Read Ntcham 2 Chroniques 12 Bible Online

2 Chroniques 12 - Ntcham bible

2 Chroniques 12

¹Ŋyunti ŋun Rooboowaam cúú u-beel pɔŋŋu ki báaǹ inyaanee ní u fātì u-boon ki tīī ti-Dindaan marau, ní u-samaau kɔkɔ mun ŋá míǹ mbaantiim.

²Rooboowaam nín kāl̀ dibeel dibiŋŋmooŋmootiil poonee ní Eejipiti bɔtiu Siisaaki dɔ́miń ki jáń nì Jeerusaleem, di sá yii baa nìn gíti yú nì ti-Dindaan deedee.

³Siisaaki nìn cáá janjatɔrɔkub kutuku ubɔ nì alaataa ali nì bitanjakaliibi kutukub imuŋku ita. Bijanjaliibi bin nìn nyánní Eejipiti tiŋkin ki táá-u ki dɔ́mińee kaa nìn cáá ŋkaan: Liibii yab nìn bí, ní Sukii yab bí ní Eetiiyoopii yab bí.

⁴U nìn jáń ki fōō Juuda timmu mun bi máń agun ki túee, ní ki nìkī ki dāa bāań áli Jeerusaleem.

⁵Siisaaki nìn tóobiń ní Rooboowaam nì Juuda kpilib kóoǹ ki kpáfì Jeerusaleem. Unimbɔti bɔnaatiliu Seemaya nìn cūtìi ká-bi ní ki bí-bi yii: «Ti-Dindaan nín sòon̄ puee sɔ̀: <Ni dū man ni-Dindaan ki fá! Too, ma mun dū-ni ki ŋá Siisaaki ŋaan.>»

⁶Isirayeel kpilibee nì ubɔti nìn lafun béè yii bi yīntì ní ki bí yii: «Ti-Dindaan cáá mbaamɔn.»

⁷Ti-Dindaan nín ká bi sīntì bi-ba taapuee, ní u tùkū Seemaya yii: «Bi nín béè bi-yìntitamee puee, maa làá kpɔ̀ kí céetí-bi. Ama an kaa ti làá yúntí, m làá fīī-bi, di sá yii maa làá dī Siisaaki pu ní kí yàntī m-ŋuul ń jēetí Jeerusaleem pu.

⁸Nì míǹ kɔkɔee, m làá yàntī bí kpántí u-tɔntɔnliibi. Niinee bi làá béé yii bi yaa sá man tɔntɔnliibi di sɔ́ɔɔ, bi yaa sá ntimu mubɔ bɔtiibi tɔntɔnliibi di sɔ́.»

⁹Eejipiti bɔtiu Siisaaki nìn jáń nì Jeerusaleem yab. U nìn yōoǹ tigaajawan tin bí ti-Dindaan Diikun nì kubɔtinaakoounee. U nìn pée yōoǹ kɔkɔ ní, ki kpáaǹ agbampɔɔ ŋin Saloomɔn nìn dū sindaariya ki mɔ́ɔ́yee kɔkɔ[46].

¹⁰Niinee ní ubɔti Rooboowaam dū tasa kúti ki mɔ́ɔ́ agbampɔɔ ki téeǹ ŋin bi yōoǹee yil pu, ní ki dū-ŋi ki ŋá bijanjaliibi bin cí ubɔti naakooku punyɔmmuee kpiliu ŋaan ú nīn kpèé.

¹¹Ubɔti yaa nìn pée yíkì ki kóò kunimbɔtidiinee, bijanjaliibi nìn yòontí agbampɔɔ gbanti ní ki līī, ní kí fàtīí gíiǹní-ŋi biciitiliibi diikun.

¹²Rooboowaam nín nìn sīntì u-ba taapu puee, ti-Dindaan nìn páatì u-ŋuul u-pu kaa nāaǹ-u kɔkɔ. Kí kūtì muee, tiwammɔntiil nìn dáá bí Juuda tiŋkin.

¹³Ubɔti Rooboowaam nìn kāl̀ Jeerusaleem ki ká mpɔn ki jíń dibeel. U nìn cáá abin imuŋku ili nì dibindi diba ní ki kpántì ubɔti. U nìn jíń Jeerusaleem, kitiŋ kin ti-Dindaan nìn lēē Isirayeel naakɔti kɔkɔ kansikin bí nīn jáaḿ-uee pu dibeel abin saalku nì ali. U-na nìn sá uamɔnnimpu ní bi yíì-u yii Naama.

¹⁴U nìn ŋá tin kaa kítì ti-Dindaan nimbiinee, di sá yii waa nìn dū u-pɔbil kɔkɔ ki nyàab̄ ti-Dindaan.

¹⁵Rooboowaam tuuŋŋi ŋin kíǹee, kí yòon̄ tin u péé ki ŋée nì tin u ŋá ki lúŋkèe, ŋmàn̄ ki kā Unimbɔti bɔnaatiliu Seemaya gbɔŋkun nì Idoo un wāĺee[47] gbɔŋkun. Kujaau nìn pée bí Rooboowaam nì Jeerooboowaam kansikin ní kaa gbèentí.

¹⁶Rooboowaam kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Abiiya di nìn fōō u-yil ki kpántì ubɔti.