Read Ntcham 2 Chroniques 14 Bible Online

2 Chroniques 14 - Ntcham bible

2 Chroniques 14

¹Asaa nìn ŋá tin fáatiǹ ti-Dindaan u-Nimbɔtiuee.

²U nìn kúntì awaa saraafaŋyi iwaatootipaan pu. U nìn wīil̀ ataŋkpawaa ŋin bi nìn cóoǹ ki tòotēe ki gāatì iwindɔ ki fá.

³U nìn kpáafì Juuda yab yii bí nyàab̀ ti-Dindaan, bi-baabi Nimbɔtiu, kí nīn tɔ́ u-bɔkpaaŋi nì u-marab.

⁴U nìn kúntì iwaatootipaan nì isaraafan in pu bi nìn tùutī talaalubee Juuda timmu kɔkɔn. An puee, u-beel yuntiŋuee, Juuda beel nìn bí ŋgbansɔŋfin ní.

⁵U nìn máń agun ki tú Juuda timmu, di sá yii ŋgbansɔŋfi nìn bí. Abin gbanti poonee, ubɔ kaa nìn dɔ́miń ki jáń nì u, di sá yii ti-Dindaan di nìn tīī-u diŋuŋfil.

⁶U nìn bí Juuda yab yii: «Yàntīmaan tí mā agun kí tū ntimu nee. Tí mā sintil difɔkɔŋi, kí kpáá punuubi bí nīn cáá tikpàlkaal, ŋyunti ŋun ní kitiŋ nee dáá sá ti-yakee. Di sá yii ti yúl̀ ti-Dindaan ti-Nimbɔtiu deedee, ní ti-deedeeu puee, u tīī-ti diŋuŋfil ijaan kɔkɔ pu.» Bi nìn ŋúń ki máń agun ki tú ntimu gbanti.

⁷Juuda naakookunee, Asaa nìn cáá bijanjaliibi kutukub alaataa ata, bi ŋúb̀ agbampɔɔ akpaan nì ŋkpamu. U nìn cáá Beenjameen naakookun bijanjaliibi kutukub alaataa ali nì imuŋku inaa, bi ŋúb̀ agbampɔɔ ŋwaamu ki ŋūǹ ki tòó itɔfi. Bíǹ gbanti kɔkɔ nìn sá bibaatandambi ní.

⁸Ueetiiyoopiija Seera nìn cáań bijanjaliibi miiliyɔn ubɔ nì janjatɔrɔkub alaataa ata kí já nì bi. U nìn ŋúń ki bāań áli Mareesa tiŋkin.

⁹Asaa nìn nyáń kí jáǹ-u. U nì u-janjaliibi kɔkɔ nìn tātìi gbāaǹ kí kíĺ dikɔ̀ndi Seefata tantakalin, Mareesa caŋin.

¹⁰Asaa nìn kúuǹ ki yíiń ti-Dindaan u-Nimbɔtiu. U nìn lī yii: «Ti-Dindaan, sii baba di ŋūǹ kí tūtuǹ uwɔfi ki tí ŋūǹ kí tūtuǹ upɔɔl mun. Dāá tūtuǹ-ti, ti-Dindaan ti-Nimbɔtiu. Di sá yii sii pu ní ti máká. A-yindi pu ní ti dòoń kí já nì dijanjakitikpaandi nee. Ti-Dindaan, sii di sá ti-Nimbɔtiu. Taa yàntī unil ń já kí pɔ̄ɔkiǹ-si.»

¹¹Ti-Dindaan nìn yāntì Asaa nì Juuda yab jáń ki pɔ́ɔkiǹ Eetiiyoopii yab. Bi nìn sáǹ

¹²ní Asaa nì u-janjaliibi jìn̄-bi áli Geeraar tiŋki. Bi nìn kūū Eetiiyoopii yab tikpil áli ki dāa kūū ki céetì-bi múb, ubɔ kaa kíǹ. Di sá yii ti-Dindaan nì u-janjaliibi di nìn nàn̄-bi. Juuda yab nìn kóoǹ bi-gaajawanti tikpil.

¹³Bi nìn jáń ki fōō ntimu mun kɔkɔ nìn bí ki pìlīǹ Geeraar tiŋkee. Di sá yii ti-Dindaan nìn yāntì dinyoondi kɔ́-bi. Juuda yab nìn fúkúl̀ ntimu gbanti kɔkɔ yab wanti, kun puee tigaajawan tikpil nìn bí niin bí fūkul̀.

¹⁴Bi nìn gāatì bipikpaaliibi naabakati ní ki nìn kóoǹ bi-piii nì bi-gutaamui tikpil. Bi ŋá míǹ ki dóòyee ní ki nín gítí Jeerusaleem.