Read Ntcham 2 Chroniques 24 Bible Online

2 Chroniques 24 - Ntcham bible

2 Chroniques 24

¹Joowaasi nìn cáá abin aluli ní ki kpántì ubɔti. Jeerusaleem ní u nìn kóò ní ki jíń dibeel abin imuŋku ili. U-na nìn sá Beerseeba[71] ní bi yíì-u yii Sibiya.

²Yooyadaa maŋfal wiiŋyi kɔkɔ poonee, Joowaasi nìn ŋá tin kítì ti-Dindaan nimbiinee ní.

³Yooyadaa nìn cáá binimpoobi bili ki tīī Joowaasi ní bíǹ màl̄-u mbininjabiyaamu nì nnimpubiyaamu.

⁴Míǹ boonee ní Joowaasi lēē u-pɔbilin yii u làá ŋāŋkì ti-Dindaan Diiku.

⁵U nìn kóoǹ bisaraaŋaliibi nì Leefii yab ki kpáfì ní ki bí-bi yii: «Nín cámaan Juuda timmun kí fōō Isirayeel yab kɔkɔ cee animbil kí nīn cáa ŋáŋkí dibindi kamaa ni-Nimbɔtiu Diiku. Ní yáb́ kí tɔ̄ ditundi gbanti.» Ama Leefii yab kaa nìn yáb́ ditundi gbanti pu.

⁶Ní ubɔti yíiń usaraaŋakpil Yooyadaa ní ki bí-u yii: «Ba pu ní aa páb́ Leefii yab bí fōō Juuda yab nì Jeerusaleem yab cee lampoo un ti-Dindaan tɔntɔnliu Mooyiisi nì Isirayeel samaau nìn gíí bí nīn cáa ŋáŋkí Circir Tantiuee ní[72]?

⁷Di sá yii Atalii, unikpitee nì u-jipɔmbi yāntì kunimbɔtidii bíil̀, áli gba bi yōoǹ circir wanti tin bí kunimbɔtidiinee ki dūu ŋá diwaal Baal tundi.»

⁸Ubɔti nìn yāntì bi kpáá dakaa ubɔ ki síiǹ a yaa làá kɔ́ ti-Dindaan Diikunee caŋin.

⁹Míǹ boonee ní u yāntì bi báakì Juuda nì Jeerusaleem timmun yii: «Ti-Dindaan tɔntɔnliu Mooyiisi nìn yóoǹ kuteeun yii Isirayeel yab ń nīn pà lampoo ubɔ. Báà ŋma máaǹ kí cáań lampoo gbantee kí tīī ti-Dindaan.»

¹⁰An nìn mɔ́ɔkiǹ abɔtibil kɔkɔ nì samaa kɔkɔ ní bi cáań tin bi máaǹ kí cáańee ki ŋá dakaayee poon áli an tin gbí.

¹¹Bi yaa nìn cáań dakaayee Leefii yab cee bí yūĺ ubɔti yil pu kí kpèèyee, bi nìn kāntí animbil kā poon ki wīikí. Niinee ní bí yíiń ubɔti gbaŋŋmaliu nì un kpèé usaraaŋakpil wantee, ní bíǹ ń yòon̄ dakaayee kí kpáatí kí gíiǹ kí síiń u-paaŋŋu. Míǹ ní bi nìn pée ŋáań baabadal ní ki ká animbil tikpil tikpil.

¹²Ubɔti nì Yooyadaa nìn dū animbilee ki tīī bin kpèé ti-Dindaan Diiku ŋānkitam tundee. Bi nìn cáá animbilee ki pà bitaŋkpakpitiliibi nì kapintab nì bin tūǹ tikúti nì tasa kúti tundi kí mɔ̀tīí tīī ti-Dindaan Diiku mpɔnee.

¹³Bitɔntɔnliibee nìn dūu gùl̄ ditundi pu, ní ditundi nìn bíi cá malaa malaa. Bi nìn fātìi ŋáŋkì Unimbɔti diiku ní ku fātìi ká mpɔn.

¹⁴Ŋyunti ŋun bi ŋáŋkì ti-Dindaan Diiku ki dóòyee ní bitɔntɔnliibi kpilibee cáań animbil ŋin kíǹee ki tīī ubɔti nì Yooyadaa. Bi nìn dū animbil gbanti ki ŋá ti-Dindaan Diiku wanti tiba mun. Bi nìn dūu ŋá tiwan tin bi cáa tūǹ ti-Dindaan Diikun ditundee nì tin bi cáa ŋáań saraawɔkaayee nì asambil nì sindaariya nì animbil kúti wanti. Yooyadaa maŋfal wiiŋyi kɔkɔ poonee, bi nìn pée ŋáań bisaraawɔkaabi ní ti-Dindaan Diikun.

¹⁵Yooyadaa nìn púĺ. U nìn cáá abin dilaataal nì mmuŋku nì saalaa ní ki nín kpíì.

¹⁶Bi nìn síb́-u bibɔtiibi kaakuliŋ diban, Daafiidi Tiŋkin. Di sá yii u nìn ŋá tin ŋān̄ee ki tīī Isirayeel yab nì Unimbɔti nì u-diiku.

¹⁷Yooyadaa kúm boonee ní Juuda bɔtibiliŋ dɔ́miń ki tātìi gbāaǹ ubɔti Joowaasi nimbiin ki tīī-u tinyool. Ubɔti nìn pílifiǹ-bi.

¹⁸Isirayeel yab nìn dū ti-Dindaan, bi-baabi Nimbɔtiu Diiku ki fá ní ki cūtìi bíi jáaḿ iwindɔ ki tòotī awaa. An puee ti-Dindaan ŋuul nìn jéetì Juuda yab nì Jeerusaleem yab pu.

¹⁹Míǹ boonee ti-Dindaan nìn tú u-bɔnaatiliibi bi-cee bí sāŋkì-bi kí fàtīí gíiǹní-bi nsammɔnti pu, ama baa nìn pílifiǹ-bi.

²⁰Niinee ní Unimbɔti Fam kpákatìń usaraaŋakpil Seekariya, Yooyadaa jipɔɔn pu, ní úǹ nyáń samaa pu ki bí-bi yii: «Unimbɔti nín sòon̄ puee sèé: <Ba pu ní ni bíi yìntī ni-Dindaan marab? An kaa làá bútí-ni! Kii ni nín dū Unimbɔti ki fée puee, u mun dū-ni ki fá!>»

²¹Samaa nìn sòon̄ ki bɔ́ntì u-pu ní ubɔti pú-bi kinyɔkɔ ní bi yáŋkì-u ataŋkpee ki kūū ti-Dindaan Diiku cindin[73].

²²Ubɔti Joowaasi nìn súntì Sakari baa Yooyadaa nín nìn dàkā-u kulaŋŋaŋfitiiu kuŋyee pu ní ki yāntì bi kūū-u. Ŋyunti ŋun Sakari làá kpúee ní u bí: «Ti-Dindaan ń kpèè tin a ŋá nee kí tɔ̀ ipɔntoon!»

²³Dibindi dāa fātìi túee ní Aram yab janjaliibi dɔ́miń ki jáń nì Joowaasi. Bi nìn jáń ki fōō Juuda timmu nì Jeerusaleem tiŋki. Bi nìn sákatì abɔtibilee kɔkɔ samaa kansikin ki kūū, ní ki dū tiwan tin bi fúkúl̀ee kɔkɔ ki tú bi cáa cūnnì ki tīī bi-bɔtiu Damaasi tiŋkin.

²⁴Aram janjaliibi bin nìn dɔ́mińee kaa nìn pée náaǹ, ama ti-Dindaan nìn dū Juuda yab janjakitil dikpaandee ki ŋá bi-ŋaan, di sá yii bi nìn dū ti-Dindaan, bi-baabi Nimbɔtiu ki fá. Bi nìn ŋá míǹ kí dáaĺ Joowaasi tafal ní.

²⁵Bi nìn tīī-u tiweendi ní ki yāntì-u míǹ u dɔ̄ ki jīǹ falaa. U nín nìn kūū Yooyadaa jipɔɔn puee yāntì u-janjakpilib bili bɔ́ntì u-pu ki kūū-u u-lambaŋki pu ki tɔ̀n̄ ipɔntoon. U kpíì mimmee ní bi síb́-u Daafiidi Tiŋkin, ama baa nìn síb́-u bibɔtiibi kaakuliŋin.

²⁶Bin nìn bɔ́ntì u-pu ki kūū-uee sɔ̀. Uamɔnnimpu Simeeyaati jipɔɔn Sabaadi nì umoowaabinimpu Simriiti jipɔɔn Yoosabaadi.

²⁷Joowaasi jipɔmbi nì bi nín fōō Unimbɔti cee tibɔti tin ki nāatì-uee nì u nín ŋáŋkì ti-Dindaan Diiku puee kɔkɔ ŋmàn̄ ki kā bibɔtiibi gbɔŋkun. U-jipɔɔn Amasiyaawuu di fōō u-yil ki kpántì ubɔti.