Read Ntcham 2 Chroniques 23 Bible Online

2 Chroniques 23 - Ntcham bible

2 Chroniques 23

¹Dibinluluútiil poonee, ní Yooyadaa dàkā tininjati. U nì bijanjakpilib bin kpòotī bijanjaliibi dilaataal dilaataalee nìn ŋá kunyɔɔbaantii. Bíǹ di sá Yeeroowaam jipɔɔn Asariyawuu nì Yoowanan jipɔɔn Isimaayeel nì Oobeedi jipɔɔn Asariyawuu nì Adaaya jipɔɔn Maaseeyawuu nì Sikirii jipɔɔn Eeliisafaati.

²Bi nìn yìin̄ Juuda timmu kɔkɔn ki kóoǹ Leefii yab nì Isirayeel dicaŋŋi kpilib ki kpáfì. Míǹ boonee ní bi nì bi táań ki gítì Jeerusaleem.

³Samaa kɔkɔ nìn kóoǹ ki kpáfì ti-Dindaan Diikun ní bi nì ubɔti ŋá mpèé. Yooyadaa nìn bí-bi yii: «Ubɔti jipɔɔn sèé. U máaǹ kí jī dibeel kí nóó nì ti-Dindaan nín nìn pōoǹ Daafiidi naantiibi puee[67].

⁴Ni nín làá ŋá puee sɔ̀. Bisaraaŋaliibi nì Leefii yab yaa dɔ́miń kí tɔ̄ ditundi ŋwiŋŋuŋfikaayee, bí ŋá akiti ata ní diba ń nīn cí kunimbɔtidii punyɔkɔki.

⁵Dikitililiitiil làá nīn cí dibeecindi ní ditataatiil ń nīn cí Dinyeel punyɔkɔki. Samaa un kɔkɔ kíǹee làá nīn bí ti-Dindaan Diiku cindin.

⁶Ubɔ kaa cáá nsan kí kɔ́ ti-Dindaan Diikun, see bisaraaŋaliibi nì Leefii yab baba. Bíǹ ŋūǹ kí kɔ́, di sá yii bi dū-bi ki sú ti-Dindaan ní. Samaa un kɔkɔ kíǹee máaǹ kí nīn ŋúb́ ti-Dindaan nín síiǹ puee kí nīn yú mmɔŋki.

⁷Leefii yab làá màntīí tū ubɔti báà ŋma ń nīn ŋúb́ u-janjawanti u-ŋaan. Un yaa là kí ŋá mpɔn kí kɔ́née, bí kpɔ̀-u. Laakin kamaa ubɔti yaa cée, bí nīn bí u-cee.»

⁸Leefii yab nì Juuda yab nìn ŋá kii usaraaŋakpil Yooyadaa nín nìn tīī-bi mara puee. Ukpil kamaa nìn yōoǹ u-nib, bin tundi nìn kífí ŋwiŋŋuŋfikaa dalee nì bin tundi nìn kúntí ŋwiin gbanti dalee, di sá yii Yooyadaa kaa nìn tīī báà dikitil diŋuŋfil.

⁹U nìn tīī bijanjakpilib bin kpèé bijanjaliibi dilaataal dilaataalee ŋkpamu nì ubɔti Daafiidi gbampɔɔŋi ŋin bí a-ba a-ba ki nìn bí kunimbɔtidiinee.

¹⁰U nìn yāntì bijanjaliibee kɔkɔ māntìi tú ubɔti ki ŋúb́ bi-janjawanti, ki kíĺ ti-Dindaan Diiku ŋgiil pú ki cáa sāā ŋgan pú, nsaraafan nì kunimbɔtidii caŋin.

¹¹Niinee Yooyadaa nì u-jipɔmbi nyántì Joowaasi. Bi nìn dū kibeefuulii ki cíkiǹ-u ní ki dū dipoondi taŋkpapilinti[68] ki ŋúbiǹ-u. Boonee ní bi bātì ŋkpam ki sītì u-yil pu ki kāaǹ-u tibɔtiil ní ki téeń mpɔn yii: «Ubɔti ń nīn cáá mmaŋfafɔkɔn!»

¹²Atalii nín gbìl̄ samaa wooku puee ní u nín cá ti-Dindaan Diiku watil pú, diniwul cee.

¹³U kpēēyee, ubɔti di tɔ́kɔ́ ti-Dindaan Diiku nyɔkɔpu kɔl puee. Bijanjakpilib nì bikantámbunliibi nìn yú ki kɔ́ĺ-u. Samaa kɔkɔ nìn bí mmɔnni ní bikantámbunliibi búǹ akantán, ní bi bɔ̀ɔ́ tiwan ní bilaŋgaaliibi gà ilan. Niinee Atalii cúú tiwan tin u pēēyee ki dáaĺ ki cátì ní ki téeń yii: «Bi nyáń m-boon ní! Bi nyáń m-boon ní!»

¹⁴Yooyadaa nìn nyántì bijanjakpilib bin kpèé bijanjaliibi dilaataal dilaataalee ki bí-bi yii: «Nyāntímaan-u doo! Un di yaa páaǹ u-boonee, bí kpɔ̀-u!» Di sá yii usaraaŋakpil nìn lī yii bí taa kpɔ̀-u ti-Dindaan Diikun doo.

¹⁵Bi nìn cúú Atalii ní ki dáaĺ-u ki cūnnì kubɔtinaakoou watil pú, ní ŋyunti ŋun bi bàn̄ Itaamu punyɔkɔkee[69] ní bi kūū-u niin.

¹⁶Yooyadaa nì samaa nì ubɔti nìn ŋá mpèé ki pōoǹ kí nīn kíǹ ki sá ti-Dindaan nibul.

¹⁷Niinee ní samaa kɔkɔ nín cá diwaal Baal diikun ki gbáń ki wīī-ku. Bi nìn gbáń ki wīī Baal saraafaŋyi nì ataŋkpee ŋin nìn bí niin bi tòotēe. Bi nìn kūū Baal tandaaŋwu Matan ki bíl̀ isaraafan nyɔkɔpu.

¹⁸Yooyadaa nìn dū ti-Dindaan Diiku ki ŋúbiǹ bisaraaŋaliibi bin sá Leefii yabee[70] bí nīn cí. Daafiidi nìn kpáfì-bi akiti akiti bí nīn ŋáań bisaraawɔkaabi ti-Dindaan Diikun, kii an nín ŋmàn̄ ki kā Mooyiisi marau poon puee. U nìn gíti kpáafì-bi yii bí nīn tūǹ ditundi gbanti ki gà ilan nì mmɔn.

¹⁹Yooyadaa nìn dū bipunyɔɔciitiliibi ki síiǹ bí nīn cí ti-Dindaan Diiku, án nín làá ŋá pu unil un yaa bí tijɔkɔndinee ń taa kɔ́ ku-nee.

²⁰Yooyadaa nìn kóoǹ bijanjakpilib nì akpambal nì bikàliŋkpilib nì samaa kɔkɔ ní bi yōoǹ ubɔti ti-Dindaan Diikun, ki dū-u ki dī mpunyɔɔjaati ki cáá-u ki kɔ́ǹ dibeecindi. Bi nìn dū-u ki kāaǹ dibeejal pu,

²¹ní samaa kɔkɔ kíĺ ki bíi fàal̀. Bi nín kūū Atalii míǹ boonee ní kitiŋ kɔ́ ŋgbansɔŋfin.