Read Ntcham 2 Chroniques 20 Bible Online

2 Chroniques 20 - Ntcham bible

2 Chroniques 20

¹Míǹ boonee ní Moowaab yab nì Amɔn yab, kí dūú kūtì Meewun yab dɔ́miń kí já nì Joosafaati.

²Ní bi dɔ́miń ki tùkū Joosafaati yii: «Dijanjakitikpaandi diba dòoń kí jáǹ-si. Dì nyánní Ŋyaam Mɔɔgbandi lapu yal pú, an dàkà yii Eedoom tiŋkin. Dì bāań Asasɔn-Tamaar, an dàkà yii Eeni-Geedii.»

³Joosafaati nìn fāŋkì, ní ki nìn lēē yii u làá mēē ti-Dindaan. U nìn tīī mara yii Juuda beel kɔkɔn bí bóob́ kinyɔkɔ.

⁴Juuda yab nìn nyánní Juuda timmu kɔkɔn ki kóoǹ ki kpáfì Jeerusaleem kí mèè ti-Dindaan.

⁵Joosafaati nìn yíkìi yúl̀ Juuda yab nì Jeerusaleem yab kansikin, ti-Dindaan Diikun ki túĺ Dicimpɔndi.

⁶U nìn bí yii: «Ti-Dindaan, ti-baabi Nimbɔtiu, sii di bí yilpu ní ki jīǹ atimbun kɔkɔ pu dibeel. Sii di cáá mpɔn nì dikpabil ní ubɔ kaa ŋūǹ kí sīĺ a-nimbiin kí jáǹ-si.

⁷Sii ti-Nimbɔtiu di nìn jìn̄ kitiŋ nee pu nib ŋyunti ŋun Isirayeel yab, a-nibul nìn dòońee. A dū kitiŋ nee ki tīī a-bɔɔ Abraam naantiibi kí nīn cá jaanjaan[61].

⁸Bi nìn kāl̀ kitiŋee poon ní ki máń-si ŋkɔŋkoon ki lī yii:

⁹<Nnaabu ŋubɔ yaa jéetì ti-pu, an ŋūǹ kí nīn sá yii kujaau, àá ditafadaaldi diba àá bìlbil kúm àá ŋkùm, ti làá dāan̄ kí yūĺ ŋkɔŋkoon nee nyɔkɔpu, an dàkà yii a-nimbiin, di sá yii niin ní a lèekī a-ba ki dàkà. Ti làá kúuǹ kí yíiń-si ti-nimbinaamandi poon. Niinee, a làá pīlifiǹ-ti ní kí fīī-ti.>

¹⁰Too, kɔŋkɔnnee, Amɔn yab nì Moowaab yab nì Eedoom yab dɔ́miń kí já nì ti. Ti-naanjab nín nìn nyánní Eejipiti tiŋkin ki dòońee, aa nìn pú-bi nsan bí dī bi-tiŋki pu. An puee ti-baabi nìn dūu dī nsan ŋubɔ fám ní ki yāntì-bi[62] kaa kūū ki céetì-bi.

¹¹Ama kpèè binib gbanti nín bíi pà-ti tipaal tiŋyee! Bi dɔ́miń kí jà-ti kitiŋ kin a dūu tīī-tee pu.

¹²Ti-Nimbɔtiu, mimmee aa làá dáaĺ bi-tafalaaa? Di sá yii binib bin dòoń kí já nì ti nee wīikí tikpil ní taa cáá mpɔn kí ŋmā kí sīĺ bi-nimbiin. Taa nyí ti nín làá ŋá puee, ama ti-nimbikpeeŋu cɔ́ a-pu ní.»

¹³Juuda yab kɔkɔ, ki kpáaǹ bi-nimpoobi nì bi-biyaamu nìn yú ti-Dindaan nimbiin.

¹⁴Ti-Dindaan Fam nìn kpákatìń uleefiija ubɔ pu samaa kansikin. Bi nìn yíì-u Yasiyeel ní u nìn sá Asafi maaliŋun. U-baa di nìn sá Seekariyawuu ní u-naanja sá Beenaya ní u-naanja Beenaya baa sá Yeeyiyeel, Mataniya jipɔɔn.

¹⁵Yasiyeel nìn bí yii: «Nimbi Juuda yab, Jeerusaleem yab nì sii ubɔti Joosafaati, ní pīlifìmaan! Ti-Dindaan nín bíi sòoǹ nì ni puee sèé: <Ni-pɔbiliŋ ń taa bīil̀, kí taa fàŋkì dijanjakitikpaandi nee, di sá yii kujaau nee kaa sá ni-jaaku, ama an sá man ni-Nimbɔtiu jaaku ní.

¹⁶Foolee, ní fu cùú já nì bi. Bi bíi dàb̀ Nsupumpukum gbantaŋki. Ni làá fu ká-bi ditantakal nín kúntí puee, Yeeruweel teeku nyɔkɔpu.

¹⁷An kaa fu bàlifī ní já nì bi. Nimbi dee, ní fu nyā kí yūĺ kí kpèè dijajil din ti-Dindaan làá fu tīī-nee. Juuda nì Jeerusaleem yab, ni-pɔbiliŋ ń taa bīil̀, ní taa fàŋkì! Foolee, ní fu nyā kí tūŋkì-bi, man ni-Dindaan làá fu nín̄ bí ni-cee[63].>»

¹⁸Niinee Joosafaati tātìi gbāaǹ u-yigbeel tūū kitiŋ. Juuda yab nì Jeerusaleem yab kɔkɔ mun nìn tātìi gbāaǹ kitiŋ ti-Dindaan nimbiin ki bíi jáaḿ-u.

¹⁹Míǹ boonee ní Leefii yab bin sá Keeyaati nì Kooree maaliŋunee yíkìi yúl̀. Bi nìn gāā ilan mpɔn ki nyɔ́ŋkì ti-Dindaan, Isirayeel Nimbɔtiu.

²⁰Kutaa wúntì kutaafaau pɔ̀lpɔlee ní bi-kɔkɔ kíĺ nsan ki nín cá Teekoowa teekun. Kí wàatī bí yīkèe ní Joosafaati bí-bi yii: «Juuda nì Jeerusaleem yab, ní pīlifìmaan. Ní nīn máká ti-Dindaan ni-Nimbɔtiu pu, ní ubɔ kaa làá já kí pɔ̄ɔkiǹ-ni! Ní nīn máká u-bɔnaatiliibi pu ní kí ká dijajil!»

²¹Míǹ boonee ní u nì samaa sòon̄ ki bɔ́ntì ní ki lēē bilaŋgaaliibi ki dū circir bɔkutiŋ ki pēeǹ-bi ní bíǹ līī dijanjakitil nyɔkɔpu ki gà ilan ki nyɔ́ŋkí ti-Dindaan u nín sá circir ki sá ukpaan puee ki lì yii: «Nyɔ̄ŋkìmaan ti-Dindaan, di sá yii u-neendi bí ní ki cá jaanjaan.»

²²Ŋyunti ŋun bi kíĺ ki bíi gà inyɔŋki laŋyee ní ti-Dindaan yāntì fikil fikil dɔ́miń ki kɔ́ Amɔn yab nì Moowaab yab nì Seeyiir jool yab bin nìn dɔ́miń kí já nì Juuda yabee kansikin. Bi nìn kíĺ ki bíi jáà nì tɔb.

²³Amɔn yab nì Moowaab yab nìn bíi jáà nì Seeyiir jool yab ní ki kūū ki céetì-bi múb. Míǹ boonee ní bi nyáń tɔb pu ki kūū ki céetì tɔb.

²⁴Ŋyunti ŋun Juuda yab jɔ́m̀ laakin bi ŋūǹ kí tɔ́kɔń kí wāl̀ kuteeu puee ki kpēē dijanjakitikpaandi watil púee, anikpil ŋmaniŋma di dɔ̄ kitiŋ fìlfilee. Uniseen kaa nìn kíǹ.

²⁵Niinee Joosafaati nì u-samaau cūtì ki fúkúl̀ anikpilee wanti ní ki ká tiwaŋkuti tikpil nì tigaajawan tikpil nì tiwampeeŋkaal nì tiwan tin cáá kunyampoouee tikpil. Tiwan nìn wīikí tikpil áli gba baa nìn gíti ŋūǹ kí túń. Bi nìn dū iwiin ita ní ki kóoǹ tiwaŋfukulkaal gbanti, di sá yii tì nìn wīikí tikpilku.

²⁶Ŋwinnanaati dalee ní bi kóoǹ ki kpáfì Beeraka tantakalin kí jāam̀ ti-Dindaan. An pu ní bi pú ditantakal gbanti diyindi yii Beeraka, taapu sá yii «si nì ditundi».

²⁷Niinee ní Joosafaati līntì Juuda yab nì Jeerusaleem yab nyɔkɔpu ní bi nín gítí Jeerusaleem nì mmɔn poon, di sá yii ti-Dindaan nìn fīī-bi ki nyántì bi-nannanliibi ŋaan ki tīī-bi dipɔɔpindi.

²⁸Bi nìn bɔ̀ɔ́ tibati, ki búǹ awul nì akantán ní ki dūu kɔ́ Jeerusaleem tiŋkin ki tin nyáń ti-Dindaan Diiku pu.

²⁹Atimbun ŋin kɔkɔ kíǹee beeŋi nìn gbìl̄ ti-Dindaan Unimbɔti nín jáń nì Isirayeel nannanliibi puee, bi nìn fāŋkì tikpil.

³⁰Joosafaati beel nìn bí ŋgbansɔŋfin, di sá yii u-Nimbɔtiu nìn tīī-u diŋuŋfil ijaan kɔkɔ pu.

³¹Joosafaati nìn cáá abin aŋmoo kpá imuŋku ili ní ki kpántì Juuda bɔtiu, ní ki kāl̀ Jeerusaleem abin mmuŋku nì aŋmoo ki jíń dibeel. Bi nìn yíì u-na Asuuba, Siilii bisal.

³²U nìn nóó u-baa Asaa tabɔbiliŋ ní deedee, ní ki nìn ŋá tin fáatiǹ ti-Dindaanee.

³³Ama waa nìn gbáń ki kpītì isaraafan in nìn bí ŋgbantamu puee, ní samaa kaa nìn nóó bi-baabi Nimbɔtiu nì dipɔbil diba.

³⁴Joosafaati tuuŋŋi ŋin kíǹee kí yòon̄ ŋi nín kíĺ puee kí cáá sāā ŋi nín kúntì puee ŋmàn̄ ki kā Ananii jipɔɔn Yeewuu gbɔntin. Bi nìn dū tigbɔn gbanti ki sákaǹ Isirayeel bɔtiibi gbɔŋkun.

³⁵Kí kūtèe, Juuda bɔtiu Joosafaati nìn ŋá mpèé nì Isirayeel bɔtiu Akasiyasi. Ubɔti gbanti bimbim kaa nìn ŋān̄.

³⁶U nì u nìn kpáfì ki kpáá meelab bin làá nīn cáà Taarsiisee. Eesiiyɔn-Geebeer tiŋkin ní bi nìn kpáá meelab gbanti.

³⁷Ama Unimbɔti bɔnaatiliu Eeliyeeseer, Doodafa jipɔɔn un sá Mareesa tiŋkinee nìn fōō tibɔti ki nāatì Joosafaati yii: «A nín ŋá pu ní a nì Akasiyasi ŋá mpèéyee, ti-Dindaan bíil̀ ditundi din ní a túńee.» Tiŋman míǹ ní an lafun jítì, meelabee nìn bíil̀ kaa ŋúń ki cūtì Taarsiisi.