Read Ntcham 2 Chroniques 11 Bible Online

2 Chroniques 11 - Ntcham bible

2 Chroniques 11

¹Ŋyunti ŋun Rooboowaam bàn̄ Jeerusaleemee ní u kóoǹ Juuda nì Beenjameen naakɔtin janjaliibi bibaamɔmbi kutukub dilaataal nì imuŋku inaa ki kpáfì kí cùú já nì Isirayeel yab, án nín làá ŋá pu úǹ Rooboowaam ń fàtīí fōō dibeelee.

²Ama ní ti-Dindaan bí u-bɔnaatiliu Seemaya yii:

³«Tùkù Juuda bɔtiu Rooboowaam, Saloomɔn jipɔɔn nì Juuda nì Beenjameen naakɔti yab nì samaa un kɔkɔ pée kíǹee yii:

⁴Ti-Dindaan nín sòon̄ puee sèé: <Naa máaǹ kí cùú já nì ni-nabiyaamu Isirayeel yab. Báà ŋma ń nīn gítí u-dumpu, di sá yii man di yāntì tin bíi jītí nee bāań.>» Niinee ní bi gbìl̄ ki tīī nì ti-Dindaan nyɔɔbundi ní ki yāntì kaa ti cūtìi jáń nì Jeerooboowaam.

⁵Rooboowaam nìn kóò Jeerusaleem tiŋkin ní ki máń agun ki tú Juuda timmu. Ntimu gbanti di sá:

⁶Beetileem nì Eetaam nì Teekoowa

⁷nì Beeti-Suur nì Sookoo nì Adulaam

⁸nì Gaati nì Mareeka nì Siifi

⁹nì Adoorayiim nì Lakiisi nì Aseeka

¹⁰nì Soora nì Ayalɔn nì Eebrɔn. Ntimu mun bi nìn máń agun ki tú gbantee nìn bí Juuda yab nì Beenjameen yab timmu poon ní.

¹¹An nìn sá agun ŋin pɔ̄ɔ̄ tiŋanee ní Rooboowaam nìn máń ki tú-mu. U nìn nyàab̄ gɔminab ki kāaǹ mu-pu, ní bi nìn kpáafí tijin nì ɔliifi kpam nì ndamam niin.

¹²Agbampɔɔ nì ŋkpamu nìn bí ntimu gbanti kɔkɔ poon. Míǹ ní u nìn ŋá ní ki ŋúń ki jíń Juuda nì Beenjameen timmu pu dibeel.

¹³Bisaraaŋaliibi nì Leefii yab nìn nyáń Isirayeel timmu kɔkɔn ki dɔ́miń ki páaǹ Rooboowaam boon.

¹⁴Leefii yab nìn yíkìi fá bi-timmu nì bi-kpaatanti ki nín cá Juuda beelin nì Jeerusaleem. Di sá yii Jeerooboowaam nì u-jipɔmbi kaa nìn pú-bi nsan bí nīn gbíntìi sá ti-Dindaan saraaŋaliibi.

¹⁵Jeerooboowaam nìn lēē úǹ u-ba saraaŋaliibi, ní bíǹ bí ŋgbantamu pu ki ŋáań saraabi ki tìì iŋɔjaa nì anabil ŋin u nìn máń ki síiǹee[44].

¹⁶Isirayeel beel naakɔti kɔkɔnee, binib bin nìn nyàab̀ ti-Dindaan, Isirayeel Nimbɔtiu nì bi-pɔbil kɔkɔee nìn táá Leefii yab ki dɔ́miń Jeerusaleem tiŋkin. Bi nìn là kí nīn ŋáań saraabi ki tìì ti-Dindaan, bi-naanjab Nimbɔtiu.

¹⁷Bíǹ nìn gíti kútì Juuda beel mpɔn ní ki nìn tútúǹ Saloomɔn jipɔɔn Rooboowaam abin ata. Di sá yii abin ata gbanti poonee, u nìn nóó Daafiidi nì Saloomɔn tabɔbiliŋ.

¹⁸Rooboowaam nìn cáá Maalaati. U-baa di nìn sá Daafiidi jipɔɔn Yeereemooti ní u-na sá Eeliyaab bisal Abiyayiil, Jeesee naantiiu.

¹⁹U nìn màl̄-u mbininjabiyaamu muta: Yeewusi nì Seemariya nì Sayam.

²⁰Boonee ní Rooboowaam cáá Abisaloom bisal Maaka. U nìn màl̄-u mbininjabiyaamu munaa: Abiiya nì Atayii nì Siisa nì Seeloomiiti[45].

²¹Rooboowaam nìn néeń Abisaloom bisal Maaka ki jítiǹ u-nimpoobi nì u-bɔntiibi bin kɔkɔ kíǹee. Di sá yii u nìn cáá binimpoobi saalku nì bita ní ki cáá bibɔntiibi imuŋku ita, ní ki màl̄ mbininjabiyaamu mmuŋku nì munii nì nnimpubiyaamu imuŋku ita.

²²Rooboowaam nìn dū Maaka jipɔɔn Abiiya ní ki kāaǹ u-mambi nì u-naalib kɔkɔ pu ukpil, di sá u nìn là yii úǹ ń dāá kpántí ubɔti ní.

²³U nìn ŋá iciin ní ki yāntì u-jipɔmbi bin kíǹee kɔkɔ yàl̄ ki tin bíń Juuda nì Beenjameen timmu mun bi nìn máń agun ki túee poon. U nìn tīī-bi tijin tikpil ní ki nyàab̄ binimpoobi kupaau ki tīī-bi.