Read Ntcham 2 Chroniques 17 Bible Online

2 Chroniques 17 - Ntcham bible

2 Chroniques 17

¹Asaa jipɔɔn Joosafaati fōō u-yil ki kpántì ubɔti. U nìn bɔ́ntì u-janjaliibi kí ŋmā kí jáǹ Isirayeel beel.

²U nìn dū bijanjaliibi ki síiǹ Juuda timmu mun bi nìn máń agun ki túee kɔkɔ poon, ní ki nìn kāaǹ gɔmina Juuda nì Eefiraayiim timmu mun u-baa nìn jáń ki fōōyee.

³Ti-Dindaan nìn bí Joosafaati cee. Di sá yii u-naanja Daafiidi nín nìn dī nsan ŋun mpeepeekaamee ní u nìn nóó. Waa nìn jáam̀ diwaal Baal.

⁴Ama u nìn nyàab̄ ti-Dindaan, u-baa Nimbɔtiu, ní ki nìn tɔ́ u-marab. U nìn fātì u-boon ki tīī Isirayeel beel yab ŋáaǹtam.

⁵Ti-Dindaan nìn tīī Joosafaati beel mpɔn ní Juuda yab kɔkɔ nìn cāabìń tiwan ki pūǹ-u. U nìn dūu kpántì ugaajakpaan ki ká tinyool tikpil.

⁶U nìn dū u-pɔbil kɔkɔ ki tīī ki nóó ti-Dindaan, ní ki nìn kúntì iwaatootipaan in pu bi nìn tòotī awaayee nì diwaal Aseera ŋgbantamu puee nì iwindɔ Juuda tiŋkin.

⁷U nín jíń dibeel dibintataatiil poonee ní u lēē u-kàliŋkpaambi biba ki tú Juuda timmun bí cùú dàkà niin yab. Bin u nìn lēē ki túee di sá Been-Ayiil nì Oobadiya nì Seekariyawuu nì Neetaneeyeel nì Miikayawuu.

⁸U nìn yāntì Leefii yab biba céeǹ-bi. Bíǹ di sá Seemayawuu nì Neetaniyawuu nì Seebadiyawuu nì Asayeel nì Seemiiramooti nì Yoonatan nì Adooniyasi nì Toobiyawuu nì Toob-Adooniya. Bisaraaŋaliibi bili biba mun nìn kútì bi-pu, bíǹ di sá Eeliisama nì Yooram.

⁹Bi nìn yōoǹ ti-Dindaan Marau gbɔŋku ní ki yìin̄ Juuda timmu kɔkɔn ki dàkā mu-nib ti-Dindaan marau.

¹⁰Abee ŋin nìn bí ki māntìi tú Juuda tiŋkee nìn fāŋkì ti-Dindaan, ní báà ubɔ kaa nìn kíikí kí jáǹ Joosafaati.

¹¹Fiiliistii yab gba nìn cāabìń tiwampɔkaal nì animbil nì patantib ki tìì Joosafaati. Bilaalibub mun nìn cāabìń tiwaŋkuti ki pūǹ-u. Bi nìn cáań ipijaa kutukub biluli nì alaataa aluli nì iŋɔjaa kutukub biluli.

¹²Joosafaati nìn mɔ̀tīi kāntí mpɔn ní ki cá. U nìn máń agun ki māntìi tú ntimu mubɔ, ní ki nìn máń mubɔ mun poon adiin bí nīn kpáafí tijin.

¹³U nìn kpáafì tijin tikpil tikpil Juuda timmun. U nìn dū bijanjaliibi bin sá bibaatandambee ki kāaǹ Jeerusaleem tiŋkin ní.

¹⁴U nìn yākatì bijanjaliibi gbanti akiti akiti ki nóó nì bi-dicaŋŋi. Juuda naakookunee, bin nìn kpòotī bijanjaliibi kutukub kutukubee sɔ̀. Ujanjakpil Adina nìn kpòotī bijanjaliibi bin sá bibaatandambee kutukub alaataa ata,

¹⁵ní un dī-uee di sá ujanjakpil Yoowanan. Úǹ nìn kpòotī bijanjaliibi kutukub alaataa ali nì imuŋku inaa.

¹⁶Utataati di sá Sikirii jipɔɔn Amaseeyaawuu. Úǹ nìn dū u-ba ki tīī kí tɔ̄ ti-Dindaan tundi. U nìn kpòotī bijanjaliibi kutukub alaataa ali ní.

¹⁷Beenjameen naakookunee, ubaatandaan ubɔ nìn bí bi yíì-u Eeliyadaa. Úǹ di nìn kpòotī bijanjaliibi bin jáà nì abaatan nì agbampɔɔyee binib kutukub alaataa ali.

¹⁸Un nìn dī-uee di sá Yoosabaadi. Úǹ nìn kpòotī bijanjaliibi bin bɔ́ntì kí cù dikɔ̀ndee binib kutukub dilaataal nì imuŋku ili ní.

¹⁹Bijanjaliibi bin nìn bí ubɔti tundin Jeerusaleemee dee. Bijanjaliibi bin ubɔti nìn dūu kāaǹ Juuda timmu mun bi máń agun ki túee poon kaa kútì.