Read Ntcham 1 Chroniques 29 Bible Online

1 Chroniques 29 - Ntcham bible

1 Chroniques 29

¹Ubɔti Daafiidi bí samaa un kpáfì u-ceeyee kɔkɔ yii: «M-jipɔɔn Saloomɔn un ní ti-Dindaan lēēyee dáá sá kibiki kaa cáá dinyil báà tiba poon. Ama ditundi din dɔ̄ ki cí-uee kaa sá gbaŋgbam yal. Di sá yii an kaa sá dibeecindi ní u làá mā kí tīī unifoo, ama an sá ti-Dindaan Unimbɔti diiku ní u làá mā.

²M dū m-pɔŋŋu kɔkɔ ki bɔ́ntì tiwan tin ní bi làá dūú mā m-Nimbɔtiu Diikuee ki síiǹ. M nyàab̄ sindaariya nì animbil kúti nì tasa kúti nì tikúmɔntiil nì idɔ bí dūú mɔ́ɔ́ tiwan tin kɔkɔ an máaǹee. M bɔ́ntì ataŋkpee ŋin bi yíì kɔɔrnaliinee nì ataŋkpee aba mun bí dūú nyɔ̀kɔntì kunimbɔtidii, ataŋkpabɔn bí ní ŋin nyim nyáń mi-ba mi-bee mun bí, an dàkà yii ataŋkpamɔnti kɔkɔ nì ŋi-bulifi nì ataŋkpee ŋin bi kpítí ki cáa māā adiinee.

³Kí kūtèe, m nín néeń m-Nimbɔtiu Diikuee pu ní m dū mama m-ba sindaariyau nì m-nimbiliŋ ki tīī. M dūu kútì tin kɔkɔ m bɔ́ntì ki síiǹ bí dūú mā Circir Diiku gbantee pu.

⁴M tīī sindaariyamɔnti un nyánní Oofiiri tiŋkinee tɔɔnib dilaataal, nì animbil kúti tɔɔnib alaataa ali nì imuŋku ili bí dūú dùntī kí nákań kunimbɔtidii guŋŋi pu.

⁵Kɔŋkɔnnee ni-kansikin ŋma di kíí nì dipɔbil diba kí tīī ti-Dindaan sindaariya nì animbil kúti? Mimmee bitɔntɔnliibi làá dāá dūú mɔ́ɔ́ tiwan tin kɔkɔ máaǹ bí dū sindaariya nì animbil kúti kí mɔ́ɔ́yee.»

⁶Niinee ní adican kpilib, nì Isirayeel naakɔti kpilib, nì bijanjakpilib bin kpòotī bijanjaliibi kutuku kutukuee, nì bin kpòotī bijanjaliibi dilaataal dilaataalee nì anikiti ŋin tūǹ ubɔti tuuŋŋee kpilib kɔkɔ kíí ki tīī tiwan nì dipɔbil diba.

⁷Tin bi nìn tīī bí dūú mā ti-Dindaan Diikuee di sá sindaariya tɔɔnib dilaataal nì imuŋku ita nì saalaa, nì sindaariya jitɔmbi kutukub saalaa, nì animbil kúti tɔɔnib alaataa ata, nì tasa kúti an jítì kii tɔɔnib alaataa aluu pu nì tikúmɔntiil an jítì tɔɔnib kutukub bita pu.

⁸Binib bin kɔkɔ nìn cáá ataŋkpamɔntee nìn dū-ŋi ki tīī Yeeyeel un sá Geersɔn maaliŋunee ú dūú ŋá Unimbɔti diiku gaajawanti poon.

⁹Binib gbanti nìn dū bi-gaajawanti ki tīī ti-Dindaan nì dipɔbil diba ní ki nìn bí mmɔnni. An nìn mɔ́ɔkiǹ ubɔti Daafiidi mun tikpil.

¹⁰Niinee ní Daafiidi jáam̀ ti-Dindaan samaa kɔkɔ nimbiin ki lī yii: «Bí nyɔ̄ŋkì sii ti-Dindaan, ti-naanja Jaakɔb Nimbɔtiu kí nīn cáa cá jaanjaan.

¹¹Sii ti-Dindaan di sá ukpaan ki yì mpɔn nì tinyool nì jilma nì dibeel[61]! Tiŋman, sii ti-Dindaan di yì tin kɔkɔ bí yilpu nì taapuee. Sii di sá ubɔti, sii un tɔ́kɔ́ tin kɔkɔ cáá kufoouee puee.

¹²Sii cee ní tigaajati nì tinyool nyēeń. Sii di cáá mpɔn tiwan kɔkɔ pu. Sii di cáá dikpabil nì mpɔn. Sii di cáá mpɔn kí yòon̄ unil yilpu ú báań inyaan.

¹³An pu ní ti jáaḿ sii ti-Nimbɔtiu, ní ki nyɔ́ŋkí a-yinnyaandi.

¹⁴Maa sá tibaaa, m-nibul yab mun kaa sá tiba. An kaa sá timbi ti-ba di cáá mpɔn kí tīī-si tiwan tin ti bíi tìì-si nee. Sii di tīī-ti an wanti kɔkɔ. Tin a tīī-tee ní timbi fàtīi gīintí ki tìì-si nee.

¹⁵Timbi sá binicambi nì binikɔkaabi ní a-nimbiin, kii ti-naanjab kɔkɔ nín nìn bí puee. Ti-maŋfal wiiŋyi kitiŋ nee pu sá kii mboon nín jītí puee ní, dimákal kpá.

¹⁶Ti-Dindaan ti-Nimbɔtiu, ti kóoǹ tiwan tikpil ki kpúkuǹ kí dūú mā kudii kí tīī a-circir yindi tinyool. Too, tikɔkɔ nyánní a-cee ní ki sá a-wanti.

¹⁷M-Nimbɔtiu, m nyí yii a kóò unil pɔbilin kí nyɔ̀kɔfì kí kpèè, ní ki néeń tin bí deedeeyee. Mamee nì dipɔbil diba ní m dū m-gaajawanti ki ŋá-si nlammɔntiim saraau. Ní m gíti ká díǹ mun nì dipɔɔpindi yii a-nibul din kóoǹ ki kpáfì doo nee mun ŋá míǹ mbaantiim.

¹⁸Ti-Dindaan, ti-naanjab Abraam nì Isaaki nì Jaakɔb Nimbɔtiu, yàntī a-nibul ń nīn cáá dipɔɔmɔntiil gbanti, ní bi-landɔkɔŋu kɔkɔ ń nīn pée bí sii baba pu kí nīn cáa cá jaanjaan.

¹⁹Tīī m-jipɔɔn Saloomɔn tibulcin pɔbil ú nīn nóó a-marab nì a-dàkatam nì a-bɔkpaaŋi, kí nīn tɔ́-ŋi. Ú mā a-Circir Diiku kun pu m bɔ́ntì tikɔkɔ ki yóoǹee.»

²⁰Boonee ní Daafiidi bí samaa yii: «Ní jāam̀maan ti-Dindaan ni-Nimbɔtiu!» Ní samaa kɔkɔ jáam̀ ti-Dindaan, bi-naanjab Nimbɔtiu. Bi nìn tātìi gbāaǹ bi-yigbeeŋi tūū kitiŋ Unimbɔti nì ubɔti nimbiin.

²¹Ku wúntèe ní Isirayeel yab ŋá ti-Dindaan mpèé saraabi nì bisaraawɔkaabi. Bi nìn kūū inajaa kutuku, ipijaa kutuku nì apibil kutuku, ní ki kútì ndamam min nyɔkɔm an sá bí kūtèe ki dūu ŋá saraabi. Mpèé saraabi bin bi nìn ŋée nìn wīikí kí kpíiǹ Isirayeel yab bin kɔkɔ nìn bí niinee.

²²Ŋwiin gbantee, Isirayeel yab nìn jíń ki nyùn̄ ti-Dindaan nimbiin nì dipɔɔpindi nì ifaal. Ŋwiin gbanti ní bi kāaǹ Daafiidi jipɔɔn Saloomɔn ubɔti nliliitiim. Bi nìn bātì ŋkpam ki sītì u-yil pu ki kāaǹ-u tibɔtiil ú nīn bí ti-Dindaan tundin. Bi nìn bātì ŋkpam ki sītì Saadooki mun yil pu ú kpántí usaraaŋakpil.

²³Saloomɔn nìn kāl̀ ti-Dindaan beejal pu ki fōō u-baa Daafiidi yil ki kpántì ubɔti. An nìn bútì-u tikpil ní Isirayeel yab kɔkɔ nìn tɔ́-u tiŋan pu.

²⁴Bijanjakpilib kɔkɔ nì bibaatandambi kɔkɔ, ki kpáaǹ Daafiidi jipɔmbi bin kíǹee kɔkɔ nìn sīntì bi-ba taapu ki tīī Saloomɔn ki tɔ́-u[62].

²⁵Ti-Dindaan nìn yāntì Saloomɔn yindi yíkì yilpu tikpil Isirayeel yab kɔkɔ nimbiin. U nìn yāntì Saloomɔn ká jilma tiŋan tiŋan pu, ní u-nyooti nìn jítiǹ Isirayeel bibɔtiibi bin kɔkɔ līntiǹ-uee.

²⁶Isayi jipɔɔn Daafiidi nìn jíń dibeel Isirayeel kɔkɔ pu ní.

²⁷U nìn jíń dibeel Isirayeel tiŋki kɔkɔ pu abin imuŋku ili ní. U nìn kāl̀ dibeel Eebrɔn tiŋkin abin aluli ní ki kāl̀ dibeel Jeerusaleem tiŋkin abin mmuŋku nì saalaa nì ata.

²⁸U nìn púĺ tiŋan ní ki nín kpíì. U nìn cáá tigaajati tikpil, ki nìn nyáń diyindi mun. U nín kpíìyee, u-jipɔɔn Saloomɔn di fōō u-yil ki kpántì ubɔti.

²⁹Ubɔti Daafiidi tuuŋŋi, kí yòon̄ ŋi nín kíĺ puee kí tin sāā ŋi nín kúntì puee ŋmàn̄ ki kā Unimbɔti bɔnaatiliu Samiyeel[63] tuuŋŋi gbɔŋkun, nì Unimbɔti bɔnaatiliu Naatan tuuŋŋi gbɔŋkun nì Unimbɔti bɔnaatiliu Gaadi tuuŋŋi gbɔŋkun.

³⁰Tigbɔn gbantin ní bi ŋmàn̄ tin jítì Daafiidi pu ŋyunti ŋun u sá ubɔtee nì u nín dàkā dibaatandi puee nì agìń ŋin u kée nì tin jítì Isirayeel tiŋki puee nì tin jítì abee ŋin kíǹee puee.