Read Ntcham 1 Chroniques 26 Bible Online

1 Chroniques 26 - Ntcham bible

1 Chroniques 26

¹Bi nìn yākatì bipunyɔɔciitiliibi mun akiti akiti ní. Kooree jipɔɔn Meeseeleemiyawuu, Asaafi naantiiu un sá Kooree maaliŋunee

²nìn màl̄ mbininjabiyaamu. U nín màl̄-mu mu pá pá tɔb pu puee yiŋŋi sèé: Seekariyawuu nì Yeediyeel nì Seebadiyawuu nì Yatiniyeel,

³Eelam nì Yeewoowanan Eeliyooweenayi.

⁴Oobeedi-Eedoom nìn màl̄ mbininjabiyaamu munii ní. Mu nín pá pá tɔb pu puee sèé: Seemaya nì Yoosabaadi nì Yoowa nì Sakaar nì Neetaneeyeel,

⁵nì Amiyeel nì Isakaar nì Peewuleetaayi. Tiŋman, ti-Dindaan nìn lafun bīiǹ Oobeedi-Eedoom boon[58].

⁶U-jipɔŋkpiliu Seemaya nìn màl̄ mbininjabiyaamu. Bi nìn cáá mpɔn bi-baa dicaŋkun, di sá yii bi-kɔkɔ nìn sá bibaatandambi ní.

⁷Seemaya jipɔmbi di sá Ɔtinii nì Reefayeel nì Oobeedi nì Eelsabaadi, ní kí kūtì bi-nabiyaamu Eeliiwuu nì Seemakiya. Bíǹ liitil nìn sá bibaatandambi ní.

⁸Oobeedi-Eedoom jipɔmbi nee nì bíǹ bi-ba jipɔmbi nì bi-nabiyaamu kɔkɔ nìn sá bibaatandambi, ní ki cáá difaŋgiil bi-tundi poon. Bi-kɔkɔ nìn nyáń binib imuŋku ita nì binib bili ní.

⁹Meeseeleemiyawuu nìn cáá jipɔmbi nì nnabiyaamu, bi nìn nyáń bibaatandambi saalku nì bita ní.

¹⁰Koosa un sá Meerarii maaliŋunee nìn cáá jipɔmbi binaa ní. Simrii di nìn jíń tikpiti kudicaŋu poon. Waa nìn sá ujipɔŋkpil, ama ní u-baa dū tikpiti ki tīī-u.

¹¹Koosa jipɔnliliitiu di sá Ilikiyawuu, ní utataati sá Teebaaliyawuu ní unanaati sá Seekariyawuu. Koosa jipɔmbi nì u-nabiyaamu kɔkɔ nìn nyáń binib saalaa nì bita ní.

¹²Bipunyɔɔciitiliibi kitiŋi nee kpilib nì bi-yab nìn tūǹ bi-tundi dicilpu ti-Dindaan Diikun ní.

¹³Binipɔmbaaa, binicikitikaabaaa, bi nìn tɔ́ kasi ní ki yākatì mpunyɔmu mun bi làá nīn cīitée ki nóó nì bi-dicaŋŋi.

¹⁴Bi nín tɔ́ kasee, an nyáń yii Seeleemiyawuu di làá nīn cīití kipunyɔkɔ kin bí ŋwìiń nyalaŋki púee. Bi gíti tɔ́ee ní an nyáń yii u-jipɔɔn Seekariyawuu un sá usaŋkimɔntee di làá nīn cīití kipunyɔkɔ kin bí ŋgan púee.

¹⁵Oobeedi-Eedoom di làá nīn cīití kipunyɔkɔ kin bí ŋgiil púee, ní u-jipɔmbi ń nīn cīití adiin ŋin poon bi yōontí tijikaalee.

¹⁶Supiim nì Koosa di làá nīn cīití kipunyɔkɔ kin bí ŋwìiń jeetilaŋki púee nì Saleekeeti punyɔkɔki kin bí yilpu dandi púee. Bi nín làá nīn cīití ki fòol̄ tɔb puee sèé.

¹⁷Ŋwiinee, Leefii yab binib biluu di làá nīn cīití ŋwìiń nyalaŋki pú punyɔkɔki, ní binib binaa ń nīn cīití ŋgan pú yaka, ní binib binaa ń nīn cīití ŋgiil pú punyɔkɔki, ní akiti ali ń nīn cīití adiin ŋin poon bi yōontí tijikaalee, dikitil kamaa cáá binib bili bili.

¹⁸Kudii kun bí ŋwìiń jeetilaŋki púee, binib binaa làá nīn yú didandi pu ki cí ní bili ń nīn bí kudiin.

¹⁹Bipunyɔɔciitiliibi kitiŋi ŋin bi nìn lēē Kooree nì Meerarii maalii poonee dee.

²⁰Leefii yab biba mun nìn sá bin kpèé kunimbɔtidii gaajawanti nì tiwan tin bi cáań ki ŋá Unimbɔti saraayee.

²¹Laadan naantiibi bin sá Geersɔn maaliŋunee nì bi-dicaŋŋi kpilib di sá Yeeyeelii,

²²nì Yeeyeelii jipɔmbi nì Seetam nì u-naal Jooweel. Bíǹ di nìn kpèé ti-Dindaan Diiku gaajawanti.

²³Amiiraam nì Isaar nì Eebrɔn nì Usiyeel maaliŋunee,

²⁴Mooyiisi jipɔɔn, Geersɔm naantiiu Seebuyeel di sá ukpikpaan un kpèé tigaajawan kɔkɔee.

²⁵U-nabiyaamu kansikinee, Geersɔm maan Eeliyeeseer naantiibi nìn bí. Bíǹ di sá Eeliyeeseer jipɔɔn Reekabiya nì Yeesaya nì Yooram nì Sikirii nì Seeloomiiti.

²⁶Seeloomiiti gbanti nì u-nabiyaamu di nìn kpèé tigaajawan tin kɔkɔ ubɔti Daafiidi nì adican kpilib nì bijanjakpilib bin kpòotī bijanjaliibi kutuku kutukuee nì bin kpòotī bijanjaliibi dilaataal dilaataalee nì bijanjakpilib bin kíǹee nìn dūu sú Unimbɔtee.

²⁷Binib gbanti nìn lēē tiwan tin bi jáń kujaau ki fōōyee tiba ki dūu sú Unimbɔti bí nīn cáa ŋáŋkí ti-Dindaan Diiku.

²⁸Seeloomiiti nì u-nabiyaamu ní bi nìn dū tiwan tin kɔkɔ Unimbɔti bɔnaatiliu Samiyeel, nì Kiisi jipɔɔn Saayuul, nì Neer jipɔɔn Abineer, nì Joowaab un na bi yíì Seeruyee nìn dūu sú Unimbɔtee ki ŋúbíǹ bí nīn kpèé.

²⁹Keenaniyawuu nì u-jipɔmbi bin sá Isaar maaliŋunee di nìn kpèé Isirayeel tiŋki kɔkɔn tin kaa sá tinimbɔtibɔtee bɔti. Bíǹ di nìn kpèé akàlintuun bɔti, ní ki sá bibɔsoonliibi mun.

³⁰Eebrɔn maaliŋunee, Asabiya nì u-nabiyaamu bibaatandambi binib kutuku ubɔ nì alaataa aluli di nìn kpèé Isirayeel tiŋki dijandi din bí Jɔɔdan buŋŋu ŋwìiń jeetilaŋki púee. Bíǹ di nìn kpèé dinimbɔtinool nì akàlintuun bɔti.

³¹Yeeriya di nìn sá Eebrɔn maaliŋun yab kpiliu. Daafiidi nín kāl̀ dibeel abin imuŋku ili poonee, ní u yāntì bi nyàab̄ mmaal gbanti nib nì bi-dicaŋŋi nyeeŋu, ní ki ká yii bi-kansikin biba bí Yeeseer, Galaadi tiŋkin, ki sá bibaatandambi.

³²Ubɔti Daafiidi nìn gíti lēē bibaatandambi bin sá mmaal gbantin ki sá adican kpilibee binib kutukub bili nì alaataa aluli ki kútì Yeeriya pu. Bíǹ di làá nīn kpèé dinimbɔtinool nì akàlintuun bɔti ntimu mun poon ní Rubeen nì Gaadi naakɔti, nì Manasee naakooku dijandi diba yab kóòyee.