Read Ntcham 2 Chroniques 33 Bible Online

2 Chroniques 33 - Ntcham bible

2 Chroniques 33

¹Manasee nìn cáá abin saalaa nì ali ní ki kpántì ubɔti ní ki kāl̀ Jeerusaleem ki jíń dibeel abin aŋmoo kpá imuŋku ita.

²U nìn ŋá tin kaa kítì ti-Dindaan nimbiinee. U nìn ŋá ntimbiil tuuŋŋi ŋin ní atimbun ŋin ti-Dindaan nìn jìn̄ ki fōō bi-tiŋki ki tīī Isirayeel yabee nìn ŋáańee ní[91].

³U nìn fātìi ŋáŋkì iwaatootipaan in u-baa nìn gbáń ki bíil̀ee, ní ki máń isaraafan bí nīn ŋáań i-pu saraabi ki tìì diwaal Baal. U nìn cóoǹ iwindɔ ní ki gbāaǹ ki jáam̀ iŋmalbi in kɔkɔ bí kutaa puee.

⁴U nìn máń isaraafan iba mun ti-Dindaan Diikun, min kɔkɔ ti-Dindaan nìn lī yii: «Jeerusaleem niin ní m làá nīn lèekī m-ba ki dàkèe[92].»

⁵U nìn gíti máń isaraafan ti-Dindaan Diiku ciŋŋi aliitilin bí nīn ŋáań saraabi ki tìì iŋmalbi in bí kutaa puee.

⁶U nìn dū u-jipɔmbi ki wùn̄ ŋŋmi ki ŋá saraabi[93] Been Inoom tantakalin. U nìn būū tibɔɔl ki ŋáań kukpaŋkpantiiu tuuŋŋi ní ki bàlifī bitaŋkpiibi kí béé tin bí ki dòońee. U nìn ŋá tin kaa pée kítì ti-Dindaan nimbiinee ki gbítì u-ŋuul.

⁷U nìn máń diwaal ki síiǹ ti-Dindaan Diikun. Ama ti-Dindaan nìn tùkū Daafiidi nì u-jipɔɔn Saloomɔn yii: «Kudii nee poon nì Jeerusaleem tiŋki kin m lēē Isirayeel naakɔti kɔkɔ kansikinee poon ní m làá nīn pée lèekī m-ba ki dàkà.

⁸M-nibooliŋu yaa tɔ́ m-bɔkpaaŋi kɔkɔ nì m-marab bin kɔkɔ m-tɔntɔnliu Mooyiisi tīī-bee, m kpá kí yàntī bí nīn tú ki yìiǹ kí wàatī kitiŋ kin ní m tīī bi-naanjabee»[94].

⁹Ama Manasee nìn yāntì Juuda yab nì Jeerusaleem yab gáatì, áli gba bi gíti ŋá ikpiti ki jítiǹ atimbun ŋin ti-Dindaan nìn kúntì ki fōō bi-tiŋki ki tīī Isirayeel yabee.

¹⁰Ti-Dindaan nìn sòon̄ nì Manasee nì u-nibul, ama baa nìn fātìi tɔ́.

¹¹Niinee ní ti-Dindaan cáań Asuur bɔtiu janjakpilib ki tɔ́ bi-pu. Bi nìn cúú Manasee ní ki dū abɔmbil ki kpàl̄ u-nyɔɔkpaweeŋyi, ní ki dū tasa kusakai ki bóob́-u mili pu ní ki cáá-u ki cūnnì Babiloon tiŋkin.

¹²U nìn nyàab̄ ti-Dindaan u-Nimbɔtiu u-nimbinaamandi poon ní ki sīntiǹ u-ba u-baabi Nimbɔtiu nimbiin.

¹³U nìn mēē-u ní an gbēē Unimbɔti ní u pílifì u-wimmeem ní ki yāntì u fātìi gítì Jeerusaleem u-beelin. Niinee ní Manasee nín béè yii ti-Dindaan di sá Unimbɔti.

¹⁴Míǹ boonee, ní u máń Daafiidi Tiŋki boonee diguŋfɔkɔl diba. Digundi gbanti nìn dī Giiyɔn nyimbuliŋu ŋwìiń nyalaŋki pú ní ki kpākaǹ Seedrɔn tantakal ki cáa sāā Ijɔm punyɔkɔki, ní ki fātìi pɔ́ĺ ki māntì Oofeel gbantaŋki ki tú. U nìn kāaǹ bijanjakpilib Juuda timmu mun kɔkɔ bi nìn máń agun ki túee poon.

¹⁵U nìn nyántì awaa ŋin u nìn cáań ki síiǹ kunimbɔtidiinee nì kunaŋu kun u nìn máń ki síiǹ niinee. U nìn gbáń ki wīī isaraafan in u nìn máń ti-Dindaan gbantaŋki pu nì Jeerusaleemee kɔkɔ, ní ki nyántìi fá kitiŋ kpaanceetiŋu.

¹⁶U nìn fātìi máń ti-Dindaan saraafaŋŋu ní ki ŋá mpèé saraabi nì ijaam saraabi ŋu-pu. U nìn tīī Juuda yab mara yii bí nīn jáaḿ ti-Dindaan, Isirayeel Nimbɔtiu.

¹⁷Nì míǹ kɔkɔee, binib nìn gbíntìi ŋáań saraabi iwaatootipaan pu, ama bi nìn ŋáań ki tìì ti-Dindaan bi-Nimbɔtiu ní.

¹⁸Manasee tuuŋŋi ŋin kíǹee, u nín mēē u-Nimbɔtiu nì anyɔɔbun ŋin ní Unimbɔti bɔnaatiliibi fōō ti-Dindaan, Isirayeel Nimbɔtiu cee ki dūu nāatì-uee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

¹⁹U nín nìn mēē Unimbɔti pu nì úǹ nín kíí-u puee, u-kpitii nì u nín kaa yúl̀ Unimbɔti deedee puee, ipaan in pu u nìn máń iwaatootipaanee nì u nín nìn cóoǹ iwindɔ puee nì u nín nìn sīntiǹ u-ba taapu puee kɔkɔ ŋmàn̄ ki kā Oosayii maam gbɔŋkun.

²⁰Manasee kpíì ki cūtìi ŋàl̄ u-baabee ní bi síb́-u u-cindin. U-jipɔɔn Amɔn nín nìn fōō u-yil ki kpántì ubɔti.

²¹Amɔn nìn cáá abin mmuŋku nì ali ní ki kpántì ubɔti. U nìn kāl̀ Jeerusaleem ní ki jíń dibeel abin ali.

²²U nìn ŋá tin kaa kítì ti-Dindaan nimbiinee kii u-baa Manasee nín nìn ŋá puee. U nìn ŋá saraabi ki tīī awaa ŋin ní u-baa nìn máńee ki jáam̀-ŋi.

²³Ama úǹ kaa nìn sīntiǹ u-ba taapu ti-Dindaan nimbiin kii u-baa Manasee nín nìn sīntiǹ u-ba taapu puee. Úǹ nìn gíti ŋá ikpiti ki jítiǹ u-baa gba.

²⁴U-tɔntɔnliibi nìn bɔ́ntì u-pu ní ki kūū-u u-naakookun.

²⁵Ama Juuda yab nìn kūū bin kɔkɔ nìn kūū Amɔŋyee ní ki dū u-jipɔɔn Joosiyaasi ki kāaǹ ubɔti u-yil pu.