǹ di sá Yakaati nì Siisa nì Yeewusi nì Beeriya.

¹¹Yakaati di sá ujipɔŋkpil ní Siisa pá. Yeewusi nì Beeriya bíǹ kaa màl̄ mbininjabiyaamu tikpil. Di sá ní bi dū bi-nib ki kpáfì ki tīī-bi kudicambaantiiu tundi.

¹²Keeyaati nìn màl̄ mbininjabiyaamu munaa. Múǹ di sá Amiiraam nì Isaar nì Eebrɔn nì Usiyeel.

¹³Amiiraam jipɔmbi di sá Aarɔn nì Mooyiisi. Bi nìn gāntì Aarɔn ki yóoǹ ú dū u-ba kí sú kí nīn tūǹ circir páaa laŋki tuuŋŋi kí nīn cá jaanjaan. U nì u-naantiibi tundi di sá bí nīn ŋáań talaalutuukaa saraabi ki tìì ti-Dindaan, kí nīn tūǹ Unimbɔti tundi ní kí nīn tìì binib dibiindi ti-Dindaan yindi pu.

¹⁴Mooyiisi úǹ nìn sá Unimbɔti niliu ní. Bi nìn kàan̄ u-jipɔmbi ki kútì Leefii naakookun yab poon ní.

¹⁵Mooyiisi jipɔmbi di sá Geersɔm nì Eeliyeeseer.

¹⁶Geersɔm jipɔŋkpiliu di sá Seebuyeel.

¹⁷Eeliyeeseer màl̄ kibininjabiki kibaba ja ní. Waa nìn gíti màl̄ ki kútì u-pu. Ama Reekabiya úǹ nìn màl̄ binib tikpil tikpil.

¹⁸Isaar jipɔŋkpiliu di sá Seeloomiiti.

¹⁹Eebrɔn jipɔŋkpiliu di sá Yeeriya, uliliiti di sá Amaariya, utataati di sá Yasiyeel ní unanaati sá Yeekamam.

²⁰Usiyeel jipɔŋkpiliu di sá Miika ní uliliiti sá Isiya.

²¹Meerarii jipɔmbi di sá Maalii nì Musii. Maalii jipɔmbi di sá Eelasaar nì Kiisi.

²²Eelasaar kaa màl̄ kibininjabiki ní ki kpíì. U màl̄ mbinimpubiyaamu ŋma ní, ní bi-niijab Kiisi jipɔmbi fātìi cáá-bi bi kpántì bi-nimpoobi.

²³Musii nìn màl̄ mbininjabiyaamu muta ní. Múǹ di sá Maalii nì Eedeer nì Yeereemooti.

²⁴Binib nee kɔkɔ nìn sá Leefii naakookun ní. Báà ŋma nìn sá u-dicaŋkun ukpil ní. Bi nìn kàan̄-bi ubɔ ubɔ ní ki ŋmàn̄ bi-yiŋŋi ki ŋá tigbɔn poon. Un yaa nìn bàn̄ abin mmuŋkuee, u nìn tūǹ ditundi ti-Dindaan diikun ní.

²⁵Di sá yii Daafiidi nìn bí yii: «Ti-Dindaan Isirayeel Nimbɔtiu tīī u-nibul diŋuŋfil. Úǹ u-ba kíǹ ki kóò Jeerusaleem tiŋkin ní kí nīn cá jaanjaan.

²⁶Mimmee an kaa ti cáá yii Leefii yab làá gíti túń circir kɔŋkooŋŋu nì tiwan tin kɔkɔ bi cáa tūǹ ŋu-poon ditundee.»

²⁷An pu ní ki nóó nì Daafiidi bɔjoolkaatee, Leefii yɔu un yaa nìn bàn̄ abin mmuŋkuee, bi nìn ŋmà udaan yindi ní kí ŋá kugbɔŋun.

²⁸Bi máaǹ kí nīn tɔ́ Aarɔn naantiibi marab ní ki nīn tūǹ ditundi ti-Dindaan diikun. Bíǹ di kpèé kunimbɔtidii ciŋŋi nì ku-dibiyaamu, ní ki ŋáań tiwan tin bi dūu sú Unimbɔtee circir, ní ki bí kunimbɔtidiin ki tūǹ ditundi.

²⁹Bíǹ di làá nīn pūul̀ kpɔnɔb bin bi pāantí teebil pu Unimbɔti nimbiinee[54], kí nīn bɔ́ntí ŋyim min bi cáa ŋáań tijimpin saraabee, kí nīn pūul̀ ŋkpɔnɔbiyaamu mun poon baa ŋáań ŋkpɔnɔnyɔkɔee nì kalaabi bin bi pūul̀ ataŋkpee puee, nì kalaabi bin kíǹee. Bíǹ di tí kpèé tiwan tin bi cáa ŋmàntī tiwan nyifiŋŋu nì ti-púuŋŋuee.

³⁰Leefii yab máaǹ kí nīn bí kunimbɔtidiin taafaau nì joou ki gà ilan ki pàkà ti-Dindaan ki nyɔ́ŋkí-u.

³¹Bi máaǹ kí nīn bí ŋyunti ŋun kamaa binib yaa dɔ́miń kí ŋá bisaraawɔkaabee, nì ŋwiŋŋuŋfikaa kamaa, nì uŋmal kamaa wimpeepeekaaŋu dal, nì jiŋaalib wiiŋyi kɔkɔ[55]. Bi máaǹ kí tɔ̄ ditundi gbanti ti-Dindaan nimbiin kí nīn cáa cá jaanjaan, kí nīn wīikí kii mara nín bālifì puee.

³²Míǹ ní bi làá nīn tūǹ Unimbɔti Tantiu nì dikpafindi tantiu tuuŋŋi. Bi làá nīn tútúǹ bi-nabiyaamu Aarɔn naantiibi bi tūǹ ditundi kunimbɔtidii poon[56].