Read Ntcham 2 Chroniques 29 Bible Online

2 Chroniques 29 - Ntcham bible

2 Chroniques 29

¹Eeseekiyaasi nìn cáá abin mmuŋku nì aŋmoo ní ki kpántì ubɔti. U nìn kāl̀ Jeerusaleem ní ki jíń dibeel abin mmuŋku nì awa. U-na nìn sá Seekariyawuu bisal ní bi yíì-u yii Abii.

²U nìn ŋá tin fáatiǹ ti-Dindaanee kii u-naanja Daafiidi nín nìn ŋá puee ní deedee.

³U nín jíń dibeel dibimpeepeekaal ŋmapeekaauee ní u pīitì kunimbɔtidii punuubi ki ŋáŋkì-bi.

⁴U nìn yíiń bisaraaŋaliibi nì Leefii yab ní bi kóoǹ ki kpáfì kunimbɔtidii cindin ŋwìiń nyalaŋki pú,

⁵ní u bí-bi yii: «Leefii yab, ní pīlifìmaan! Ŋámaan ni-ba circir kí ŋámaan ti-Dindaan, ni-baabi Nimbɔtiu Diiku circir. Nyāntímaan tin kɔkɔ pée sá tijɔkɔndi wantee circir kɔŋkooŋŋun.

⁶Ti-baabi nìn yīntiǹ ti-Dindaan ti-Nimbɔtiu ní ki ŋá tin kaa kítì u-nimbiinee. Bi nìn fātì bi-kpaŋkpamboon ki tīī ti-Dindaan Kɔŋkooŋŋu ní ki fātì bi-boon ki tīī-u.

⁷Bi nìn dū ti-Dindaan Diiku punuubi ki pīiǹ ní ki yāntì fitilab gbíntì. Bi nìn gbēeǹ kaa ti bíi tùutī talaalutuukaabi, ní kaa nìn gíti ŋáań bisaraawɔkaabi ki tìì Isirayeel Nimbɔtiu.

⁸An di yāntì ti-Dindaan fōō Juuda nì Jeerusaleem timmu pu diŋuul. Kun u yāntì bi kpántèe fàantí binib ní bi kíǹ ki cáa bèel̄ kii nimbi ni-ba nín wāĺ an bí pu díǹ nan ní.

⁹An pu ní ti-baabi kpíì kujaaun, ní bi cúú ti-jipɔmbi nì ti-bisalib nì ti-nimpoobi kuyuŋu.

¹⁰Kɔŋkɔnnee m là kí ŋá mpèé nì ti-Dindaan, Isirayeel Nimbɔtiu, án nín làá ŋá pu u-ŋuul ń sútí kí wàatī-tee.

¹¹Nimbee, m-jipɔmbi, ní taa dū tibɔti nee kí ŋá bugbambu. Di sá yii nimbi ní ti-Dindaan lēē ní nīn yú u-nimbiin ki tūǹ u-tundi ki tùutī talaalu ki tìì-u.»

¹²Leefii yab bin nìn bí niinee sɔ̀. Keeyaati maaliŋunee, bin nìn bée di sá Amasaayi jipɔɔn Mayaati nì Asariyawuu jipɔɔn Jooweel. Meerarii maaliŋunee, bin nìn bée di sá Abidii jipɔɔn Kiisi nì Yeeyaleeleel jipɔɔn Asariyawuu. Geersɔn maaliŋunee, bin nìn bée di sá Simina jipɔɔn Yoowa nì Yoowa jipɔɔn Eedeen.

¹³Eelsafan maaliŋunee, Simrii nì Yeeyiyeel di nìn bí. Asafi maaliŋunee, Seekariyawuu nì Mataniyawuu di nìn bí.

¹⁴Eeman maaliŋunee, Yeeyiyeel nì Simeeyii di nìn bí ní Yeedutun maaliŋunee, Seemaya nì Usiyeel nìn bí.

¹⁵Bi nìn kóoǹ bi-nabiyaamu ki kpáfì, ki ŋá bi-ba circir ní ki dɔ́miń ki ŋá ti-Dindaan Diiku circir ki nóó nì ubɔti nín tīī mara uŋyee nì ti-Dindaan nyɔɔbundi nín bí yii bí ŋá puee.

¹⁶Bisaraaŋaliibi nìn kɔ́ ti-Dindaan Diiku poon kí ŋá-kù circir. Bi nìn nyántì tin kɔkɔ nìn pée bí circir kɔŋkooŋŋun ki sá tijɔkɔndi wantee dicindin. Leefii yab nìn nyántì tiwan gbanti kɔkɔ ki cáa fá Seedrɔn tantakalin.

¹⁷Uŋmapeekaa wimpeepeekaaŋu dal ní bi kíĺ kunimbɔtidii ŋāŋkitam kí ŋá-ku circir. Iwiin inii dalee bi nìn ŋáŋkì ki bàn̄ kunaakoou kun bí kunimbɔtidii dikpaaŋku nyɔkɔpuee. Bi nìn gíti dū iwiin inii ní ki túń ditundi ki ŋáŋkì ti-Dindaan Diiku kɔkɔ. Uŋmapeekaa, iwiin saalku nì ŋubɔ dal ní bi dóò atuun kɔkɔ.

¹⁸Niinee ní Leefii yab nín cá ubɔti Eeseekiyaasi cee ki bí-u yii: «Ti ŋá ti-Dindaan Diiku kɔkɔ circir ki dóò, ki kpáaǹ saraawɔkaa faŋŋu nì teebil un pu bi pāantí kpɔnɔb bin bi cáa ŋáań ti-Dindaan saraabee, nì tin kɔkɔ bi cáa tūǹ u-pu ditundee.

¹⁹Ŋyunti ŋun Akaasi nìn sá ubɔti ki fātì u-boon ki tīī ti-Dindaan ki nyántì tiwan tiŋyee, ti fātìi gíiǹní-tì ki ŋá-tì circir. Tiwan gbanti bí nsaraafan nyɔkɔpu.»

²⁰Kutaa wúntì kutaafaau pɔ̀lpɔlee ní ubɔti Eeseekiyaasi kóoǹ kitiŋin bɔtibiliŋ ki kpáfì ní u nì bi nín jɔ́ḿ kunimbɔtidiin.

²¹U nìn yāntì bi cáań inajaa iluli nì ipijaa iluli nì apibil aluli nì iŋɔjaa iluli bí dūú ŋá ubɔti cindin yab nì circir kɔŋkooŋŋu nì Juuda yab pu ikpiti pɔ̄tam saraau. Ubɔti nìn tīī bisaraaŋaliibi Aarɔn naantiibee mara yii bí dū tiwaŋkutee kí ŋá saraabi ti-Dindaan saraafaŋŋu pu.

²²Bi nìn lāntì inajaayee ní bisaraaŋaliibi dū fatiku ki yāaǹ nsaraafan pu. Míǹ boonee ní bi lāntì ipijaa ní ki dū i-fatikuu ki yāaǹ nsaraafan pu, ní ki dāa lāntì apibil ní ki dū ŋi-fatikuu ki yāaǹ nsaraafan pu.

²³Míǹ boonee ní bi cáań ikpiti pɔ̄tam ŋɔjaayee ubɔti nì samaa nimbiin. Bíǹ nìn dū bi-ŋalii ki páaǹ i-pu.

²⁴Bisaraaŋaliibi nìn lāntì-i ní ki dū fatiku ki yāaǹ nsaraafan pu, Isirayeel yab kɔkɔ ń ká bi-kpitii pɔ̄tam. Di sá yii ubɔti nìn tīī mara bí ŋá saraawɔkaa nì ikpiti pɔ̄tam saraau kí tīī Isirayeel yab kɔkɔ.

²⁵Ubɔti nìn dū Leefii yab ki síiǹ kunimbɔtidiin ní bi ŋúb́ cancakantib nì tibati nì saŋgub ki nóó nì Daafiidi nì ubɔti bɔnaatiliibi Gaadi nì Natan nín nìn yóoǹ puee. Di sá yii ti-Dindaan nìn dī u-bɔnaatiliibi gbanti pu ní ki tīī mara nee.

²⁶Leefii yab nìn cūtìi yúl̀ bi-paaŋŋu pu ki ŋúb́ tiwambɔɔkaal tin Daafiidi nìn kpítèe. Bisaraaŋaliibi mun nìn cūtìi yúl̀ ki ŋúb́ bi-kantáŋŋi.

²⁷Eeseekiyaasi nìn pú kinyɔkɔ yii bí tūū saraawɔkaa nsaraafan pu. Ŋyunti ŋun bi kíĺ ki bíi tùutī saraawɔkaayee ní bilaŋgaaliibi kíĺ ki bíi gà ilan ki nyɔ́ŋkí ti-Dindaan. Bi nìn búǹ akantán nì tibɔɔkaal tin Isirayeel bɔtiu Daafiidi nìn kpítèe.

²⁸Samaa kɔkɔ nìn tātìi gbāaǹ ki bíi jáaḿ Unimbɔti ní bilaŋgaaliibi gà ilan ní bikantámbunliibi búǹ míǹ áli bi dāa ŋá saraawɔkaa ki dóò.

²⁹Ŋyunti ŋun bi ŋá saraabi ki dóòyee ní ubɔti nì bin kɔkɔ nìn bí u-cee niinee tātìi gbāaǹ bi-yigbeeŋi tūū kitiŋ ki jáam̀ Unimbɔti.

³⁰Míǹ boonee ní ubɔti Eeseekiyaasi nì abɔtibilee bí Leefii yab yii bí dū Daafiidi nì Unimbɔti bɔnaatiliu Asafi laŋyi in bi nìn náańee kí nyɔ̄ŋkì ti-Dindaan. Leefii yab nìn gāā ilan ki nyɔ́ŋkì ti-Dindaan nì dipɔɔpindi. Míǹ boonee ní bi mun tātìi gbāaǹ ki jáam̀ Unimbɔti.

³¹Niinee ní Eeseekiyaasi yōoǹ dinyɔɔbundi ki bí yii: «Kɔŋkɔnnee nimbi bin ŋúbiń saraabi kí tīī ti-Dindaanee, ní cáaḿmaan ni-saraabi nì ni-wampɔkaati tí dūú ŋá saraabi kunimbɔtidiin kí nyɔ̄ŋkì ti-Dindaan.» Niinee ní samaa cáań tiwaŋkuti ní bi dūu ŋá saraabi ki nyɔ́ŋkì ti-Dindaan. Bin nìn gíti cáá tinitee nìn cáań tiwaŋkuti bi dūu ŋá bisaraawɔkaabi.

³²Bi nín nìn cáań tiwaŋkuti tin bi dūu ŋá bisaraawɔkaabee nìn nyáń inaa imuŋku ita nì saalaa, ipijaa dilaataal nì apibil alaataa ali.

³³Tiwaŋkuti tin bi nìn dūu ŋá saraabi bin kíǹee nìn nyáń inaa alaataa aluu, ipii nì iŋoobu kutukub bita.

³⁴Bisaraaŋaliibi kaa nìn náaǹ kí ŋmā kí lēē tiwaŋkuti tin bi nìn dūu ŋá bisaraawɔkaabee gbaŋyi, an puee bi-nabiyaamu Leefii yab nìn tútuǹ-bi ní bi túń ditundi gbanti ki dāa dóò. Ŋyunti gbanti muee, bisaraaŋaliibi bin kíǹee mun ŋá bi-ba circir ki dóò, di sá yii Leefii yab nìn gíti yáb́ ki ŋá bi-ba circir ki jítiǹ bisaraaŋaliibi.

³⁵Kí kūtì muee, bisaraawɔkaabi nìn wīikí ní an nìn gíti bàlifī yii bí wà mpèé saraabi kpam ní kí fá ndaam min bi nìn cāabìń nì bisaraawɔkaabi waŋkutee. Míǹ ní bi nìn ŋá ní ki fātìi kíĺ ki bíi ŋáań saraabi kunimbɔtidiin.

³⁶An nìn mɔ́ɔkiǹ Eeseekiyaasi nì samaa kɔkɔ Unimbɔti nín nìn tútuǹ-bi bi ŋúń ki ŋá kuŋyee, di sá yii atuun nìn pée cōom̀ ní malaa malaa.