Read Ntcham 2 Chroniques 13 Bible Online

2 Chroniques 13 - Ntcham bible

2 Chroniques 13

¹Jeerooboowaam nín kāl̀ Isirayeel beel pu dibeel abin saalku nì ata poonee ní Abiiya kpántì Juuda tiŋki bɔtiu.

²U nìn jíń dibeel Jeerusaleem abin ata ní. U-na nìn sá ugiibeeyaja Uriyeel bisal ní bi yíì-u yii Miikaya. Abiiya nì Jeerooboowaam nìn pée jáà ní kaa gbèentí.

³Abiiya nìn cūtì kí já nì Jeerooboowaam. U nìn yōoǹ bijanjaliibi bibaatandambi kutukub alaataa anaa, ní Jeerooboowaam mun yōoǹ bijanjaliibi bibaatandambi kutukub alaataa anii.

⁴Abiiya nìn jɔ́m̀ Seemarayiim jool din bí Eefiraayiim jooŋŋi puee ní ki bí yii: «Jeerooboowaam nì Isirayeel yab kɔkɔ, ní pīlifìmaan.

⁵Naa nyí yii ti-Dindaan, Isirayeel Nimbɔtiu dū Isirayeel beel ki tīī Daafiidi nì u-naantiibi ní ki nīn cáa cá jaanjaanaaa? An sá dipoondi din bí kaa kpìtēe ní.

⁶Ama Neebaati jipɔɔn Jeerooboowaam un nìn sá Daafiidi jipɔɔn Saloomɔn tɔntɔnliuee yíkì ki jáń nì u-kpiliu.

⁷Naayeekub nì binib bin kaa bí tibanee yíkìi páaǹ u-boon ki jáń ki pɔ́ɔkiǹ Saloomɔn jipɔɔn Rooboowaam. Rooboowaam mun nìn dáá sá kinaacimpɔmbiki, kaa nìn dáá nyí tiba ní kaa nìn ŋúń ki síl̀ bi-nimbiin.

⁸Too kɔŋkɔnnee, ni bíi lì yii ni làá já nì dibeel din ti-Dindaan dūu ŋá Daafiidi naantiibi ŋaanee. Tiŋman ni wīikí ní ki cáá sindaariya nabil din Jeerooboowaam mɔ́ɔ́ ki tīī-ni dí nīn sá ni-nimbɔtiuee[48].

⁹Ni jìn̄ ti-Dindaan saraaŋaliibi, Aarɔn naantiibi nì Leefii yab ni-kansikin. Ni lēē nimbi ni-ba bisaraaŋaliibi kii anibul ŋin kíǹee yab nín ŋáań puee. Ubɔ yaa cáań unaja nì iŋɔjaa ilulee, udaan kpáàa kpántì inimbɔti in kaa kpáàa sá Unimbɔtee saraaŋaliu dee.

¹⁰Ama timbee, ti-Dindaan di sá timbi Nimbɔtiu, ní taa dū-u ki fá. Bisaraaŋaliibi bin tūǹ ti-Dindaan tundee sá Aarɔn naantiibi ní, ní Leefii yab mun bí ki tūǹ bi-tundi.

¹¹Kutaafaau nì kujoou kamaayee, bi ŋáań bisaraawɔkaabi ní ki tùutī talaalub ki tìì ti-Dindaan. Bi pāantí kpɔnɔb bin bi dūu ŋá Unimbɔti saraayee circir teebiliu[49] pu, ní ki tùutī fitilab bin tɔ́kɔ́ sindaariya tɔ́kɔŋkaati puee kujoou kamaa. Di sá yii timbee, ti ŋúb́ ti-Dindaan ti-Nimbɔtiu nín bí yii tí ŋá puee ní. Ama nimbee, ni dū-u ki fá.

¹²Kɔŋkɔnnee, Unimbɔti u-ba di līī timbi nyɔkɔpu. U-saraaŋaliibi mun bí ki bɔ́ntì kí búń bi-yiŋyi ti kíĺ nì ni kujaau[50]. Míǹ puee Isirayeel yab, ní taa já nì ti-Dindaan, ni-naanjab Nimbɔtiu! Naa làá ŋmā kí já kí pɔ̄ɔkiǹ-u.»

¹³Ŋyunti gbantee, Jeerooboowaam nìn lēē u-janjaliibi biba bi cūtìi bál̀ Juuda yab janjaliibi boon pú kí túuǹ-bi. An ŋá mimmee ní Isirayeel janjaliibi biba bí Juuda yab nyɔkɔpu ní bin bál̀ee mun bí bi-boon pú.

¹⁴Juuda yab fātèe ní ki ká yii bi cáá kí jáǹ bijanjaliibi bin bí bi-nyɔkɔpuee nì bin bí bi-boon púee. Niinee ní bi kúuǹ ki yíiń ti-Dindaan, ní bisaraaŋaliibi búń iyin.

¹⁵Juuda yab nìn fáá ijanjakuŋkuunti. Ŋyunti ŋun bi bíi kūuntí mimmee ní Unimbɔti yāntì Abiiya nì Juuda yab jáń ki pɔ́ɔkiǹ Jeerooboowaam nì Isirayeel yab kɔkɔ.

¹⁶Isirayeel yab nìn sáǹ Juuda yab nimbiin ní Unimbɔti dū-bi ki ŋá Juuda yab ŋaan.

¹⁷Abiiya nì u-janjaliibi nìn jáń ki pɔ́ɔkiǹ Isirayeel janjaliibi sɔ́kɔ sɔkɔ. Bi nìn kūū bi-janjaliibi bibaatandambi kutukub alaataa aŋmoo.

¹⁸Ŋwiin gbantee, bi nìn nàn̄ Isirayeel yab dúsi dusi, ama Juuda yab bíǹ nìn ká dijajil, di sá yii bi nìn dū bi-mákal ki páaǹ ti-Dindaan, bi-naanjab Nimbɔtiu pu.

¹⁹Abiiya nìn kùl̄ ki páaǹ Jeerooboowaam boon. U nìn jáń ki fōō u-cee Beeteel nì Yeesana Eefrɔn timmu nì ntimbilimu mun pìl̄-muee.

²⁰Ŋyunti ŋun Abiiya sá ubɔtee, Jeerooboowaam kaa nìn gíti ká mpɔn. An dāa kúntèe ní ti-Dindaan fáá-u ní u kpíì.

²¹Ama Abiiya úǹ nìn mɔ̄tìi ká mpɔn. U nìn cáá binimpoobi ubɔ kpá saalku ní ki cáá jipɔmbi mmuŋku nì bili nì bisalib saalku nì ubɔ.

²²Abiiya tuuŋŋi ŋin u túńee, tin kɔkɔ u ŋée nì tin u lēe ŋmàn̄ ki kā Unimbɔti bɔnaatiliu Idoo gbɔŋkun.

²³Abiiya kpíì[51] ki cūtìi ŋàl̄ u-baabee ní bi síb́-u Daafiidi Tiŋkin. U-jipɔɔn Asaa di fōō u-yil ki kpántì ubɔti. Asaa nín kāl̀ dibeel puee, ŋgbansɔŋfi nìn dɔ́miń Juuda tiŋki pu ki cáa sāā abin saalaa.