Read Ntcham 2 Chroniques 32 Bible Online

2 Chroniques 32 - Ntcham bible

2 Chroniques 32

¹Deedee tuuŋŋi nee kɔkɔ boonee ní Asuur bɔtiu Seenakeeriibi dɔ́miń ki kɔ́ Juuda beelin. U nìn māntìi tú ntimu mun bi máń agun ki túee, di sá yii u nìn là kí já kí fōō-mu.

²Eeseekiyaasi nìn ká yii Seenakeeriibi dɔ́miń kí já nì Jeerusaleem yab.

³Niinee ní u sòon̄ nì u-kpambaliŋ nì u-janjakpilib yii u là kí ŋéeb́ nnyimbul ŋun bí kitiŋ guŋŋi boonee, ní bíǹ gbìl̄ ki tīiǹ-u ní ki tútúǹ-u.

⁴Ní samaa nyáń ki náaǹ ní ki dū inyimbul kɔkɔ nì kibùmbiki kin pùub̀ kitiŋ gundi boonee ki ŋéeb́ ki lī yii: «Asuur yab ń taa dāan̄ doo kí ká nnyim tikpil.»

⁵Eeseekiyaasi nìn ká dipɔbil ki fātìi bíi māā digundi din bi nìn máń ki tú kitiŋee laakin bátì bátì ki lítèe. U nìn máń ndibiyaamu mun poon bi kàal̀ sintilee ki tɔ́kɔǹ digundi pu. U nìn gíti máń digundi diba dipeekaalee boon, ní ki ŋáŋkì kudii kun bi yíì Miiloo[88], ku bí Daafiidi Tiŋkinee. U nìn gíti mɔ́ɔ́ ŋkpamu nì agbampɔɔ tikpil.

⁶U nìn lēē bijanjakpilib bin làá nīn kpòotī samaayee. U nìn kóoǹ bi-kɔkɔ ki kpáfì u-cee kitiŋ punyɔkɔki caŋin ní ki tīī-bi kunyannyaau yii:

⁷«Ní pɔ́ɔǹ ni-ba kí ká kunyannyaau! Ní taa fàŋkì tiba. Ní taa fàŋkì Asuur bɔtiu nì dijanjakitikpaandi din táá-u nee. Di sá yii mpɔn bí ti-cee ki jítiǹ u-cee.

⁸Binib pɔŋŋu di bí u-cee, ama timbi Dindaan, ti-Nimbɔtiu un di làá jòoń-ti kí já kí tīī-tee di bí ti-cee.» Juuda bɔtiu Eeseekiyaasi nyɔɔbuŋŋi gbanti nìn tīī samaa kɔkɔ kunyannyaau.

⁹Míǹ boonee ní Asuur bɔtiu Seenakeeriibi nì u-janjakitil kɔkɔ cūtìi māntì ki tú Lakiisi[89] tiŋki kí já nì kì. Niin ní u tú u-janjakpilib biba ubɔti Eeseekiyaasi cee Jeerusaleem nì Juuda yab bin kóò Jeerusaleemee ki bí-bi yii:

¹⁰«Asuur bɔtiu Seenakeeriibi nín sòon̄ puee sèé: <Ba pu ní ni máká ní ki gbíntìi kā Jeerusaleem tiŋki kin bi māntìi tú kí jáǹ-kì nee ní?

¹¹Eeseekiyaasi bíi tùkù-ni yii ti-Dindaan, ni-Nimbɔtiu làá fīī-ni kí nyāntí man Asuur bɔtiu ŋaan. Ama u bíi mɔ́ntí-ni kí yàntī ŋkùm nì nnyinnyoo ń kpɔ̀-ni ní.

¹²An kaa sá Eeseekiyaasi gbanti di kúntì iwaatootipaan nì isaraafan ní ki bí Juuda nì Jeerusaleem yab yii bí nīn gbàantí nsaraafan mbambaanti taapu kí nīn ŋáań saraabi nsaraafan gbanti baba puɔɔɔ?

¹³Naa nyí m-naanjab nì man m-ba nín ŋá duulinya nibuliŋ kɔkɔ pueeee? Atimbun gbanti diba waal ŋúń ki fīī di-tiŋki ki nyántì m-ŋaanaaa?

¹⁴Atimbun ŋin m-baabi nìn nāaǹee, dilal waal ŋúń ki fīī-dì ki nyántì m-ŋaan? Kin an làá dī mana ní ni-Nimbɔtiu ń ŋmā kí fīī-ni kí nyāntí m-ŋaan?

¹⁵Ní taa yàntī Eeseekiyaasi ń mɔ̄ntì-ni kí ŋmàtiǹ-ni! Ní taa fōō Eeseekiyaasi kí kíí, di sá yii ditimbundi diba àá dibeel diba waal kaa ŋúń ki fīī di-nib ki nyántì m-ŋaan àá m-baabi ŋaan. Kin ataa aŋa pu ní nimbi dàkafī yii ni-Nimbɔtiu làá ŋmā kí fīī-ni kí nyāntí m-ŋaan?>»

¹⁶Seenakeeriibi tɔntɔnliibi nìn gíti nìkī ki sòon̄ ti-Dindaan Unimbɔti nì u-tɔntɔnliu Eeseekiyaasi tibɔfan.

¹⁷Asuur bɔtiu nìn ŋmàn̄ tigbɔn mun ki sīī ti-Dindaan, Isirayeel Nimbɔtiu. U nìn sòon̄ tigbɔn gbantin yii: «Kii duulinya timbuŋŋi ŋin kíǹee waaŋi nín kaa ŋúń ki fīī ŋi-nib ki nyántì m-ŋaan puee, míǹ ní Eeseekiyaasi mun Nimbɔtiu kaa làá ŋmā kí fīī u-nibul kí nyāntí m-ŋaan.»

¹⁸Seenakeeriibi tɔntɔnliibi nìn tátí mpɔn eebru sooŋyi poon kí ŋmā kí fàaǹ binib bin nìn bí digundi puee kí yɔ̀tī bi-wunti, án nín làá ŋá pu bí ŋmā kí fōō kitiŋee.

¹⁹Bi nìn pée sòoǹ Jeerusaleem yab Nimbɔtiu pu kii bi nín sòoǹ anibul ŋin kíǹee waaŋi ŋin unil dū u-ŋal ki kpítèe puee ní.

²⁰Niinee ubɔti Eeseekiyaasi nì Unimbɔti bɔnaatiliu Yeesaya, Amɔtisi jipɔɔn dū tibɔtee ki ŋá ŋwimmeemin ní ki kúuǹ ki yíiń Unimbɔti.

²¹Ti-Dindaan nìn túnní u-tuuŋŋu ŋubɔ Asuur yab janjanaapaal pu ní ŋu dɔ́miń ki kūū Asuur yab janjaliibi bibaatandambi kɔkɔ nì bijanjakpilib nì bikpilib kɔkɔ. Icoo nìn cúú Asuur bɔtiu ní u nín gítí u-tiŋkin. Dalba u kɔ́ u-waadiikunee, ní úǹ u-ba jipɔmbi dū ntàataajimu ki kūū-u.

²²Míǹ ní ti-Dindaan ŋá ní ki fīī Eeseekiyaasi nì Jeerusaleem yab ki nyántì Asuur bɔtiu Seenakeeriibi ŋaan nì bi-nannanliibi kɔkɔ ŋaan. U nìn wúń bi-pu ijaan kɔkɔ pu.

²³Binib tikpil nìn cáań saraabi Jeerusaleem ki tīī ti-Dindaan ní ki cáań tiwampɔkaal ki pú Juuda bɔtiu Eeseekiyaasi. Kí yòon̄ ŋyunti gbanti kí nīn cée ní atimbun kɔkɔ nib kíǹ ki tɔ́-u.

²⁴Ŋyunti gbantee, Eeseekiyaasi nìn búŋkì ki làá kpú. U nìn mēē ti-Dindaan ní úǹ tīī-u kudaaŋŋu yii u làá ká dicáaǹdi.

²⁵Ama u nìn kɔ́ dilambilin kaa béè tiŋan tin ní Unimbɔti ŋá ki tīī-uee. An puee ti-Dindaan ŋuul nìn jéetì u nì Jeerusaleem nì Juuda yab pu.

²⁶Min kamaa Eeseekiyaasi nìn kɔ́ dilambilinee, u nìn sīntì u-ba taapu, u nì Jeerusaleem yab. An puee ti-Dindaan ŋuul kaa nìn jéetì bi-pu ŋyunti ŋun Eeseekiyaasi dáá bí dimaŋfalinee.

²⁷Eeseekiyaasi nìn ká tigaajati tikpil tikpil nì tinyool mun. U nìn kpáafì animbil nì sindaariya nì ataŋkpamɔnti nì talaalub nì agbampɔɔ nì tigaajawan kɔkɔ nì ti-bulifi.

²⁸U nìn máń adiin ki kpáafì tijimpin nì ndamam nì ŋkpam. U nìn gíti ŋá tinaabakal ki tīī u-naai nì u-piii.

²⁹U nìn máń ntimu ní ki nìn cáá tipicaŋkpun nì tiŋɔcaŋkpun nì tinacaŋkpun tikpil, di sá yii Unimbɔti nìn tīī-u tigaajati tikpil.

³⁰Eeseekiyaasi di nìn ŋéeb́ Giiyɔn nyimbulnimbil din nìn bí digundi boonee ní ki cátì nnyinsan ki dáaĺ nnyim ki kɔ́ǹ Daafiidi Tiŋkin, ŋwìiń jeetilaŋki pú[90]. An nìn pée bútì Eeseekiyaasi u-tuuŋŋi kɔkɔ poon ní.

³¹Ama ŋyunti ŋun ní Babiloon kpootiliibi nìn tú binib bí dāan̄ kí bàlifì kí mɔ̀tīí béé maamaaci tuuŋŋi ŋin jítì u-tiŋki puee, Unimbɔti nìn kākatì u-ba ki yāntì-u kí ŋmā kí cɔ̄ŋkì-u kí kpèè kun di bí u-pɔbilinee.

³²Eeseekiyaasi tuuŋŋi ŋin kɔkɔ kíǹee nì u nín yúl̀ Unimbɔti deedee puee kɔkɔ ŋmàn̄ ki kā Unimbɔti bɔnaatiliu Yeesaya, Amɔtisi jipɔɔn leedakal gbɔŋkun nì Juuda yab nì Isirayeel yab bɔtiibi gbɔŋkun.

³³Eeseekiyaasi kpíì ki cūtìi ŋàl̄ u-baabi ní bi síb́-u Daafiidi naantiibi kaakuliŋin yilpu pú. Juuda yab kɔkɔ nì Jeerusaleem yab nìn súń u-kpool ki tīī-u tinyool. U-jipɔɔn Manasee di nìn fōō u-yil ki kpántì ubɔti.