Read Ntcham 2 Chroniques 21 Bible Online

2 Chroniques 21 - Ntcham bible

2 Chroniques 21

¹Joosafaati kpíì ki cūtìi ŋàl̄ u-baabee ní bi síb́-u ki kɔ́ĺ-bi, Daafiidi Tiŋkin. U-jipɔɔn Jooram di fōō u-yil ki kpántì ubɔti.

²Joosafaati jipɔɔn Jooram nìn cáá naalib pēē baa. Bíǹ di sá Asariya nì Yeeyiyeel nì Seekariyawuu nì Asariyawuu nì Miikayeel nì Seefatiyawuu.

³Bi-baa Joosafaati nìn púb́-bi animbil nì sindaariya nì tiwan tin cáá kunyampoouee tikpil. U nìn gíti tīī-bi Juuda timmu mun bi máń agun ki túee bí nīn kpòotī. Ama Jooram ní u nìn lēē ú fōō u-yil kí kpántí ubɔti, di sá yii úǹ di nìn sá ujipɔŋkpil.

⁴Jooram nìn fōō u-baa beel ki kpántì ubɔti ní ki báaǹ inyaan. Míǹ boonee ní u cúú u-naalib kɔkɔ ki lāntì, ki kpáaǹ Isirayeel bɔtibiliŋ aba.

⁵Jooram nìn cáá abin mmuŋku nì saalaa nì ali ní ki kpántì ubɔti, ní ki kāl̀ dibeel pu Jeerusaleem abin anii.

⁶U nìn pée nóó Isirayeel bɔtiibi tabɔbiliŋ ní, a lì kii Akaab dicaŋkun yab nín nìn bí puee, di sá u nìn cáá Akaab bisal ubɔ ní. U nìn ŋá tin kaa nìn kítì ti-Dindaan nimbiinee.

⁷Ama ti-Dindaan tɔntɔnliu Daafiidi puee, waa nìn là kí nàan̄ Juuda tiŋki, kun puee u nìn pōoǹ Daafiidi yii u-jipɔmbi làá nīn pée kā dibeel pu Jeerusaleem ní kí nīn cá jaanjaan[64].

⁸Jooram beel yuntiŋu ní Eedoom yab yíkì kaa kíí bi-ba pu kí nīn gbíntìi bí Juuda yab taapu ní ki kāaǹ bi-ba nì bi-bɔtiu[65].

⁹Jooram nìn yíkì ki nín cá Seeyiir tiŋkin ki kpáaǹ u-janjatɔrɔkub kɔkɔ. Ama kunyeeuee ní u nì u-janjatɔrɔkub kpootiliibi jáń ki pɔ́ɔkiǹ Eedoom yab bin nìn māntìi tú-bee.

¹⁰Kí yòon̄ yaadal wiiŋŋu gbanti ní Eedoom yab fōō bi-ba kaa ti bí Juuda yab taapu. Ŋyunti gbanti mbaanti ní Liibina[66] yab mun kaa kíí bi-ba pu.

¹¹Jooram u-ba nìn máń iwaatootipaan Juuda jooŋŋi pu, ní ki yāntì Jeerusaleem yab nì Juuda yab kɔ́ tijɔkɔndin ki dū Unimbɔti ki fá.

¹²Dalbee ní Unimbɔti bɔnaatiliu ŋmàn̄-u kugbɔŋu ki bí-u yii: «Ti-Dindaan, a-naanja Daafiidi Nimbɔtiu nín sòon̄ puee sɔ̀. Aa dī a-baa Joosafaati tabɔbiliŋ kaa ti dī a-naanja Asaa, Juuda bɔtiu tabɔbiliŋ.

¹³Ama a dī Isirayeel yab bɔtiibi saŋŋu ki yāntì Jeerusaleem yab nì Juuda yab bíi tòotī awaa kii Akaab dicaŋkun yab nín ŋáań puee. Áli gba a kūū a-naalib bin nìn sɔ́ǹ-see.

¹⁴An pu ní ti-Dindaan làá cáań atulim ki tɔ̄ a-nibul nì a-jipɔmbi nì a-nimpoobi nì a-gaajawanti kɔkɔ pu.

¹⁵Sii a-bee, tiweeŋkpiil di làá cúú-si, iween in làá ŋmɔ́ kí bà a-nai ní kí nīn púntí-si baabadal áli a-nai ń dāá nyā mpaampiin puee.»

¹⁶Niinee ti-Dindaan yāntì Fiiliistii yab nì Bilaalibub bin kóò ki pìlīǹ Kuusi yabee dɔ́miń kí já nì Jooram.

¹⁷Bi nìn jáń ki pɔ́ɔkiǹ Juuda yab ní ki kɔ́ kitiŋin ki kóoǹ tigaajawan tin kɔkɔ nìn bí ubɔti dicaŋkunee. Bi nìn kpáaǹ u-jipɔmbi nì u-nimpoobi. U-jipɔŋwaaliu Akasiya baba ní bi nìn kíǹ-u.

¹⁸Míǹ boonee ní ti-Dindaan yāntì ina weeŋyi in baa ŋūǹ kí cáaǹee dɔ́miń ki cúú-u.

¹⁹An pée bí míǹ ki cá abin ali boonee, iweenee píĺ-u ní u-nai nyáń, ní u dāa kpíì nsansaaŋkúm. U-naacimbi kaa nìn kpāā ŋŋmi ki súń u-kpool kii bi nín nìn ŋá pu ki tīī u-naanjab tinyoolee.

²⁰Jooram nìn cáá abin mmuŋku nì saalaa nì ali ní ki kpántì ubɔti ní ki kāl̀ Jeerusaleem tiŋkin ki jíń dibeel abin anii. U nín kpíìyee, ubɔ nì ubɔ kaa yáliŋkì u-pu. Bi nìn síb́-u Daafiidi Tiŋkin, ama baa nìn síb́-u bibɔtiibi kaakuliŋin.