Read Ntcham 2 Chroniques 1 Bible Online

2 Chroniques 1 - Ntcham bible

2 Chroniques 1

¹Daafiidi jipɔɔn Saloomɔn nìn cúú u-beel pɔŋŋu ki báaǹ inyaan. Ti-Dindaan u-Nimbɔtiu nìn bí u-cee ní ki nìn yāntì u kpántì ubɔtikpaŋkpaan.

²Saloomɔn nìn sòon̄ nì Isirayeel yab kɔkɔ, cilinjee bijanjakpilib bin nìn sá bijanjaliibi kutuku kutuku kpilibee nì bin nìn sá dilaataal dilaataal kpilibee, nì bibɔsoonliibi nì Isirayeel tindaŋkpilib kɔkɔ, an dàkà yii adican kpilib.

³Saloomɔn nì binib bin nìn kóoǹ ki kpáfì u-cee gbantee nìn táá ki cūtì Circir paaŋŋu ŋun bí Gabawɔn tiŋkinee. Di sá yii niin ní Unimbɔti kpafindi tantiu un ti-Dindaan tɔntɔnliu Mooyiisi nìn ŋá kuteeunee nìn bí[1].

⁴Daafiidi nìn yōoǹ Unimbɔti Dakaau Kiiriyati-Yeeyariim[2] tiŋkin ki cáa cūnnì Jeerusaleem tiŋkin. U nìn dū-u ki síiǹ mpaan ŋun u nìn bɔ́ntèe pu, tanti poon.

⁵Ama ti-Dindaan circir kɔŋkooŋŋu nyɔkɔpu, Gabawɔn tiŋkin niin ní tasa saraafaŋŋu ŋun Uurii jipɔɔn, Uur naantiiu Beesaleel[3] nìn máńee bí. Niin ní Saloomɔn nì samaa nìn cūtì ki bālifì ti-Dindaan.

⁶Saloomɔn nìn jɔ́m̀ tasa saraafaŋŋu ŋun nìn bí ti-Dindaan nimbiin, dikpafindi tantiu nyɔkɔpuee ki ŋá bisaraawɔkaabi. U nìn kūū tiwaŋkuti kutuku ní ki dū ti-kɔkɔ ki wùn̄ ŋŋmi.

⁷Kunyeeu gbantee ní Unimbɔti lēē u-ba ki dàkā Saloomɔn ní ki bí-u yii: «Bàlifì kun ní a là ḿ tīī-see!»

⁸Ní Saloomɔn kíí Unimbɔti yii: «Ti-Dindaan, a dàkā m-baa Daafiidi kulaŋŋaŋfitiiu tikpil, ki yāntì kɔŋkɔnnee m kpántì ubɔti ki fōō u-yil.

⁹Ti-Dindaan Unimbɔti, a nín nìn pōoǹ m-baa Daafiidi puee, yàntī án ŋá míǹ. Di sá yii sii di dū-mi ki kāaǹ binib bin wīikí kii kitiŋ pu tam nee pu ubɔti[4].

¹⁰Tīī-mi iciin nì dinyil ḿ dūú kpòotī a-nibul. An yaa sá fám, ŋma di ŋūǹ kí kpòotī a-nibul dikpaandi nee?»

¹¹Ní Unimbɔti kíí Saloomɔn yii: «Aa bālifì tigaajati àá tigaajawan àá tinyool àá a-nannanliibi kúm, ní kaa bālifì mun yii ḿ tīī-si mmaŋfafɔkɔn. Ama a bālifì kí nīn cáá iciin nì dinyil kí ŋmā kí dūú kpòotī m-nibul din pu m kāaǹ-si dibeelee. A nín bālifì mimmee puee,

¹²m làá tīī-si iciin nì dinyil. M làá tīī-si tigaajati nì tigaajawan nì tinyool kí kūtì. A làá nīn cáá tíǹ gbanti kɔkɔ kí jītíǹ bibɔtiibi bin līntiǹ-see nì bin làá dāá páanní a-boonee.»

¹³Niinee Saloomɔn yíkì Circir Paaŋŋu ŋun bí Gabawɔn tiŋkin, laakin ti-Dindaan kpafindi tantiu nìn bée. U nìn fātìi gítì Jeerusaleem tiŋkin ní ki kāl̀ Isirayeel tiŋki pu dibeel.

¹⁴Saloomɔn nìn kóoǹ janjatɔrɔkub nì itaamu ki kpáfì. U nìn cáá janjatɔrɔkub kutuku ubɔ nì alaataa anaa, nì itaamu kutukub saalaa nì bili[5]. Tijanjawan gbanti tiba nìn bí ntimu mun poon ní ajanjanaapaa bée, ní tin kíǹee bí u-cee Jeerusaleem.

¹⁵Ubɔti nìn yāntì animbil nì sindaariya gbí Jeerusaleem tiŋkin kii ataŋkpeeyee[6], ní seedir dɔi wīikí kii Seefeelaa tiŋki sufii in bi yíì siikoomɔɔree.

¹⁶Saloomɔn taamui nìn nyēeń Eejipiti nì Siisilii timmun ní. Niin ní ubɔti nyampoobi nìn dāań-i[7].

¹⁷Bi yaa nìn cáań kujaau tɔrɔkuu Eejipiti tiŋkinee, u-nyampooku nìn sá animbil kúti jitɔmbi alaataa aluu ní, ní utaamu nyampooku sá animbil kúti jitɔmbi dilaataal nì imuŋku ili nì saalaa. Binyampoobi gbanti nìn cāabìń janjatɔrɔkub nì itaamu gbanti ki nyáfíǹ Eeti yab nì Siirii yab bɔtiibi mun.

¹⁸Saloomɔn nìn lēē yii u làá mā Kudii kí dūú sú ti-Dindaan, ní kí mā úǹ u-ba kubɔtinaakoou.