Read Ntcham 2 Chroniques 30 Bible Online

2 Chroniques 30 - Ntcham bible

2 Chroniques 30

¹Eeseekiyaasi nìn tú binib Isirayeel yab nì Juuda yab kɔkɔ cee, ní ki ŋmàn̄ tigbɔn ki tīī Eefiraayiim nì Manasee naantiibi yii bí dāan̄ Jeerusaleem kunimbɔtidiin bí jī Dilákatil jiŋaaliu kí jāam̀ ti-Dindaan, Isirayeel Nimbɔtiu.

²Ubɔti nì u-kpambaliŋ nì samaa kɔkɔ nìn kíí yii bí jī Dilákatil jiŋaaliu gbanti uŋmaliliiti poon ní.

³Di sá yii ŋyunti ŋun ní an bàà sá bí jī jiŋaal gbantee, baa nìn ŋúń ki jíń-u[83], kun puee bisaraaŋaliibi bin nìn ŋá bi-ba circiree kaa nìn náaǹ. Kí kūtì muee, samaa mun kaa nìn ŋúń ki kpáfì Jeerusaleem.

⁴Bi nín nìn bɔ́ntì kí ŋá puee nìn kítì ubɔti nì samaa kɔkɔ cee.

⁵Bi nìn tú binib Isirayeel yab kɔkɔ cee, kí yòon̄ Beerseeba kí cáá sāā Daani, bí yíiń-bi bí dāan̄ Jeerusaleem kí jī Dilákatil jiŋaaliu kí jāam̀ ti-Dindaan, Isirayeel Nimbɔtiu. Binib tikpil kaa nìn gíti jíń jiŋaal gbanti kii an nín ŋmàn̄ ki síiǹ bí nīn jīǹ-u puee.

⁶Binib bin bi nìn túee nìn yōoǹ tigbɔn tin ní ubɔti nì u-kpambaliŋ ŋmàn̄ee ki yìin̄ Isirayeel nì Juuda timmu kɔkɔn, ki báakì ki nóó nì ubɔti nín síiǹ mara uŋyee yii: «Isirayeel yab, nimbi bin ŋmátì ki nyáń Asuur bɔtiu ŋaanee, ní fàtīí gítiḿmaan ti-Dindaan, Abraam nì Isaaki nì Isirayeel Nimbɔtiu cee, ní u mun ń fàtīí gítiń ni-cee.

⁷Ní taa nín̄ bí kii ni-baabi nì ni-nabiyaamuee. Bíǹ kaa nìn yúl̀ nì ti-Dindaan, bi-naanjab Nimbɔtiu deedee. Ti-Dindaan nìn dū-bi ki líiǹ dinàandi, kii ni nín wāĺ pu nan ní.

⁸Ní taa ŋá mpɔɔgbifin kii ni-naanjabee. Ama ní sìntī ni-ba taapu kí tīī ti-Dindaan. Dāam̄maan u-saraafaŋŋu ŋun ní u ŋá circir kí nīn cáa cá jaanjaanee poon, ní kí jāam̀ ti-Dindaan ni-Nimbɔtiu, án nín làá ŋá pu u-ŋuul ń sɔ̀ŋkì ni-puee.

⁹Ni yaa fātìi gítìń ti-Dindaan ceeyee, bin cúú ni-nabiyaamu kuyuŋuee làá dàkà-bi tiniti ní kí yàntī bí fàtīí gítiń kitiŋ nee poon. Di sá yii ti-Dindaan ni-Nimbɔtiu cáá tiniti ní ki sūǹ isaa. Ni yaa lafun fātìi gítìń u-cee, waa làá fàtī u-boon kí tīī-ni.»

¹⁰Bin bi túee nìn yìin̄ Eefiraayiim nì Manasee timmu kɔkɔn kiba kiba ní ki cūtìi nyáń Sabulɔn tiŋkin, ama ní binib nìn lāā-bi ki bèel̄-bi.

¹¹Nì míǹ kɔkɔee, Aseer nì Manasee nì Sabulɔn naakɔtin binib biba nìn sīntiǹ bi-ba taapu ki kíí ki dɔ́miń Jeerusaleem.

¹²Juuda tiŋkinee, Unimbɔti nìn yāntì binib kɔkɔ ŋá kii unibaantee, ki kíí ki ŋá kii ubɔti nì u-kpambaliŋ nín bí yii bí ŋá puee, ki nóó nì ti-Dindaan nín síiǹ puee.

¹³Dinikitikpaandi di nìn kpáfì Jeerusaleem dibindi ŋmaliliitiu poon kí jī jiŋaal un poon ní bi ŋmóò kpɔnɔb bin kaa cáá ŋkpɔnɔnyɔkɔee. Binib bin nìn kpáfèe nìn baasii náaǹ ní.

¹⁴Bi nìn gbáń ki wīil̀ isaraafan in nìn bí Jeerusaleem tiŋkinee. Bi nìn kpīkitì isaraafan in pu bi nìn tùutī talaalutuukaayee, ní ki kóoǹ ki cáa fá Seedrɔn tantakalin.

¹⁵Uŋmaliliiti ŋwiin ŋubɔ kpá saalku dal ní bi lāntì tiwaŋkuti ki jíń Dilákatil jiŋaaliu. Icoo nìn cúú bisaraaŋaliibi nì Leefii yab ní bi ŋá bi-ba circir ní ki cáań bisaraawɔkaabi kunimbɔtidiin.

¹⁶Bi nìn cūtìi fōō bi-paaŋyi kunimbɔtidiin ki nóó nì Unimbɔti niliu Mooyiisi nín nìn síiǹ mara bí nīn ŋáań puee. Leefii yab nìn cáá fatiku ki nàatī bisaraaŋaliibi ní bíǹ cáa yàantí nsaraafan pu.

¹⁷Samaa kansikinee, binib tikpil kaa nìn ŋá bi-ba circir. Míǹ puee baa nìn ŋūǹ kí ŋá saraa kí tīī ti-Dindaan. An puee Leefii yab nìn fōō bin kɔkɔ kaa nìn bí circir gbantee waŋkuti ki lāntì ki tīī-bi.

¹⁸Binib tikpil, cilinjee Eefiraayiim nì Manasee nì Isakaar nì Sabulɔn naakɔtin yab tikpil kaa nìn ŋá bi-ba circir. Ama nì min kɔkɔ an ŋmàn̄ yii baa bàà máaǹ kí jī Dilákatil jiŋaaliu jintee, bi nìn jíń-tì. An pu ní Eeseekiyaasi nìn mēē ki tīī-bi yii: «Ti-Dindaan, sii un poon mɔ̄ee,

¹⁹dū bin kɔkɔ bíi pɔ̄ɔntí ki nyàab̀ sii ti-Dindaan Unimbɔti, bi-baabi Nimbɔtiu nee kpitii kí pɔ̄-bi, báà bi yaa kaa bí circir ki nóó nì mara nín síiǹ puee.»

²⁰Ti-Dindaan nìn fōō Eeseekiyaasi wimmeem ní ki wúń u-nibul pu.

²¹Isirayeel yab bin nìn bí Jeerusaleemee nìn dū iwiin iluli ki jíń jiŋaal un poon bi ŋmóò kpɔnɔb bin kaa cáá ŋkpɔnɔnyɔkɔee nì dipɔɔpiŋkpaandi. Baabadalee Leefii yab nì bisaraaŋaliibi nìn gà ilan ki bɔ̀ɔ́ tibɔɔkaal ki nyɔ́ŋkí ti-Dindaan.

²²Eeseekiyaasi nìn sòon̄ ki tīī Leefii yab kunyannyaau, ní bíǹ mun dū nlammɔntiim ki túń ti-Dindaan tundi nì dipɔbil diba. Iwiin iluli gbanti kɔkɔ poonee, bi nìn jíń Dilákatil jiŋaaliu jinti, ki ŋá mpèé saraabi ní ki nyɔ́ŋkì ti-Dindaan, bi-baabi Nimbɔtiu.

²³Samaa kɔkɔ nìn ká yii bí gíti dū iwiin iluli kí jī jiŋaal gbanti, ní bi gíti dū iwiin iluli ki jíń jiŋaal gbanti nì dipɔɔpindi.

²⁴Di sá yii Juuda bɔtiu Eeseekiyaasi nìn tīī samaa inajaa kutuku, ipii nì iŋoobu kutukub biluli, ní akpambal mun tīī inajaa kutuku nì ipii nì iŋoobu kutukub saalaa. Bisaraaŋaliibi kupaau nìn ŋá bi-ba circir.

²⁵Juuda yab kɔkɔ nìn bí dipɔɔpindin, ki kpáaǹ bisaraaŋaliibi nì Leefii yab nì bin nìn nyánní Isirayeel beelinee, nì bin nìn dɔ́miń ki kíǹ kóò Juuda beelinee.

²⁶Dipɔɔpiŋkpaandi di nìn bí Jeerusaleem, di sá yii kí yòon̄ Isirayeel bɔtiu Daafiidi jipɔɔn Saloomɔn yuntiŋuee, baa ti pée jíń jiŋaal gbanti míǹ Jeerusaleem tiŋkin.

²⁷Bisaraaŋaliibi nì Leefii yab[84] nìn yíkìi yúl̀ ní ki mēē ki bīiǹ samaa pu. Unimbɔti nìn fōō bi-wimmeem, di sá yii mì nìn bàn̄ yilpu, u-circir kɔŋkooŋŋu laŋki.