Read Ntcham 2 Chroniques 10 Bible Online

2 Chroniques 10 - Ntcham bible

2 Chroniques 10

¹Rooboowaam nìn cūtì Siikeem[39], di sá yii niin ní Isirayeel yab kɔkɔ nìn kóoǹ ki kpáfì kí kàan̄-u dibeel.

²Neebaati jipɔɔn Jeerooboowaam nìn dáá gbíntìi bíń Eejipiti tiŋkin, laakin u nìn sáǹ ubɔti Saloomɔn ki cūtìi kāl̀ee. U nín gbìl̄ Siikeem kooŋyi gbanti puee ní u yíkì Eejipiti tiŋkin ki dɔ́miń.

³Bi nìn tú binib bi cūtìi yíiń-u. U bāańee ní u nì Isirayeel beel samaau kɔkɔ cūtì Rooboowaam cee ki bí-u yii:

⁴«A-baa nìn túǹ-ti ditúndi din nyìm̀ee. Siiyee, ti là yii á bàtī-ti ditumpɔɔl din a-baa nìn yāntì ti túńee nì diwaŋgul din u nìn dūu nyīkiǹ ti-puee. A yaa ŋá míǹ ti kíí kí nīn sá a-tɔntɔnliibi.»

⁵Ní u kíí-bi yii: «Nín̄ cámaan, iwiin ita dalee ní fàtīí gítiń.» U lī mimmee ní samaa nín cá.

⁶Niinee ní ubɔti Rooboowaam bālifì bitindaŋkpilib bin nìn bí u-baa Saloomɔn tundin ŋyunti ŋun u nìn dáá bí dimaŋfalinee yii: «Ni sáŋkí-mi ḿ kíí binib nee yii ba?»

⁷Ní bikpilibee bí-u yii: «A yaa dàkā binib nee kulaŋŋaŋfitiiu ki ŋá bi nín là puee ní ki yaa kíí-bi kinyɔɔmɔɔyee, bi làá nīn sá a-tɔntɔnliibi kí nīn cá jaanjaan.»

⁸Ama ní Rooboowaam kaa dū bikpilibee saŋkii ki túń ditundi, ní ki yíiń binipɔmbi u nì bin jíń tinaacimpɔn dicilpu bi bí u-tundinee.

⁹U nìn bí bíǹ yii: «Nimbi fáà, ni sáŋkí-mi yii ba? Ḿ kíí binib bin bíi bàlifī-mi ḿ bàtī diwaŋgul din m-baa nìn dūu túǹ-bee nyiŋfiŋu pu yii ba?»

¹⁰Ní binipɔmbi u nì bin kpáfìi jíń tinaacimpɔnee kíí-u yii: «Kpèè a nín làá kíí binib bin dɔ́miń ki bí-si yii: <A-baa nìn túǹ-ti diwaŋgul din nyìm̀ee, siiyee bàtī di-nyiŋfiŋu pu kí tīī-ti> puee sɔ̀: <M-ŋambikpakpalii gbìfiǹ m-baa ŋal[40].

¹¹M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.>»

¹²Ŋwintataati dalee ní Jeerooboowaam nì samaa kɔkɔ dɔ́miń ki ká Rooboowaam kii úǹ u-ba nín nìn lī puee yii: «Fàtīí gítiḿmaan ŋwintataati dal kí ká-mi.»

¹³Bikpilib nín nìn sáŋkì u-bɔti puee, waa dūu túń ditundi, ní ki sòon̄ nì samaa an pɔ̄ɔ̄.

¹⁴Binipɔmbee nín sáŋkì-u puee, míǹ ní u dūu sòon̄ nì binibee. U nìn bí-bi yii: «M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.»

¹⁵Ubɔti kaa nìn pílifiǹ binibee, kun puee ti-Dindaan nín nìn bɔ́ntì míǹ kí ŋmā kí ŋá kii u nín nìn dī u-bɔnaatiliu usiilooja Ayiiya pu ki pōoǹ Neebaati jipɔɔn Jeerooboowaam puee ní[41].

¹⁶Isirayeel beelin yab nín ká yii ubɔti kaa bíi pílifíǹ-bee ní bi bí-u yii: «Ti nì Daafiidi cáá tilati? Ti nì Jeesee jipɔɔn kaa cáá mpèé ŋubɔɔ! Isirayeel yab, tí nīn gítímaan ti-tantibin! Kɔŋkɔnnee sii Daafiidi, nín̄ jīǹ a-dicaŋku pu dibeel[42]!» Bi lī mimmee ní báà ŋma nín gítí u-tantiun.

¹⁷Ama Isirayeel yab bin nìn kóò Juuda tiŋkinee baba pu ní Rooboowaam nìn nìkī ki jíń dibeel.

¹⁸Nì míǹ kɔkɔee, ubɔti Rooboowaam nìn dū Adooram[43] un kpèé diwɔ́bil tuuŋŋee ki tú Isirayeel yab cee, ama ní bíǹ yáŋkì-u ataŋkpee ki kūū. Niinee ní ubɔti Rooboowaam ŋá malaa ki jɔ́m̀ u-tɔrɔkuu poon ki sáǹ ki nín cá Jeerusaleem.

¹⁹Kí yòon̄ ŋwiin gbanti ní Isirayeel yab bin kóò ŋgan pú beelinee kíĺ ki jáà nì Daafiidi dicaŋku bɔtiibi. Kujaau gbanti bí ki dāa sāā díǹ.