Read Ntcham 1 Chroniques 9 Bible Online

1 Chroniques 9 - Ntcham bible

1 Chroniques 9

¹Bi kàan̄ Isirayeel yab kɔkɔ nyɔkɔm ní ki ŋmàn̄ ki ŋá Isirayeel Bɔtiibi gbɔŋku poon ki nóó nì bi nín pēē pēē mmaal puee. Juuda yab fātì bi-boon ki tīī Unimbɔti ní Unimbɔti yāntì bi cáá-bi ki cūnnì kuyuŋu Babiloon tiŋkin.

²Bi nín dāa gítìń kuyuŋu púee, bi-kansikin bin nìn péé péé ki fātìi kāl̀ bi-timmu pu bi-tinjaŋŋi poonee di sá Isirayeel yab nì bisaraaŋaliibi nì Leefii yab nì kunimbɔtidiin tɔntɔnliibi.

³Juuda yab nì Beenjameen yab nì Eefiraayiim yab nì Manasee yab di nìn gítìń ki kāl̀ Jeerusaleem tiŋkin[18].

⁴Juuda naakookunee, Amiiwuudi jipɔɔn Utayii nìn bí. Amiiwuudi nìn sá Oomirii jipɔɔn nì Oomirii naantiiu nì Banii naantitɔntɔkɔl ní ki nìn sá Peereesi maaliŋun.

⁵Seera maaliŋunee, Asaaya nì u-jipɔmbi nìn bí. Asaaya nìn sá u-dicaŋkun ujipɔŋkpil.

⁶Seera maaliŋunee, Jeewuyeel nìn bí. Juuda yab bin nìn gítìń ki kāl̀ Jeerusaleem tiŋkinee nìn sá binib saalaa kpá alaataa aluli ní.

⁷Beenjameen naakookunee, Meesulam jipɔɔn Salu nìn bí. U nìn sá Oodafiya naantiiu nì Aseenuwa naantitɔntɔkɔl.

⁸Jeeroowaam jipɔɔn Ibineeya nì Usi jipɔɔn Eela nìn bí. Eela naanja di sá Miikirii. Seefatiya jipɔɔn Meesulam mun nìn bí. U-naanjab di sá Reewuyeel nì Ibineeya.

⁹Bin bí nee kɔkɔ nìn sá adican kpilib ní. Beenjameen yab bin nìn gítìń ki kāl̀ Jeerusaleem tiŋkinee nìn sá binib alaataa awa nì binib binaa kpá imuŋku ita ní.

¹⁰Bisaraaŋaliibi kansikinee, Yeedaya nì Yooyariib nì Jaakin nì

¹¹Asariya nìn bí. U-naanjab di nìn sá Ilikiya, Meesulam jipɔɔn nì Meesulam, Saadooki jipɔɔn nì Saadooki, Meerayooti jipɔɔn nì Meerayooti, Ayiituub jipɔɔn nì Ayiituub u-ba un nìn sá bin kpèé kunimbɔtidiiyee kpiliuee.

¹²Adaaya mun nìn bí. U-naanjab di sá Yeeroowaam nì Pasuur nì Maalkiya. Masayi mun nìn bí. U-naanjab di sá Adiyeel nì Jaseera nì Meesulam nì Meesileemiiti nì Imeer.

¹³Bisaraaŋaliibi yaa kútèe, adican kpilib gbanti nìn nyáń binib kutuku ubɔ nì alaataa aluli nì binib imuŋku ita ní. Bi-kɔkɔ nìn sá bibaatandambi ní ki nìn tūǹ kunimbɔtidiin ditundi.

¹⁴Leefii yab kansikinee, Seemaya nìn bí. U-naanjab di sá Asuub nì Asiirikam nì Asabiya nì Meerarii.

¹⁵Bakibakaar nì Eereesi nì Galaal nì Mataniya mun bí. Bi-naanjab di sá Sikirii nì Asaafi.

¹⁶Oobadiya mun nìn bí. U-naanjab di sá Seemaya nì Galaal nì Yeedutun. Beereekiya mun nìn bí. U-naanja di sá Asaa nì Eelkana un nìn kóò Neetoofa yab timbiliiki kibanee.

¹⁷Bipunyɔɔciitiliibi kansikinee, Saluum un sá ukpilee nì u-nabiyaamu Akuub nì Talmɔn nì Ayiiman nìn bí.

¹⁸Bi-naantiibi dáá gbíntìi cí kipunyɔkɔ kin bí ŋwìiń nyalaŋki pú, bi yíì-kì yii ubɔti punyɔkɔkee. Bi-naanjab di nìn sá Leefii yab naapaal punyɔɔciitiliibi.

¹⁹Saluum nìn sá Kooree jipɔɔn nì Abiyasafi naantiiu nì Kooree naantitɔntɔkɔl ní. U nì Kooree dicaŋkun yab bin kíǹee di nìn cí circir kɔŋkooŋŋu punyɔkɔki. Bi-naanjab di nìn cí ti-Dindaan nibul naapaal.

²⁰Njaminee, Eelasaar jipɔɔn Piinaasi di nìn sá bi-kpiliu, kun puee ti-Dindaan nìn bí u-cee.

²¹Meeseeleemiyawuu jipɔɔn Seekariya mun nìn sá dikpafindi tantiu ciitiliu ubɔ ní.

²²Binib bin bi nìn lēē bí nīn sá bipunyɔɔciitiliibee nìn sá binib alaataa ali nì saalaa nì bili ní. Bi nìn kàan̄-bi ki ŋmàn̄ bi-yiŋŋi ki ŋá ntimu mun poon bi nyánnée gbɔntin ní. Ubɔti Daafiidi nì Unimbɔti bɔnaatiliu Samiyeel di nìn dū ditundi gbanti ki ŋúbiǹ-bi bí nīn tūǹ kí nīn cáa cá jaanjaan.

²³Ní bi nì bi-naantiibi gbíntìi bí ki kpèé ti-Dindaan Diiku, ki cí ki-punyɔmmu.

²⁴Bipunyɔɔciitiliibi nìn bí ki cí mpunyɔmu naatil, an dàkà yii ŋgan pú nì ŋgiil pú nì ŋwìiń nyalaŋki pú nì ŋwìiń jeetilaŋki pú.

²⁵Bi-nabiyaamu mun nìn kóò ntimbilimunee nìn dòoń múlmul ki cīití kinyɔŋ kiba kiba.

²⁶Bipunyɔɔciitiliibi bikpilib naatil nìn pée bí niin ní. Bíǹ di sá Leefii yab bin cí Unimbɔti diiku dibiyaamu nì ku-gaajawantee.

²⁷Bi nìn màntīí tū kunimbɔtidii áli kutaa ń dāá wúntí, kun puee bi-tundi di nìn sá bí nīn cí-ku ní kí nīn pìitī ku-punyɔmmu kutaafaau kamaa.

²⁸Bipunyɔɔciitiliibi biba tundi di nìn sá bí nīn kpèé tiwan tin bi cáa ŋáań saraabee. Bi yaa nìn nyántì-tèe, bi nìn kàaǹ-tì ní ní bi yaa làá kɔ́ǹ-tèe, bí fàtīí kàaǹ-tì.

²⁹Bi-kansikin biba mun tundi di nìn sá bí nīn kpèé asambil ŋin kíǹee, nì circir wanti kɔkɔ, nì ŋyim nì ndamam nì ŋkpam nì talaalutuukaa nì talaaluyaaŋkaa.

³⁰Ama ní bisaraaŋaliibi di nìn bɔ́ntí tiwan tin bi ŋmàlintí ki cáa ŋáań talaalubee.

³¹Leefii yab kansikinee, Saluum un sá Kooree maaliŋunee jipɔŋkpiliu Matatiya tundi di nìn sá ú nīn pūul̀ ŋkpɔnɔbiyaamu mun bi cáa ŋáań saraabee.

³²Leefii yab bin sá Keeyaati maaliŋunee biba tundi di nìn sá bí nīn pūul̀ kpɔnɔb bin bi cáa ŋáań Unimbɔti saraa ŋwiŋŋuŋfikaa kamaayee.

³³Leefii yab dicaŋŋi kpilib bin nìn sá bilaŋgaaliibee bíǹ nìn bí bíǹ bi-ba diiŋŋin ní. Baa nìn gíti cáá ditundi diba ki kútì, kun puee bíǹ nìn pée bí ditundin ŋwiimpu nì kunyeeu ní.

³⁴Leefii yab kpilib dee, ki nóó nì bi nín pēē pēē mmaal puee. Bi nìn kóò Jeerusaleem tiŋkin ní.

³⁵Yeeyeel un náań Gabawɔn tiŋkee kóò Gabawɔn tiŋki gbantin ní, u nì u-nimpuu Maaka,

³⁶nì u-jipɔŋkpiliu Abidɔn nì u-jipɔmbi bin kíǹee, an dàkà yii Suur nì Kiisi nì Baal nì Neer nì Nadaab,

³⁷nì Geedɔɔr nì Ayiiyoo nì Seekariya nì Miikilooti.

³⁸Miikilooti di màl̄ Simeeyam. Ama bíǹ nìn kóò Jeerusaleem tiŋkin ní, bi nì bi-nabiyaamu.

³⁹Neer di màl̄ Kiisi, ní Kiisi màl̄ Saayuul, ní Saayuul màl̄ Joonatan nì Malkisuwa nì Abinadaab nì Eesbaal.

⁴⁰Joonatan jipɔɔn di sá Meeriibaal, ní Meeriibaal màl̄ Miika.

⁴¹Miika jipɔmbi di sá Piitɔn nì Meeleeki nì Tareeya.

⁴²Ayaasi di màl̄ Yaara, ní Yaara màl̄ Aleemeeti nì Asimafeeti nì Simrii, ní Simrii màl̄ Moosa,

⁴³ní Moosa màl̄ Biineeya, ní Biineeya màl̄ Reefaya, ní Reefaya màl̄ Eelaasa, ní Eelaasa màl̄ Aseel.

⁴⁴Aseel màl̄ mbininjabiyaamu muluu ní. Bi-yiŋŋi di sá Asiirikam nì Bookiru nì Isimaayeel nì Seeyariya nì Oobadiya nì Anan. Aseel jipɔmbi dee.