Read Ntcham 2 Chroniques 2 Bible Online

2 Chroniques 2 - Ntcham bible

2 Chroniques 2

¹U nìn fōō binib kutukub imuŋku ita nì saalaa bí nīn tūntí tiwan nì binib kutukub imuŋku inaa bí nīn bí dijool pu ki kpítí ataŋkpee, ní ki fōō binib kutukub bita nì alaataa aluu bí nīn kpèé bitɔntɔnliibi.

²Saloomɔn nìn tú binib Tiir yab bɔtiu Yiiram cee bí tùkù-u yii: «A nìn tútúǹ m-baa Daafiidi ki tīiń-u seedir dɔi u dūu máń kudii kun poon u làá nīn kóòyee. M bàà là yii á ŋá míǹ mbaantiim kí tīī-mi.

³Kpèè, m làá mā kudii kí tīī ti-Dindaan m-Nimbɔtiu tinyool. Isirayeel yab làá dū kudiiyee kí sú-u. Bi làá nīn tùutī talaalub ki tìì-u, ní kí nīn pāantí kpɔnɔb bin bi dūu sú-uee[8] baabadal. Bi làá nīn ŋáań bisaraawɔkaabi kutaafaau nì kujoou, ki kpáaǹ iwiŋŋuŋfikaa dal nì uŋmal kamaa wimpeekaaŋu nì jiŋaalib wiiŋyi in ti jīǹ ki jáaḿ ti-Dindaan ti-Nimbɔtiuee saraabi. Unimbɔti nín nìn síiǹ Isirayeel yab yii bí nīn ŋáań míǹ ki cá jaanjaan.

⁴Kudii kun m làá mēe máaǹ kí nīn sá kudikpaaŋŋu, di sá yii ti-Nimbɔtiu di sá ukpaan ki jítiǹ inimbɔti kɔkɔ.

⁵Ama ŋma di ŋūǹ kí mā-u kudii? Di sá yii yilpu nì yilpu fɔ́ŋŋŋ kaa wāā ú ŋmā kí kɔ́[9]. Ní ŋma ní m sá kí ŋmā kí mā-u kudii? Kun m pée là kí ŋée di sá ḿ mā mpaan ŋun pu bi làá nīn ŋáań-u saraabee.

⁶Míǹ puee, á tīiń-mi unil un ŋūǹ kí tɔ̄ sindaariya nì animbil nì tasa nì tikúti tundi tiŋanee. Udaan máaǹ kí nīn nyí bi nín bɔ́ntí satab bí nīn cáá nnyim min máǹee nì nnyim min máǹ cínciŋee nì nnyim min máǹ gùŋgumee, ní kí nīn gíti nyí tikpiŋkpiil bɔti. Udaan làá kūtì man m-ba tɔntɔnliibi bin m-baa Daafiidi nìn lēē bi bí Jeerusaleem tiŋkin nì Juuda timmunee pu kí tɔ̄ ditundi.

⁷Á tīiń-mi seedir nì siipreesi nì santaal dɔi in bí Leebanɔn jooŋŋi puee, di sá yii m nyí a-tɔntɔnliibi di ŋūǹ ki gà Leebanɔn sufii tiŋanee. M-tɔntɔnliibi làá dāá kūtì bi-pu.

⁸Bi làá bɔ́ntí-mi idɔ an nīn náaǹ, di sá yii Unimbɔti diiku kun m làá mēe làá nīn sá kukpaaŋŋu ní kí nīn ŋān̄.

⁹M làá tīī a-tɔntɔnliibi bin làá gāā isufee bilee yim tɔɔnib kutukub biluu nì ɔɔji yim tɔɔnib kutukub biluu nì ndamam liitirib kutukub alaataa anii nì ŋkpam liitirib kutukub alaataa anii.»

¹⁰Tiir bɔtiu Yiiram ŋmàn̄ kugbɔŋu ki kíí Saloomɔn yii: «Ti-Dindaan néeń u-nibul. An pu ní u dū-si ki kāaǹ di-pu ubɔti.»

¹¹Ní Yiiram gíti kútì ki lī yii: «Tí jāam̀ ti-Dindaan, Isirayeel Nimbɔtiu un di náań kutagbɔŋu nì kitiŋee. Tiŋman u tīī ubɔti Daafiidi kibininjabiki kin cáá iciin nì dinyil nì nlandɔkɔee. U làá mā kudii kí tīī ti-Dindaan ní kí mā úǹ u-ba diiku.

¹²Too, m làá dū Uram-Abii kí tīiń-si. U sá utɔntɔnli un nyí ditundi tiŋan ki yáb̀ee.

¹³U-na sá Daani naakookun ní u-baa sá utiirja. U nyí sindaariya nì animbil nì tasa nì tikúti nì ataŋkpee nì idɔ tundi tiŋan. U gíti ŋūǹ kí bɔ́ntí satab bí nīn cáá nnyim min máǹee nì nnyim min máǹ cínciŋee nì nnyim min máǹ gùŋgumee nì satab bin bí fálfalee. U gíti tí ŋūǹ kí kpítí tikpiŋkpiil kí lēē kunaŋu ataŋkpee pu. Ditundi din a yaa pée dūu ŋúbiǹ-uee, u làá bɔ́ntí kí tīī-si ní. U nì sii a-ba tɔntɔnliibi nì a-baa ubɔti Daafiidi tɔntɔnliibi di làá kpāfì kí tɔ̄ ditundi.

¹⁴Bilee nì ɔɔji nì ŋkpam nì ndamam min bɔti a nìn sòon̄ee, dūú tīiń man a-tɔntɔnliu kɔŋkɔnnee.

¹⁵Ti làá cùú gāań isufi Leebanɔn kii a nín pée là puee, ní kí bóob́ kí dūú tɔ̄ń tiŋkun kí cáań-si Jafaa tiŋkin. Niinee ní á dāá yòon̄-i kí cùnnì Jeerusaleem.»

¹⁶Saloomɔn nìn kàan̄ binicambi bin kɔkɔ nìn bí Isirayeel tiŋki puee, kii u-baa Daafiidi nín nìn kàan̄-bi pu ŋyunti ŋun u nìn sá ubɔtee[10]. Bi nìn nyáń binib kutukub dilaataal nì imuŋku ili nì saalaa nì bita nì binib alaataa aluu.

¹⁷U nìn lēē bi-kansikin binib kutukub imuŋku ita nì saalaa bí nīn tūntí tiwan, ní ki lēē binib kutukub imuŋku inaa bí nīn kpítí ataŋkpee dijool pu, ní ki lēē binib kutukub bita nì alaataa aluu bí nīn kpèé bitɔntɔnliibi gbanti ditundi ń còom̀.