Read Ntcham 1 Chroniques 28 Bible Online

1 Chroniques 28 - Ntcham bible

1 Chroniques 28

¹Daafiidi nìn yíiń Isirayeel yab kpilib kɔkɔ ki kpáfì Jeerusaleem tiŋkin. U nìn yíiń tinaakɔti kpilib nì ajanjakiti kpilib bin bí u-tundinee, nì bijanjakpilib bin sá bijanjaliibi kutuku kutuku nì dilaataal dilaataal kpilibee. U nìn gíti kpáfì bikàlimbi bin kpèé ubɔti nì u-jipɔmbi gaajawanti nì bi-waŋkutee, nì bifaabi nì bibaatandambi nì binikpaambi kɔkɔ.

²Ubɔti Daafiidi nìn yíkì ní ki bí-bi yii: «M-nibul yab, m-nabiyaamu, pīlifìmaan-mi! M nìn ká nlandɔkɔ yii m làá mā kudii kun poon ní ti-Dindaan poondi dakaau làá nīn yúee, laakin ti-Nimbɔtiu taaŋi làá nīn yūlifée. An puee m bɔ́ntì kí mā kudii gbanti.

³Ama ní Unimbɔti bí-mi yii: <Sii di kaa làá mā-mi kudii kun poon binib làá nīn dòoń ki jáaḿ-mee. Di sá yii a jáń tijáti tikpil ki yāntì binib tikpil fatikuu nyáń.>

⁴Nì míǹ kɔkɔee man ní ti-Dindaan Isirayeel Nimbɔtiu lēē m-baa dicaŋku kɔkɔ poon. U lēē man nì m-jipɔmbi nì m-naantiibi tí jī dibeel Isirayeel tiŋki pu kí nīn cá jaanjaan. Dooooyee m-naanja Juuda ní u nìn lēē ú nīn sá uyidaan. Míǹ boonee, Juuda naakookunee ní u lēē m-baa dicaŋku. An dāa kúntèe, man ní u lēē m-baa jipɔmbi kansikin ḿ nīn sá Isirayeel tiŋki kɔkɔ pu ubɔti.

⁵Mbininjabiyaamu kupaau mun ti-Dindaan tīī-mee kansikinee, Saloomɔn ní u lēē yii ú kàl̄ úǹ ti-Dindaan beel Isirayeel pu tibɔtiil.

⁶Ti-Dindaan tùkū-mi yii: <A-jipɔɔn Saloomɔn di làá mā m-Diiku nì ku-ciŋŋi. Tiŋman úǹ ní m lēē. U làá nīn sá-mi ujipɔnti ní man ń nīn sá-u ubaati.

⁷U yaa gbíntìi nìkì ki tɔ́ m-marab nì m-bɔkpaaŋi kii díǹ neeyee, m làá yàntī u-beel ń báań inyaan kí nīn cáa cá jaanjaan.>

⁸Kɔŋkɔnnee m-nabiyaamu, ti-Dindaan nibul Isirayeel kɔkɔ nimbiinee, nì ti-Nimbɔtiu un gbìl̀ tin ti bíi sòoǹee nimbiinee, ní lēē kí bīfì ti-Dindaan ti-Nimbɔtiu marab kɔkɔ kí nīn tɔ́-bi. Ni yaa ŋá mimmee, ni làá nīn pée gbíntìi yì kitimmɔntii kin pu ni kā nee, ní kí dāá dū-kì kí tīī ni-naantiibi án nīn sá bi-tindaŋwanti kí nīn cá jaanjaan.

⁹Sii m-jipɔɔn Saloomɔn, nyàab̀ kí béé man a-baa Nimbɔtiu un m jáaḿee tiŋan, kí nīn jáaḿ-u nì dipɔbil diba nì a-naŋki kɔkɔ. Di sá yii ti-Dindaan kpèé ki wāĺ tin bí binib pɔbiliŋ poon poon kábuee ní ki nyí bi nín dàkafī puee kɔkɔ. A yaa nyàab̀-u, u làá yàntī á ká-u. Ama a yaa dū-u ki fá, u mun làá dū-si kí fá ní kí nīn cá jaanjaan.

¹⁰Kɔŋkɔnnee sii a-ba wāĺ, sii ní ti-Dindaan lēē yii á mā-u kudii kun làá nīn sá u-circir kɔŋkooŋŋuee. An puee, ká dipɔbil kí kíĺ ditundi gbanti!»

¹¹Daafiidi nìn tīī u-jipɔɔn Saloomɔn kugbɔŋu kun poon bi lēē kunimbɔtidii dikpaaŋku nì ku-dibiyaamu, nì adiin ŋin poon bi kpáafí tiwanee nì aditɔntɔkɔ nì poon pú diiŋŋi nì circir dakaau diiku.

¹²Daafiidi gíti tīī Saloomɔn kugbɔŋu kun poon ní bi lēē tin kɔkɔ u dākafì kí mā kí kūtèe, an dàkà yii kunimbɔtidii ciŋŋi nì adiin ŋin māntìi tú-ŋee, nì adiin ŋin poon bi làá nīn kpáafí kunimbɔtidii gaajawanti nì tiwan tin bi dūu sú Unimbɔtee.

¹³U nìn dū bisaraaŋaliibi nì Leefii yab kitiŋi yiŋŋi gbɔŋku ki tīī-u, ki kpáaǹ bi nín máaǹ kí nīn tūǹ atuun ŋin ti-Dindaan Diikunee. U nìn gíti dū kugbɔŋu kun poon bi ŋmàn̄ tiwan tin kɔkɔ bi làá nīn cáa tūǹ kunimbɔtidiin tuuŋŋee ki ŋée ki tīī-u.

¹⁴U nìn dàkā-u sindaariya nyiŋfiŋu ŋun bi làá dūú mɔ́ɔ́ sindaariya wanti kamaayee, ní ki dàkā-u animbil kúti nyiŋfiŋu ŋun bi làá dūú mɔ́ɔ́ animbil kúti wanti kamaayee, ki nóó nì atuun ŋin bi làá nīn cáá tiwan gbanti ki tūǹee.

¹⁵U nìn dàkā-u sindaariya fitilab nì bi-tɔkɔŋkaati nyiŋfiŋu, ki dàkā-u animbil kúti fitilab nì bi-tɔkɔŋkaati nyiŋfiŋu ki nóó nì atuun ŋin bi làá nīn cáá fitilab tɔ́kɔŋkaati kamaa ki tūǹee.

¹⁶U nìn dàkā-u sindaariya teebilib bin pu bi làá nīn pāantí kpɔnɔb bin bi dūu ŋá Unimbɔti saraayee nyiŋfiŋu, ki dàkā-u animbil kúti teebilib nyiŋfiŋu,

¹⁷nì njiimu mun bi cáa sàatī ki bàantí tinanee nyiŋfiŋu. U nìn dàkā-u fatiku sambiyaamu nì sindaariyamɔnti sambiyaamu nyiŋfiŋu, nì sindaariya sambiyaamu nì animbil kúti sambiyaamu nyiŋfiŋu.

¹⁸U nìn dàkā-u sindaariyamɔnti saraafaŋŋu ŋun pu bi làá nīn tùutī talaalubee nyiŋfiŋu. Míǹ boonee ní Daafiidi dàkā-u min bi máaǹ kí mɔ́ɔ́ circir janjatɔrɔkuuee, nì keerubimbi bin bi dū sindaariya ki mɔ́ɔ́ bi kpátì bi-feeŋyi ki bīiǹ ti-Dindaan Poondi Dakaau puee nyiŋfiŋu.

¹⁹Niinee ní Daafiidi bí yii: «Tin bí nee kɔkɔ ŋmàn̄ ki kā kugbɔŋu kun ti-Dindaan tīī-mee poon. Kugbɔŋu gbanti poon ní bi nín máaǹ kí tɔ̄ kunimbɔtidii tuuŋŋi kɔkɔ puee ŋmàn̄ ki kā.»

²⁰U lī mimmee ní ki kútì yii: «M-jipɔɔn, pɔ́ɔǹ a-ba kí ká dipɔbil. Kíĺ atuun gbanti kí taa fàŋkì báà tiba, ní a-wunti ń taa yɔ̀tī mun! Tiŋman, ti-Dindaan m-Nimbɔtiu làá nīn bí a-cee. Waa làá dū-si kí fá, ní ki kpá kí fàtī u-boon kí tīī-si kí cáá sāā ŋyunti ŋun a làá tɔ̄ úǹ Unimbɔti diiku mātam tuuŋŋi kí dóóyee.

²¹Kpèè, bisaraaŋaliibi nì Leefii yab yākatì akiti akiti ki cí kí tɔ̄ kunimbɔtidiin tuuŋŋi. Kí kūtèe, binib bin cáá nlammɔntiimee nì bin cáá kí tɔ̄ atuun kɔkɔ nì ŋi-bulifee, nì Isirayeel kpilib nì samaa kɔkɔ bí a-cee kí ŋá a nín là puee.»