Read Ntcham 2 Chroniques 16 Bible Online

2 Chroniques 16 - Ntcham bible

2 Chroniques 16

¹Asaa nín jíń dibeel abin anaa kpá imuŋku ili poonee ní Isirayeel bɔtiu Bayeesa dɔ́miń kí já nì Juuda tiŋki. U bāańee ní ki máń digundi ki tú Raama[54] timbiliiki kí pìin̄ Juuda bɔtiu Asaa nsan.

²Niinee ní Asaa lēē animbil nì sindaariya un nìn bí kunimbɔtidii nimbikpaafidiikun nì ubɔti nimbikpaafidiikunee ki tīī u-tɔntɔnliibi bí cáá cùnnì Damaasi kí tīī Siirii bɔtiu Been-Adaadi, kí tùkù-u yii:

³«Yàntī mpèé ń nīn bí man nì sii kansikin kii an nín nìn bí man baa nì sii baa kansikin puee. Kpèè animbil nì sindaariya ní m tú bí cáań kí tīī-si nee. Míǹ puee cùú kpìtī mpèé ŋun bí si nì Isirayeel bɔtiu Bayeesa kansikinee ú taa ti dāan̄ kí já nì mi.»

⁴Been-Adaadi nìn gbìl̄ ki tīī nì ubɔti Asaa ní ki dū u-janjakpilib ki tú bi cūtìi jáń nì Isirayeel timmu. Bi nìn jáń ki fōō Iyɔn nì Daani nì Abeel-Mayiim-Maaka timmu nì Neefitalii naakookun timmu mun kɔkɔ poon bi nìn sīintí tijinee.

⁵Bayeesa nín gbìl̄ tibɔti gbantee ní u gbēeǹ kaa ti bíi māā Raama timbiliiki gundi.

⁶Niinee ní ubɔti Asaa yōoǹ Juuda yab kɔkɔ ní bi cūtìi kóoǹ ataŋkpee nì idɔ in Bayeesa nìn cáa bíi māā Raama gundee ki cáań. Ubɔti Asaa nìn dūu máń digundi ki tú Geeba nì Miisipa timmu[55].

⁷Ŋyunti gbantee ní Unimbɔti bɔnaatiliu Ananii dɔ́miń ki ká Juuda bɔtiu Asaa ní ki bí-u yii: «An nín bàà sá á nyàab̀ dijòońdi ti-Dindaan a-Nimbɔtiu ceeyee, a cūtìi nyàab̄ dijòońdi Siirii bɔtiu cee. A nín ŋá mimmee puee, Siirii bɔtiu janjaliibi ŋmátìi nyáń a-ŋaan.

⁸Eetiiyoopii yab nì Liibii yab janjaliibi nì bi-tɔrɔkub nì bi-tanjakaliibi nìn wīikí ní tikpil tikpil. Ama nì míǹ kɔkɔee, a nín nìn dū a-mákal ki páaǹ ti-Dindaan puee, u nìn dū-bi ki ŋá a-ŋaan.

⁹Di sá yii ti-Dindaan nimbiliŋ làaǹ kitiŋ kɔkɔ pu kí tíkiń bin néeń-u nì bi-pɔbiliŋ kɔkɔee ní. Min bí neeyee, a ŋá kii ugbaanee, ní kí yòon̄ kɔŋkɔnnee kí nīn cée, kujaau poon ní a làá nīn kíǹ ki bí.»

¹⁰Asaa nìn gíí Unimbɔti bɔnaatiliu pu diŋuul ní ki cúú-u ki pīiǹ kudii. Di sá yii tin Ananii nìn sòon̄ee nìn yāntì u gíí diŋuul ŋkpitim pu. Ŋyunti gbanti ní Asaa kíĺ ki kíǹ ki wɔ́b́ samaa kansikin binib biba.

¹¹Atuun ŋin kɔkɔ Asaa túńee kí yòon̄ apeekaa kí cáá sāā aluŋkikaayee ŋmàn̄ ki kā Juuda bɔtiibi nì Isirayeel bɔtiibi tuuŋŋi gbɔntin.

¹²Asaa nín jíń dibeel dibindi diba kpá imuŋku ili poonee ní u búŋkì ní u-taaŋi dūu fàl̄. Ama u-weeŋyi gbanti poonee, waa nìn nyàab̄ ti-Dindaan jòońdi, see binyɔɔdambi.

¹³U nín jíń dibeel abin imuŋku ili nì awee, ní u kpíì ki cūtìi ŋàl̄ u-baabi.

¹⁴Bi nìn síb́-u dikaakul din úǹ u-ba yāntì bi gbìn̄ Daafiidi Tiŋkinee poon ní. Bi nìn bɔ́ntì talaalub ki páaǹ kilambaŋ kin pu bi dū-u ki bíl̀ee, ní ki nyàab̄ ikpafi in sɔ́fèe ki ŋmītì u-wunti an taa sūū. Bi nìn tūū talaalub tikpil ki tīī-u tinyool.