Read Ntcham 2 Chroniques 27 Bible Online

2 Chroniques 27 - Ntcham bible

2 Chroniques 27

¹Yootam nìn cáá abin mmuŋku nì aŋmoo ní ki kpántì ubɔti, ní ki kāl̀ Jeerusaleem ki jíń dibeel abin saalku nì diba. Bi nìn yíì u-na yii Yeerusaa, Sadooki bisal.

²U nìn ŋá tin fáatiǹ ti-Dindaanee. U nìn pée ŋá kii u-baa Oosiyasi nín nìn ŋá puee ní deedee. Ama úǹ kaa nìn kɔ́ kunimbɔtidiin kii u-baayee. Samaa úǹ nìn pée gbíntì nìkì ki ŋáań ikpiti.

³Úǹ di nìn máń kunimbɔtidii punyɔkɔki kin bí Yilpu púee, ní ki ŋáŋkì digundi din bi nìn máń ki tú Jeerusaleem tiŋkee Oofeel gbantaŋki pu.

⁴U nìn máń ntimu Juuda jooŋŋi pu, ní ki máń agun ŋin boon bijanjaliibi bāal̀ee nì sintil difɔkɔŋi laakin isufi bí tikpilee.

⁵Yootam nìn jáń nì Amɔn yab bɔtiu ní ki pɔ́ɔkiǹ-u. Dibindi gbantee, Amɔn yab nìn pàn̄-u lampoo animbil kúti tɔɔnib bita nì bilee tɔɔnib kutukub bita nì ɔɔji tɔɔnib kutukub bita. Dibinliliitiil nì dibintataatiilee, bi nìn gíti pàn̄-u lampoo míǹ mbaantiimin ní.

⁶Yootam nìn ká mpɔn gbanti, kun puee u nìn yúl̀ nì ti-Dindaan u-Nimbɔtiu deedee.

⁷Yootam tuuŋŋi ŋin kíǹee nì tijáti tin kɔkɔ u jáńee nì tin kɔkɔ u ŋáaǹee ŋmàn̄ ki kā Isirayeel yab nì Juuda yab bɔtiibi tuuŋŋi gbɔŋkun.

⁸Yootam nìn cáá abin mmuŋku nì aŋmoo ní ki kpántì ubɔti ní ki kāl̀ Jeerusaleem ki jíń dibeel abin saalku nì diba.

⁹Yootam kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Akaasi di fōō u-yil ki kpántì ubɔti.