Read Ntcham 1 Chroniques 27 Bible Online

1 Chroniques 27 - Ntcham bible

1 Chroniques 27

¹Isirayeel yab bin bí ubɔti tundinee sɔ̀. Adican kpilib nì bijanjakpilib bin kpòotī binib kutuku kutukuee nì bin kpòotī binib dilaataal dilaataalee nì bikàliŋkpilib. Bíǹ di nìn kpèé ajanjakiti ŋin nìn bí ditundinee, di sá yii dijanjakitil kamaa nìn cáá dibindi poonee uŋmal ubɔ ní kí tɔ̄ ditundi. Dijanjakitil kamaa poonee, binib kutukub mmuŋku nì binaa di nìn bí.

²Dijanjakitipeekaal din nìn yì ditundi uŋmapeepeekaa poonee kpiliu di sá Sabidiyeel jipɔɔn Yasoobaam. U-janjakitil poonee, binib kutukub mmuŋku nì binaa di nìn bí.

³U nìn sá Peereesi maaliŋun ní ki nìn kpèé ajanjakiti kpilib bin cáá kí tɔ̄ ditundi uŋmapeepeekaa poonee.

⁴Dikitil din nìn yì kí tɔ̄ ditundi uŋmaliliiti poonee kpiliu di sá uakooliija Doodayii. Miikilooti di nìn kpòotī dijanjakitil gbanti ní di nìn cáá binib kutuku mmuŋku nì binaa.

⁵Dijanjakitil ditataatiil din nìn yì kí tɔ̄ ditundi uŋmatataati poonee kpiliu di nìn sá usaraaŋakpil Yooyadaa jipɔɔn Beenayawuu. U-janjakitil nìn cáá binib kutukub mmuŋku nì binaa ní.

⁶Beenayawuu gbanti nìn kútì Bibaatandambi Mmuŋku nì Saalaa kitil pu ní ki nìn sá di-kpiliu. U-janjakitil poonee u-jipɔɔn Amiisafaadi nìn bí.

⁷Dijanjakitil dinanaatiil din nìn yì kí tɔ̄ ditundi uŋmananaati poonee kpilib di nìn sá Joowaab naal Asayeel nì u-jipɔɔn Seefadiya. Bi-janjakitil nìn cáá binib kutukub mmuŋku nì binaa ní.

⁸Dijanjakitil diŋmooŋmootiil din nìn yì kí tɔ̄ ditundi uŋmaŋmooŋmooti poonee kpiliu di nìn sá uiseerayiitija Sameekuuti. U-janjakitil nìn cáá binib kutukub mmuŋku nì binaa ní.

⁹Dijanjakitil diluluutiil din nìn yì kí tɔ̄ ditundi uŋmaluluuti poonee kpiliu di sá uteekooyiija Yiira, Ikeesi jipɔɔn. U-janjakitil nìn cáá binib kutukub mmuŋku nì binaa ní.

¹⁰Dijanjakitil diluluútiil din nìn yì kí tɔ̄ ditundi uŋmaluluúti poonee kpiliu di sá upeelooniija Eeleesi, Eefiraayiim naantiibi kansikin ubɔ. U-janjakitil nìn cáá binib kutukub mmuŋku nì binaa ní.

¹¹Dijanjakitil dininiitiil din nìn yì kí tɔ̄ ditundi uŋmaniniiti poonee kpiliu di sá ukusatiija Sibeekayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní.

¹²Dijanjakitil diwawaatiil din nìn yì kí tɔ̄ ditundi uŋmawawati poonee kpiliu di nìn sá uanatootija Afiyeeseer, Beenjameen naakookun yɔu ubɔ. U-janjakitil nìn cáá binib kutukub mmuŋku nì binaa ní.

¹³Dijanjakitil disaalaatiil din nìn yì kí tɔ̄ ditundi uŋmasaalaati poonee kpiliu di sá uneetoofatiija Maarayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní.

¹⁴Dijanjakitil saalaa nì dipeepeekaal din nìn yì kí tɔ̄ ditundi uŋmal saalaa nì upeepeekaa poonee kpiliu di sá upiiratooniija Beenaya, Eefiraayiim naakookun yɔu ubɔ. U-janjakitil nìn cáá binib kutukub mmuŋku nì binaa ní.

¹⁵Dijanjakitil saalaa nì dililiitiil din nìn yì kí tɔ̄ ditundi uŋmal saalaa nì uliliiti poonee kpiliu di nìn sá uneetoofatiija Eeldayii, Ootiniyeel maaliŋun ubɔ. U-janjakitil nìn cáá binib kutukub mmuŋku nì binaa ní.

¹⁶Isirayeel yab naakɔti kpilib yiŋŋi sɔ̀. Rubeen naakookunee, Sikirii jipɔɔn Eeliyeeseer di sá ukpil. Simeeyɔn naakookunee, Maaka jipɔɔn Seefatiyawuu di sá ukpil.

¹⁷Leefii naakookunee, Keemuyeel jipɔɔn Asabiya di sá ukpil. Aarɔn dicaŋkunee, Sadooki di sá ukpil.

¹⁸Juuda naakookunee, Eeliiwuu un sá Daafiidi maanee di sá ukpil. Isakaar naakookunee, Miikayeel jipɔɔn Oomirii di sá ukpil.

¹⁹Sabulɔn naakookunee, Oobadiya jipɔɔn Isimaya di sá ukpil. Neefitalii naakookunee, Asiriyeel jipɔɔn Yeereemooti di sá ukpil.

²⁰Eefiraayiim naakookunee, Asasiyawuu jipɔɔn Ooseeya di sá ukpil. Manasee naakooku dijandi din bí Jɔɔdan buŋŋu ŋwìiń jeetilaŋki púee, Peedaya jipɔɔn Jooweel di sá ukpil.

²¹Manasee naakooku dijandi din kóòń Galaadi tiŋkinee, Seekariyawuu jipɔɔn Idoo di sá ukpil. Beenjameen naakookunee, Abineer jipɔɔn Yasiyeel di sá ukpil.

²²Daani naakookunee, Yeeroowaam jipɔɔn Asareeyeel di sá ukpil. Isirayeel naakɔti kpilib dee.

²³Daafiidi kaa nìn yāntì bi kàan̄ binipɔmbi bin cáá abin mmuŋku kí nīn cáa sìntēe. Di sá yii ti-Dindaan nìn lī yii u làá yàntī Isirayeel yab ń bùtī kii iŋmalbijaa in bí kutaa puee ní[59].

²⁴Seeruya jipɔɔn Joowaab nìn kíĺ ki bíi kàaǹ Isirayeel yab, ama waa nìn púntì. Unimbɔti nìn gíí Isirayeel yab pu diŋuul dikàandi gbanti pu. An pu ní Isirayeel nibul kɔkɔ nyɔkɔm kaa ŋmàn̄ ki kā Daafiidi Tuuŋŋi gbɔŋkun[60].

²⁵Adiyeel jipɔɔn Asimafeeti di nìn sá un kpèé ubɔti gaajawantee. Oosiyasi jipɔɔn Yoowanan di nìn kpèé tikpaajin tin bi kpáafì ntiŋkpaamun nì ntimbilimun nì laakin sintil difɔkɔŋi bée.

²⁶Keeluub jipɔɔn Eesirii di nìn sá bikpaabi kpiliu Isirayeel tiŋki kɔkɔn.

²⁷Simeeyii un sá Raama tiŋkinee di nìn kpèé fiinyi sufii kpaaŋŋi kɔkɔ. Sabidii un sá Seefam tiŋkinee di nìn kpèé ndamam min nyánní akpaan gbantin bi cāabìń ki kpáafée.

²⁸Baal-Anan un sá Beeti-Geedeer tiŋkinee di nìn kpèé ɔliifi sufii nì siikoomɔɔr sufii kpaaŋŋi ŋin bí Seefeelaayee. Yoowasi di nìn kpèé ŋkpam min bi cāabìń ki kpáafée.

²⁹Siitirayi un sá Saarɔn tiŋkinee di nìn kpèé tinacaŋkpun tin bi kpàá Saarɔn naakpaapɔɔkunee. Adilayi jipɔɔn Safaati di nìn kpèé tinacaŋkpun tin bi kpàá ditantakalinee.

³⁰Ɔbiil un sá Isimaayeel maaliŋunee di nìn kpèé igutaamu. Yeediya un sá Meerɔnɔti tiŋkinee di nìn kpèé mmansalimu.

³¹Yasiisi un sá Agaar maaliŋunee di nìn kpèé ipii nì iŋoobu. Binib bin nìn kpèé ubɔti Daafiidi gaajawantee dee.

³²Daafiidi wee Joonatan nìn sá unyil ki ŋá sukul. Úǹ di nìn sá ubɔti saŋkiliu. Yeeyeel un baa nìn sá Akimoonii tiŋkee di nìn kpèé ubɔti jipɔmbi.

³³Ubɔti saŋkiliu ubɔ mun di sá Ayiitoofeel. Usayii un sá Arkii maaliŋunee di nìn sá ubɔti bɔɔ un u cáá u-poon bɔti ki tùkùee.

³⁴Ayiitoofeel kúm boonee, Beenayawuu jipɔɔn Yooyadaa nì Abiyataar di nìn fōō u-yil. Joowaab di nìn sá ubɔti janjakitil kpiliu.