Read Ntcham 2 Chroniques 28 Bible Online

2 Chroniques 28 - Ntcham bible

2 Chroniques 28

¹Akaasi nìn cáá abin mmuŋku ní ki kpántì ubɔti, ní ki kāl̀ Jeerusaleem ki jíń dibeel abin saalku nì diba. Waa nìn ŋá tin fáatiǹ ti-Dindaanee, kii u-naanja Daafiidi nín nìn ŋá puee.

²Ama u nìn dī Isirayeel bɔtiibi saŋŋu ní, áli gba u nìn dūntì tikúti ki mɔ́ɔ́ awaa kí nīn cáa jáaḿ diwaal Baal.

³Úǹ u-ba nìn tūū talaalub ki ŋá saraa Been-Inɔɔm tantakalin, ní ki dū u-jipɔmbi ki wùn̄ ŋŋmi ki ŋá saraa. U nìn pée ŋá ntimbiil tuuŋŋi ŋin atimbun ŋin ti-Dindaan nìn jìn̄ ki fōō ŋi-timmu ki tīī Isirayeel yabee nìn ŋáańee ní deedee.

⁴U nìn ŋáaǹ saraabi, ki tūutì talaalub ŋwaadibiyaamu poon nì ŋgbantamu pu nì bususɔmbu kamaa taapu.

⁵Niinee ti-Dindaan u-Nimbɔtiu dū-u ki ŋá Aram yab bɔtiu ŋaan. Úǹ nìn jáń ki pɔ́ɔkiǹ-u, ní ki cúú u-nib tikpil ki cáa cūnnì Damaasi kuyuŋu. Unimbɔti nìn gíti dū-u ki ŋá Isirayeel bɔtiu Peekaa[81] ŋaan ní úǹ jáń ki pɔ́ɔkiǹ-u sɔ́kɔ sɔkɔ.

⁶Reemaliyawuu jipɔɔn Peekaa nìn kūū Juuda yab janjaliibi bin sá bibaatandambee kutukub dilaataal nì imuŋku ili ŋwimbambaanti. Tíǹ nìn bāań-bi, kun puee bi nìn dū ti-Dindaan bi-naanjab Nimbɔtiu ki fá.

⁷Ueefiraayiinja Sikirii, ubaatandaan nìn kūū ubɔti jipɔɔn Maaseeyawuu. U nìn gíti kūū bin kpèé dibeecindi kpiliu bi yíì-u Asiirikamee, nì ubɔti taapu yɔu Eelkana.

⁸Isirayeel yab nìn cúú bi-nabiyaamu Juuda yab binimpoobi nì mbininjabiyaamu nì nnimpubiyaamu kutukub alaataa ali. Bi nìn fúkúl̀ bi-wanti tikpil ki cáa cūnnì Samaarii tiŋkin.

⁹Ti-Dindaan bɔnaatiliu ubɔ nìn kóò niin bi yíì-u Oodeedi. Ŋyunti ŋun Isirayeel janjaliibi nìn fātìi bāań Samaarii tiŋkinee ní u bí-bi yii: «Ti-Dindaan, ni-baabi Nimbɔtiu fōō Juuda yab pu diŋuul ní ki dū-bi ki ŋá ni-ŋaan. Ama ní nimbi dū diŋuul ki kūū-bi áli an tin bàn̄ yilpu.

¹⁰Ní ki gíti là kí dū Juuda nì Jeerusaleem yab kí ŋá ni-yumbui. Mimmee naa nyí yii nimbi ni-ba yīntiǹ ti-Dindaan ni-Nimbɔtiuaaa?

¹¹Ní pīlifiǹ-mi! Ní fàtīí gíiǹ ni-nabiyaamu mun ni cúú kuyuŋu nee kí líí, di sá yii nimbi pu ní ti-Dindaan gíí diŋuul kɔŋkɔnnee.»

¹²Niinee Eefiraayiim tindaŋkpilib biba yíkìi nyáń bin cūtì kujaauee pu. Bíǹ di sá Yoowanan jipɔɔn Asariyawuu nì Meesileemooti jipɔɔn Beereekiya nì Saluum jipɔɔn Yeeyisikiya nì Adilayi jipɔɔn Amasaa.

¹³Bi nìn bí-bi yii: «Ní taa cáań bisarkadambi nee doo! An yaa kaa sá míǹ, ni làá yàntī tí ŋá ikpitikpaan ti-Dindaan nimbiin. Ni là kí gíti kūtì ti-kpitii nì ti-yìntitam pu níii? Di sá yii ti-kpitii náaǹ ti-Dindaan nimbiin ní u-ŋuul dàn̄ Isirayeel yab pu.»

¹⁴Niinee bijanjaliibee yāntì bisarkadambee nì tiwan tin bi nìn fúkúl̀ ki yōoǹee samaa kɔkɔ nì bi-kpilib nimbiin.

¹⁵Míǹ boonee ní bi lēē binib biba ní bíǹ tīī bisarkadambee kunyannyaau ki sɔ̄ŋkì bi-pɔbiliŋ. Bi nìn lēē tiwan tin bi fúkúl̀ee poon tiwampeeŋkaal ki pēeǹ bin nìn gàaǹee. Bi nìn tīī-bi tiwampeeŋkaal nì anaataka nì tijin nì tinyɔkaal nì ŋkpam min bi cáa cāantí ibuunee. Bi nìn dū bin pɔ̀fì kaa nìn gíti ŋūǹ kí còom̀ee ki kāaǹ mmamu pu ní ki fātìi gíiǹ-bi bi-nabiyaamu cee, Jeeriikoo, ibafi tiŋkin. Míǹ boonee ní bi fātìi nín gítí Samaarii.

¹⁶Ŋyunti gbantee Akaasi tú binib bí cùú mèè Asuur bɔtiu ú dāá tūtuǹ-u.

¹⁷Di sá yii Eedoom yab nìn tí dɔ́miń ki jáń nì Juuda yab ki cúú bisarkadambi tikpil.

¹⁸Fiiliistii yab mun nìn dɔ́miń ki jàkā Juuda tiŋkpaammu Seefeelaa nì Neegeeb. Bi nìn fōō Beeti-Seemeesi nì Ayalɔn nì Geedeerooti timmu nì Sookoo tiŋki nì ki-timbilimmu, nì Tiimina tiŋki nì ki-timbilimmu, nì Giimsoo tiŋki nì ki-timbilimmu ki kíǹ ki kā niin.

¹⁹Tiŋman, ubɔti Akaasi puee, ti-Dindaan nìn sīntiǹ Juuda beel taapu. Di sá yii Akaasi nìn yāntì Juuda yab ŋá ikpiti kaa yúl̀ nì ti-Dindaan deedee.

²⁰Asuur bɔtiu Teegilaati-Falasaar bāań, ní an nín bàà sá ú tūtuǹ Akaasee, ní u bíi jáà nì u.

²¹Akaasi nìn yōoǹ tigaajawan tin nìn bí kunimbɔtidiinee dijandi nì tin nìn bí dibeecindin nì u-kpambaliŋ ciŋŋinee ki tīī Asuur bɔtiu, ama tíǹ gbanti kɔkɔ kaa nìn kēetì-u.

²²Agìń gbanti kɔkɔ poonee, ubɔti Akaasi kaa nìn gbíntìi yú nì ti-Dindaan deedee.

²³U nìn ŋá saraabi ki tīī Damaasi waaŋi ŋin nìn jáń ki pɔ́ɔkiǹ-uee. Di sá yii u nìn lī yii: «Asuur yab waaŋi nín tútúǹ Asuur bɔtiibi puee, m làá ŋá saraa kí tīī-ŋi ŋí tūtuǹ ma mun.» Ama awaa gbanti di nìn mɔ̄tìi nāaǹ u nì Isirayeel yab kɔkɔ.

²⁴Niinee Akaasi kóoǹ tiwan tin kɔkɔ bí ti-Dindaan Diikunee ki gbáń ki wīī. U nìn dū ti-Dindaan Diiku gbanti ki kpàl̄ ní ki máń isaraafan asaŋkaŋkpil kɔkɔ pu Jeerusaleem tiŋkin.

²⁵Juuda tiŋki kamaa poonee, u nìn máń awaadiin ní bi tùutī talaalub ki tìì awaa. Míǹ ní u nìn ŋá ní ki gbítì ti-Dindaan u-baabi Nimbɔtiu ŋuul.

²⁶Akaasi tuuŋŋi ŋin kɔkɔ kíǹee, tin u ŋée kí yòon̄ tipeepeekaal kí cáá sāā tiluŋkikaal kɔkɔ ŋmàn̄ ki kā Juuda nì Isirayeel yab bɔtiibi gbɔŋkun.

²⁷Akaasi kpíì[82] ki cūtìi ŋàl̄ u-baabi ní bi síb́-u Jeerusaleem tiŋkin, ama baa nìn dū-u ki bíl̀ Isirayeel bɔtiibi kaakuliŋin. U-jipɔɔn Eeseekiyaasi di fōō u-yil ki kpántì ubɔti.