Read Ntcham 2 Chroniques 15 Bible Online

2 Chroniques 15 - Ntcham bible

2 Chroniques 15

¹Unimbɔti Fam nìn kpákatì Oodeedi jipɔɔn Asariyawuu pu.

²U nìn cūtìi túŋkì Asaa ní ki bí-u yii: «Asaa nì Juuda nì Beenjameen yab kɔkɔ, ní pīlifìmaan-mi! Ni yaa bí ti-Dindaan ceeyee, u mun bí ni-cee ní. Ni yaa nyàab̄-uee, u làá yàntī ní ká-u, ama ni yaa dū-u ki fée, see u mun ń dū-ni kí fá.

³Isirayeel yab nìn dū iyunti tikpil ki kāl̀ ibaamɔn Nimbɔtiu kpá bi-ceeyaaa, usaraaŋal ubɔ kpá kí dàkà-baaa, ní mara ubɔ mun nìn kpá.

⁴Ama bi-nimbinaamandi poonee, bi fātìi gítìń ti-Dindaan Isirayeel Nimbɔtiu cee, ki nyàab̄-u, ní úǹ yāntì bi ká-u.

⁵Ŋyunti gbantee, unil kaa nìn ŋūǹ kí nyā kí fàtīí kɔ́nní nì ŋgbansɔŋfi, di sá yii kitiŋ kamaa pu nib nìn bí dinyoondin ní.

⁶Ditimbundi diba nìn jáà nì di-juti, ní kitiŋ kiba jáà nì ki-juti, di sá yii Unimbɔti di nìn cáań animbinaaman gbanti kɔkɔ nì ŋi-bulifi ki tɔ́ bi-pu.

⁷Ama nimbee, ní nīn ŋúb́ an píkí, ni-wunti ń taa yɔ̀tī. Di sá yii ni-tundi dāa cáá tipaal.»

⁸Ŋyunti ŋun Unimbɔti bɔnaatiliu Asariyawuu, Oodeedi jipɔɔn dū tibɔti gbanti ki nāatì Asaayee, ní u ká kunyannyaau. U nìn kúntì awaa ŋin kɔkɔ nìn bí Juuda nì Beenjameen timmunee. U nìn kúntì ŋin mun nìn bí ntimu mun u nìn jáń ki fōō Eefiraayiim jooŋŋi puee. U nìn ŋáŋkì ti-Dindaan saraafaŋŋu ŋun nìn bí kunimbɔtidii nyɔkɔpuee.

⁹U nìn kóoǹ Juuda yab nì Beenjameen yab kɔkɔ nì Isirayeel yab bin nìn nyánní Eefiraayiim nì Manasee nì Simeeyɔn naakɔtin ki dɔ́mińee ki kpáfì. Di sá yii Isirayeel yab tikpil nìn dɔ́miń ki páaǹ u-boon ŋyunti ŋun ní bi ká yii ti-Dindaan u-Nimbɔtiu bí u-ceeyee.

¹⁰Asaa nín jíń dibeel abin saalku ŋmatataatiu poonee, ní bi kóoǹ ki kpáfì Jeerusaleem.

¹¹Yaadal wiiŋŋuee, bi nìn lēē tiwaŋkuti tin bi nìn fúkúl̀ bi-nannanliibi ceeyee poon inaa alaataa aluli nì ipii kutukub biluli ki ŋá ti-Dindaan saraa.

¹²Bi nìn pōoǹ kí nyàab̀ ti-Dindaan, bi-naanjab Nimbɔtiu nì bi-pɔbiliŋ kɔkɔ nì bi-nammu kɔkɔ.

¹³Bi nìn pōoǹ yii kibikeeee, unikpaaneeee, uninjeeee, unimpueeee, un kamaa yaa kaa nyàab̄ ti-Dindaan, Isirayeel Nimbɔtiuee, bí kpɔ̀-u.

¹⁴Ní bi téeń mpɔn ki fáá iwiliili, ní ki búń akantán nì iyin ki pūtì ki pōoǹ ti-Dindaan.

¹⁵Juuda yab kɔkɔ nìn bí mmɔnni, kun puee bi nìn pūtì ki pōoǹ nì bi-pɔbiliŋ kɔkɔ ní. Bi nìn lēē bi-ban kí nyàab̀ ti-Dindaan, ní ti-Dindaan mun nìn yāntì bi ká-u. Ti-Dindaan nìn tīī-bi ŋgbansɔŋfi ijaan kɔkɔ pu.

¹⁶Ubɔti Asaa nìn lēē u-naan Maaka[52] tinimpubɔtiilin, kun puee u nìn kpítì diwaal ki nántiǹ ntimbiil waal Aseera. Asaa nìn gāā diwaalee ki lúkú, ní ki càkā càkā-dì ki dūu tɔ́ ŋŋmin Seedrɔn tantakalin.

¹⁷Ama ŋgbantamu pu waatootipaaŋyi kaa nìn kúntì Isirayeel tiŋkin. Nì míǹ kɔkɔee, Asaa pɔbil nìn bí diba nì ti-Dindaan ní u-maŋfal wiiŋyi kɔkɔ poon.

¹⁸U nìn cáań animbil nì sindaariya nì tiwan tin kɔkɔ u-baa nì úǹ u-ba nìn dūu sú Unimbɔtee ki síiǹ kunimbɔtidiin.

¹⁹Asaa nín jíń dibeel ki cáá sāā abin aŋmoo kpá imuŋku ili poonee, baa ti gbìl̄ kujaau pu[53].