Read Ntcham 2 Chroniques 19 Bible Online

2 Chroniques 19 - Ntcham bible

2 Chroniques 19

¹Juuda bɔtiu Joosafaati nìn fātìi gítì Jeerusaleem nì ŋgbampɔn.

²Unimbɔti bɔnaatiliu Yeewuu, Ananii jipɔɔn nìn túŋkì-u nsanni ní ki bí-u yii: «Ba pu ní a cūtìi tútúǹ unikpiti? Mimmee sii néeń bin ná ti-Dindaaneeee? Kun ní a ŋée puee, ti-Dindaan gíí a-pu diŋuul.

³Nì míǹ kɔkɔee a túń atummɔnti. A wùn̄ diwaal Aseera windɔi Juuda tiŋki kɔkɔn ní ki nyàab̄ ti-Dindaan nì dipɔbil diba.»

⁴Joosafaati nìn kóò Jeerusaleem ní. Ama u nìn yìiǹ Juuda tiŋki kɔkɔ pu kí yòon̄ Beerseeba kí tin cáá sāā Eefiraayiim jooŋŋi pu. U nìn sòoǹ nì binib bí fàtīí gítiń ti-Dindaan, bi-baabi Nimbɔtiu cee.

⁵Juuda timmu mun bi nìn máń agun ki túee kɔkɔ poonee, u nìn kāaǹ bibɔsoonliibi.

⁶U nìn bí-bi yii: «Ní tɔ̄maan ni-tundi tiŋan. Di sá yii an kaa sá nniyaamin ní ni làá dūú sòoǹ tibɔti, ama nì ti-Dindaan yindi pu ní ni làá dūú sòoǹ. Ni yaa láa bíi sòoǹ tibɔtee, úǹ u-ba làá dāá nīn bí ni-cee.

⁷Míǹ puee, ní yàntī ti-Dindaan faaŋku ń nīn bí ni-ni. Ní nīn ŋúb́ tin m tùkū-ni nee kí ŋámaan míǹ. Di sá yii ti-Dindaan ti-Nimbɔtiu kaa gèetíǹ bin kaa sòoǹ tibɔti nì ibaamɔnee, àá bin pɔ̀ gandee, àá bin fòol̄ dinyɔɔŋeebil jim kí sòoǹ kí pɔ̀ ubɔee.»

⁸Ki kpáaǹ Jeerusaleem tiŋkinee, Joosafaati nìn lēē Leefii yab nì bisaraaŋaliibi nì Isirayeel dicaŋŋi kpilib biba ki kāaǹ bí nīn sòoǹ tibɔti ti-Dindaan yindi pu, ní kí nīn ŋáŋkí Jeerusaleem yab bɔti.

⁹U nìn tīī-bi mara nee yii: «Ni máaǹ kí tɔ̄ ni-tundi nì ti-Dindaan faaŋku poon nì deedee poon nì dipɔbil diba.

¹⁰Tí dūú ŋmàntī yii ni-nabiyaamu nyánní ntimu mun poon ní bi kóòyee ki cáań-ni tibɔti ní sòoǹ. An ŋūǹ kí nīn sá nnikpaakoon bɔti, àá mara bɔti, àá abɔkpaa bɔti, àá akoobil bɔti tiba. Too an yaa pée sá tiŋyee, ní dàkà-bi tin bi máaǹ kí ŋée. Mimmee baa làá yìntīǹ ti-Dindaan ní waa nín gíí ni-pu àá ni-nabiyaamu pu diŋuul. Ni yaa ŋá míǹ, naa làá fōō dibɔkpil.

¹¹Usaraaŋakpil Amariyawuu di làá nīn kpèé dinimbɔtinool bɔti ki tìì-ni. Juuda beel kàlinjakpiliu Seebadiyawuu, Isimaayeel jipɔɔn di làá nīn kpèé dibeel pu bɔti. Leefii yab làá nīn bí ni-cee ki tútúǹ-ni ni kpèé kitiŋ pu bɔti. Ní kámaan dipɔbil kí tɔ̄ ni-tundi! Ti-Dindaan ń nīn bí bin ŋáań tiŋanee cee.»