Read Ntcham 2 Chroniques 25 Bible Online

2 Chroniques 25 - Ntcham bible

2 Chroniques 25

¹Amasiyaawuu nìn cáá abin mmuŋku nì aŋmoo ní ki kpántì ubɔti ní ki jíń dibeel abin mmuŋku nì awa Jeerusaleem tiŋkin. U-na nìn sá Jeerusaleem ní bi yíì-u yii Yoowadan.

²U nìn ŋá tin fáatiǹ ti-Dindaanee, ama an kaa nìn sá nì dipɔbil diba.

³Ŋyunti ŋun Amasiyaawuu beel kāl̀ tiŋan ki báaǹ inyaanee ní u kūū u-janjakpilib bin nìn kūū u-baa ubɔtee.

⁴Ama waa nìn kūū bi-biyaamu, ki nóó nì an nín ŋmàn̄ Mooyiisi gbɔŋkun puee. Ti-Dindaan nìn tīī mara kugbɔŋu gbanti poon yii: «Baa máaǹ kí kpɔ̀ bibaatiibi, bi-biyaamu kpitii pu, kaa tí máaǹ kí kpɔ̀ mbiyaamu, mu-baabi kpitii pu. Un ŋá ikpitee, úǹ ní bí kpɔ̀[74].»

⁵Amasiyaawuu nìn kóoǹ Juuda naakookun yab nì Beenjameen naakookun yab ki kpáfì ní ki lēē bin làá nīn sá bijanjaliibi kutuku kutuku kpilibee nì bin làá nīn sá dilaataal dilaataal kpilibee ki nóó nì bi-dicaŋŋi nín sá puee. Bi nín nìn kàan̄ bininjab bin cáá abin mmuŋku kí nīn cée, bi nìn ká binib kutukub alaataa ata. Binib gbanti kɔkɔ nìn bàn̄ kí cù kujaau, ní ki nìn ŋūǹ kí ŋúb́ ŋkpamu nì agbampɔɔ kí já.

⁶Míǹ boonee ní u gíti dū animbil kúti tɔɔnib bita ki mēē Isirayeel beel poon bibaatandambi kutukub dilaataal.

⁷Ama Unimbɔti bɔnaatiliu ubɔ nìn dɔ́miń ki tùkū-u yii: «Ti-baa ubɔti, taa yàntī Isirayeel janjaliibi ń táá-si kí cù kujaau, di sá yii ti-Dindaan kaa bí Isirayeel yab bin bi gíti yíì yii Eefiraayiim yab nee cee.

⁸Báà bi yaa céeǹ-si, a làá pɔ́ɔǹ kí já nì a-pɔŋŋu kɔkɔ, ama Unimbɔti làá yàntī a-nannanliibi ń já kí pɔ̄ɔkiǹ-si. Tiŋman puee Unimbɔti baba di tìì unil dijajil àá kí yàntī bí já kí pɔ̄ɔkiǹ-u.»

⁹Ní Amasiyaawuu bālifì Unimbɔti niliuee yii: «Kin animbil kúti tɔɔnib bita bin m dūu tīī Isirayeel janjaliibee làá kúntí nì yii ba?» Ní Unimbɔti bɔnaatiliuee kíí-u yii: «Ti-Dindaan làá tīī-si tin jítiǹ mimmee kpataaa pu!»

¹⁰Niinee Amasiyaawuu yāntì bijanjaliibi bin nyánní Eefiraayiim beelinee nín gítí bi-tiŋkin. Bi nìn nín gítí, ama bi nìn gíí Juuda beelin yab pu diŋuul ŋkpitim pu.

¹¹Amasiyaawuu nìn ká kunyannyaau ní ki yōoǹ u-janjaliibi ki cūnnì Ŋyaam tantakalin[75]. Niin ní bi jáń ki kūū Seeyiir yab binib kutukub saalaa.

¹²Juuda yab nìn gíti cúú bijanjaliibi kutukub saalaa, ní ki cáá-bi ki jɔ́m̀ ditaŋkpakpaandi diba yilpu, ní ki téeń-bi niin ní bi nyáń ki lítì kitiŋ ki yāaǹ.

¹³Isirayeel janjaliibi bin ní Amasiyaawuu nìn jìn̄ kaa yāntì bi táá-u ki cūtì kujaauee nìn nyáń Juuda timmu mun bí kí yòon̄ Samaarii kí cáá sāā Beeti-Oorɔŋyee yab pu. Bi nìn kūū binib kutukub bita ki yōoǹ tigaajawan tikpil.

¹⁴Amasiyaawuu nín jáń ki pɔ́ɔkiǹ Eedoom yab ki fàtīi gítińee ní ki yōoǹní Eedoom yab waaŋi ki dūu ŋá úǹ u-ba waaŋi. U nìn gbāaǹ ŋi-taapu ki jáam̀-ŋi ní ki tūutì talaalub ki tīī-ŋi.

¹⁵Niinee ní ti-Dindaan gíí u-pu diŋuul ní ki dū u-bɔnaatiliu ubɔ ki tú u-cee. Ubɔnaatilee nìn bālifì-u yii: «Ba pu ní a bí ki jáaḿ awaa ŋin kaa ŋúń ki fīī ŋi-nib a-ŋaanee?»

¹⁶U dáá bíi sòoǹ u-nyɔkɔ kaa láá ŋmíl̀ ní ubɔti kíí-u yii: «Ti lēē-si á nīn sá ubɔti saŋkiliuaaa? A yaa kaa là bí gbá-see, á ŋmīĺ niin.» Ní Unimbɔti bɔnaatiliuee ŋmíl̀, ama ní ki lī yii: «M nyí yii Unimbɔti lēē kí nàan̄-si, kun puee a ŋá tin bí nee kaa pílifì m-saŋkii.»

¹⁷Míǹ boonee ní Amasiyaawuu fōō u-saŋkiliibi cee tin u máaǹ kí ŋée ní ki tú binib bí cùú tùkù Isirayeel bɔtiu Joowaasi un gíti sá Joowakaasi jipɔɔn nì Jeewuu naantiiuee yii: «Dāan̄, man nì si tí já!»

¹⁸Ní Isirayeel bɔtiu Joowaasi tú bí cùú tùkù Juuda bɔtiu Amasiyaawuu yii: «Bukuŋkumbu subiki kiba di nìn bí Leebanɔn jool pu. Dalbee ní kì cūtìi ká seedir subu ní ki bí-bu yii: <Dū a-bisal kí tīī m-jipɔɔn ú cáá!> Ama upeel ubɔ nyánní Leebanɔn joolee puee ní ki tāā ki mátì bukuŋkumbuee.

¹⁹Tiŋman a jáń ki pɔ́ɔkiǹ Eedoom yabee ní an yòontí-si. Nín̄ kā a-dumpu soooo kí nīn fàal̀ a-jajil gbanti pu. Ba pu ní a là kí kíĺ kujaau kun poon ní bi làá já kí pɔ̄ɔkiǹ sii nì Juuda janjaliibee?»

²⁰Ama Amasiyaawuu kaa nìn pílifiǹ-u. Di sá yii Unimbɔti nín nìn lēē míǹ kí nàan̄ Amasiyaawuu nì u-janjakitil, kun puee bi nìn jáam̀ Eedoom yab waaŋi.

²¹Niinee Isirayeel bɔtiu Joowaasi yíkìń kujaau pu ki bāań ki dūu sìkī nì Juuda bɔtiu Amasiyaawuu Beeti-Seemeesi tiŋkin, Juuda tiŋki kiban.

²²Isirayeel yab nìn jáń ki pɔ́ɔkiǹ Juuda yab, ní bíǹ sáǹ ki nín kùǹ.

²³Isirayeel bɔtiu nìn cúú Juuda bɔtiu, Joosiyaasi jipɔɔn, Yoowakasi naantiiu Amasiyaawuu kuyuŋu Beeti-Seemeesi tiŋkin. U nìn gíiǹ-u Jeerusaleem tiŋkin. U nìn gbáń ki wīī digundi an wāā kii meetab alaataa ali kí yòon̄ Eefiraayiim punyɔkɔki kí cáá sāā Ŋfaŋfakam punyɔkɔki.

²⁴U nìn yōoǹ sindaariya nì animbil nì tiwan tin kɔkɔ nìn bí ti-Dindaan Diikun Oobeedi-Eedoom kpèéyee, nì tigaajawan tin kɔkɔ nìn bí dibeecindinee. U nìn cúú binib biba mun ki kpáàa búntì Samaarii tiŋkin.

²⁵Isirayeel bɔtiu Joowaasi, Joowakaasi jipɔɔn nín kpíì boonee, Juuda bɔtiu Amasiyaawuu, Joowaasi jipɔɔn gíti ŋá abin saalku ní ki nín kpíì.

²⁶Amasiyaawuu tuuŋŋi ŋin kíǹee, apeekaa kí cáá sāā aluŋkikaa, ŋmàn̄ ki kā Juuda bɔtiibi nì Isirayeel bɔtiibi tuuŋŋi gbɔŋkun.

²⁷Kí yòon̄ ŋyunti ŋun ní Amasiyaawuu fātì u-boon ki tīī ti-Dindaanee, ní bi bɔ́ntì u-pu kí kpɔ̀-u Jeerusaleem ní u sáǹ ki nín cá Lakiisi[76]. Bi nìn tú binib jìn̄ u-boon ki tin kūuń-u niin.

²⁸Boonee ní bi dū-u ki ŋá tɔrɔku un itaamu dátée ki gíiǹní Jeerusaleem, ní bi dū-u ki síb́ u-baabi kaakulin, Daafiidi Tiŋkin.