Read Ntcham 2 Chroniques 22 Bible Online

2 Chroniques 22 - Ntcham bible

2 Chroniques 22

¹Jeerusaleem yab nìn yāntì ubɔti Jooram jipɔɔn Akasiyasi un sá uwaalee di fōō u-baa yil ki kpántì ubɔti. Di sá yii Bilaalibub bin nìn dɔ́miń ki jáń nì Juuda yabee nìn kūū u-mambi kɔkɔ. Míǹ ní Jooram jipɔɔn Akasiyasi dūu kpántì Juuda bɔtiu.

²Akasiyasi nìn cáá abin imuŋku ili nì ali ní ki kpántì ubɔti, ní ki kāl̀ Jeerusaleem ki jíń dibeel dibindi diba. Bi nìn yíì u-na yii Atalii, Oomirii bisal.

³Úǹ mun nìn nóó Akaab dicaŋkun yab tabɔbiliŋ ní, di sá yii u-na di nìn sáŋkí-u ú nīn ŋáań tin kaa ŋān̄ee.

⁴U nìn ŋá tin kaa fáatiǹ ti-Dindaanee kii Akaab dicaŋkun yabee, di sá yii u-baa kúm boonee, bíǹ di kpántì u-saŋkiliibi ní bi-sansaŋkii gbanti nāaǹ-u.

⁵Bíǹ di sáŋkì-u ní u nì Isirayeel bɔtiu Jooram, Akaab jipɔɔn cūtìi jáń nì Aram bɔtiu Asayeel, Ramooti tiŋki kin bí Galaadi tiŋkpaaŋkinee. Ama bi bíi jáàyee ní Aram yab tīī Jooram tiweendi.

⁶Ní Jooram nín gítí Jisirayeel kí cáaǹ tiweendi tin u fōō Siirii yab cee Raama tiŋkin ŋyunti ŋun u nìn bíi jáà nì Siirii bɔtiu Asayeelee. U bí Jisirayeel niinee ní Juuda bɔti Akasiyasi, Jooram jipɔɔn cūtì kí màntì u-pu.

⁷Akasiyasi nín nìn cūtìi māntì Jooram pu puee ní ti-Dindaan dī an pu ki nāaǹ-u. Di sá u bàn̄ee ní u nì Jooram nyáń kí já nì Nimisii jipɔɔn Jeewuu. Tin waa nyée di sá yii ti-Dindaan di nìn yāntì Jeewuu kpántì ubɔti kí nàan̄ Akaab dicaŋku.

⁸Ŋyunti ŋun ní Jeewuu bíi dátí Akaab dicaŋku yab tafalee ní ki ká Juuda bɔtibiliŋ nì Akasiyasi nabiyaamu mun bí ubɔti tundinee ní u kūū ki céetì-bi.

⁹Míǹ boonee ní u yāntì bi nyàab̄ Akasiyasi. Bi nìn ká-u u cūtìi bál̀ Samaarii tiŋkin, ní bi cúú-u ki cáań Jeewuu cee ní úǹ kūū-u. Bi nìn síb́-u, di sá yii bi nìn lī yii: «Joosafaati un nìn nyàab̄ ti-Dindaan nì u-pɔbil kɔkɔee jipɔɔn dee.» Ubɔ kaa nìn gíti kíǹ Akasiyasi dicaŋkun kí ŋmā kí kpántí ubɔti.

¹⁰Akasiyasi na Atalii nín ká yii u-jipɔɔn kpíìyee ní u lēē yii u làá kpɔ̀ kí céetí ubɔti naantiibi kɔkɔ.

¹¹Ama ubɔti Jooram bisal Yooseeba nìn ŋúń ki yōoǹ Akasiyasi jipɔɔn Joowaasi u-mambi kansikin baa ŋúń ki kūū-u. U nìn cáá kibikee nì ki-bilooliu ki bál̀ kunimbɔtidii didooŋkaaku kubɔn. Míǹ ní ubɔti Jooram bisal Yooseeba un nìn sá usaraaŋakpil Yooyadaa nimpuu, ki gíti sá Akasiyasi niisalee nìn ŋúń ki fīī kibikee Atalii ŋaan waa kūū-kì.

¹²Joowaasi nìn bál̀ ti-Dindaan Diikun niin áli abin aluu, ŋyunti gbanti kɔkɔee, Atalii di nìn kā dibeel pu.