Read Ntcham 2 Chroniques 18 Bible Online

2 Chroniques 18 - Ntcham bible

2 Chroniques 18

¹Joosafaati nìn ká tigaajati nì tinyool tikpil. U nìn yāntì u-dicaŋkun niliu ubɔ cáá Isirayeel bɔtiu Akaab dicaŋkun biki kiba.

²Abin aba boonee ní Joosafaati cūtìi māntì Akaab pu Samaarii tiŋkin. Akaab nìn kūū ipii nì inaa kupaau ki fōō u nì bin céeǹní-uee kucaŋu. U nìn páb́-u yii ú kūtì u-pu bí cùú já nì Ramooti tiŋki kin bí Galaadee[56].

³Isirayeel bɔtiu Akaab nìn bí Juuda bɔtiu Joosafaati yii: «A làá céeǹ-mi ḿ cùú já kí fōō Ramooti tiŋki kin bí Galaadi tiŋkpaaŋkineeee?» Ní Joosafaati kíí Isirayeel bɔtiu yii: «Man nì si sá unibaanti ní. A-nibul sá m-nibul ní. Ti làá kūtì a-pu tí cù kujaau.»

⁴Ama ní Joosafaati gíti kútì ki lī yii: «Tí bàlifì ti-Dindaan kí wàatī.»

⁵Niinee ní Isirayeel bɔtiu kóoǹ u-bɔnaatiliibi[57] ki kpáfì. Bi nìn bí binib alaataa anaa nyɔkɔm ní ubɔti bālifì-bi yii: «Tí cùú já kí fōō Ramooti tiŋki kin bí Galaadi tiŋkpaaŋkeeyaaa, tí taa cù?» Ní bíǹ kíí-u yii: «Nín̄ cá! Ti-Dindaan dū-kì ki ŋá a-ŋaan.»

⁶Ama ní Joosafaati gíti bālifì yii: «Mimmee báà ti-Dindaan bɔnaatiliu ubɔ gíti kpá doo tí ŋmā kí cù u-cee kí bàlifì kí béé ti-Dindaan nín sòon̄ pueeee?»

⁷Ní Isirayeel bɔtiu kíí Joosafaati yii: «Ubɔ gíti bí un pu ti ŋūǹ kí bàlifì kí béé ti-Dindaan nín sòon̄ puee, ama maa là u-bɔti, di sá yii tin kaa ŋān̄ee ŋma ní u nàatī-mi, waa nàatī-mi tin ŋān̄ee dalba dalba. Úǹ di sá Yiimila jipɔɔn Miisee.» Ní Joosafaati bí yii: «Taa sòoǹ míǹ!»

⁸Niinee ní Isirayeel bɔtiu yíiń u-kàlinjau ubɔ ní ki bí-u yii: «Cùú cáań Yiimila jipɔɔn Miika doo malaa!»

⁹Isirayeel bɔtiu nì Juuda bɔtiu Joosafaati nìn kā báà ŋma u-beejal pu Samaarii tiŋki punyɔkɔki caŋin ki pēē bi-beebɔkutiŋ. Bibɔnaatiliibi kɔkɔ nìn bí ki nàatī tibɔti bi-nimbiin.

¹⁰Keenaana jipɔɔn Siideekiyawuu nìn dū tikúti ki mɔ́ɔ́ ŋyin. U nìn bí yii: «Ti-Dindaan nín sòon̄ puee sèé: <Nì ŋyin nee ní a làá dūú jáǹ Siirii yab kí céetí-bi múb.>»

¹¹Bibɔnaatiliibi bin kɔkɔ nìn kíǹee nìn pée sòoǹ tibɔbaantiil ní ki lì yii: «A ŋūǹ kí cùú já kí fōō Ramooti tiŋki kin bí Galaadi tiŋkpaaŋkinee. A làá já kí pɔ̄ɔkiǹ-kì, ti-Dindaan làá dū-kì kí ŋá a-ŋaan.»

¹²Un bi tú ú cùú yíiń Miikayee bàn̄ee ní ki bí-u yii: «Kpèè, Unimbɔti bɔnaatiliibi kɔkɔ ŋá kinyɔɔbaantii ki sòoǹ ki nàatī ubɔti tiŋan ŋma ní. Si mun yaa bàn̄ee, á sòoǹ kí nàatī ubɔti tin ŋān̄ee ŋma kii bin béeyee.»

¹³Ama ní Miika kíí-u yii: «Nì ti-Dindaan un bí dimaŋfalin nee puee, tin ti-Dindaan yaa tīī-mi ḿ nàatēe, tíǹ ní m làá nàatī.»

¹⁴U bāań ubɔti ceeyee ní ubɔti bālifì-u yii: «Miika, tí cùú já kí fōō Ramooti tiŋki kin bí Galaadi tiŋkpaaŋkineeyaaa, tí taa cù?» Ní Miika kíí-u yii: «Nín̄ cá! A làá já kí fōō-kì! Ti-Dindaan dū kitiŋ gbanti ki ŋá a-ŋaan.»

¹⁵Ama ní ubɔti gíti bí-u yii: «Ŋfunyɔm miŋa ní m máaǹ kí yàntī á pùtī kí tùkù-mi ibaamɔn ti-Dindaan yindi pu ní á nín tùkù-mi ní?»

¹⁶Niinee ní Miika bí yii: «M ká Isirayeel nibul yàl̄ ki gbí ajoon pu kii ipii in kaa cáá ukpaalee[58] Ní ti-Dindaan bí yii: <Baa ti cáá ukpil. Báà ŋma ń nīn gítí u-dumpu nì ŋgbansɔŋfi.>»

¹⁷Ní Isirayeel bɔtiu bí Joosafaati yii: «M bàà tùkū-si yii bee! Waa pée nàatī tin ŋān̄ee kí tīī-mi, see tikpitil!»

¹⁸Ama ní Miika gíti bí-u yii: «Too! Pīlifì tin ti-Dindaan sòon̄ee. M ká ti-Dindaan kā u-beejal pu ní yilpu janjaliibi yú ki kɔ́ĺ-u, biba yú u-ŋaŋgiil pú ní bin kíǹee yú u-ŋaŋgan pú.

¹⁹Ní ti-Dindaan bí yii: <Ŋma ní m làá nín ká ú cùú ŋmàtiǹ Akaab kí yàntī ú cùú já nì Ramooti tiŋki kin bí Galaadi tiŋkpaaŋkinee bí kpɔ̀-u ní?> Niinee ní ubɔ ń bí yii tina, ní un kíǹee ń bí yii tina.

²⁰An ŋá mimmee ní ŋfam miba dɔ́miń ki síl̀ ti-Dindaan nimbiin ní ki bí yii: <Man di làá cù kí ŋmàtiǹ-u.> Ní ti-Dindaan bālifì-mì yii: <A làá ŋá mana ní?>

²¹Ní mì kíí yii: <M làá cù kí kɔ́ bibɔnaatiliibi kɔkɔn ní kí yàntī bí sòoǹ tinyimɔmbɔti kí tùkù ubɔti.> Ní ti-Dindaan bí-mì yii: <A làá cùú ŋmàtiǹ-u ní m nyí yii a làá ŋmā. Nín̄ cá kí ŋá míǹ.>

²²Ti-Dindaan yaa lafun dū nnyimɔn fam ki ŋá a-bɔnaatiliibi kɔkɔ nyɔmmunee, á béé yii u là dinimbinaamandi ń jēetí a-pu ní.»

²³Niinee ní Keenaana jipɔɔn Siideekiyawuu sútì ki pìl̄ Miika ní ki fáá-u ntampa ki lī yii: «La pú ní ti-Dindaan Fam nyáń m-ni ki cūtìi bíi sòoǹ nì si?»

²⁴Ní Miika kíí yii: «Tiŋman, ŋwiin ŋun ní a yaa láa sáń ki póotí adiin ki bāal̀ee, a làá dāá gbìl̄ taapu.»

²⁵Niinee ní Isirayeel bɔtiu tīī mara yii: «Ní cúúmaan Miika kí cùnnì kí tīī Amɔn tiŋki kɔmandaŋwu nì ubɔti jipɔɔn Yoowasi,

²⁶ní kí tùkù-bi yii: <Man ubɔti di bí yii, ní dū kijapaai nee kí tɔ̄ sarka. Ní tīī-u tijin ŋwaam pu nì nnyim kí nīn cí ŋyunti ŋun m làá fàtīí gítiń nì ŋgbansɔŋfee.>»

²⁷Ní Miika bí-u yii: «A yaa fātìi gítìń nì laafiyee, mimmee ti-Dindaan kaa dī m-pu ki sòon̄ dee.» Ní u gíti kútì yii: «Nimbi samaa kɔkɔ, pīlifìmaan[59]!»

²⁸Isirayeel bɔtiu Akaab nì Juuda bɔtiu Joosafaati nín cá kí já nì Ramooti tiŋki kin bí Galaadi tiŋkpaaŋkinee.

²⁹Ní Isirayeel bɔtiu bí Joosafaati yii: «M làá kpántí m-wampeeŋkaati bí taa béé-mi[60] ní kí cùú já kujaau. Ama siiyee, dū a-beebɔkutil kí pèen̄.» Ní Isirayeel bɔtiu lafun kpántì u-wampeeŋkaati bí taa béé-u ní ki cūtìi bíi jáà.

³⁰Siirii mun bɔtiu nìn tīī u-janjaliibi mmuŋku nì saalaa nì bili bin sá bin kpèé janjatɔrɔkub kpilibee mara yii: «Ní taa já nì bijanjaliibi ŋwaamuɔɔɔ, kí taa já nì bijanjakpilib, ama ní pée já nì Isirayeel bɔtiu baba.»

³¹An pu ní bin kpèé janjatɔrɔkub kpilibee nín ká Joosafaatee, bi bí yii: «Báà an ŋá pu, Isirayeel bɔtiu dee», ní bi fātì bi-ba ki túĺ-u ki bíi jáà nì u, ní Joosafaati kíĺ ki bíi kūuntí.

³²Niinee ní bijanjakpilibee nín béè yii an kaa sá Isirayeel bɔtiu ní bi yāntì-u kaa tí bíi jì-u.

³³Ama Siirii yab janjaliu ubɔ pée tɔ́ mpiin yìkíl̄ yikil ní an cūtìi yá Isirayeel bɔtiu laakin u-gbampɔɔl janliitiliŋ tūū tɔbee. Ní ubɔti bí un ŋàal̀ u-tɔrɔkuuee yii: «Fàtīí gítí a-boon tí nyā dikɔmbool pu, di sá m ká tiweendi.»

³⁴Ama ŋwiin gbantee, kujaau nín nìn pɔ́ɔkì puee, bi nìn yāntì ubɔti yú u-tɔrɔkuu poon ki túĺ Siirii yab áli kujoou, ní u kpíì.