Read Ntcham 2 Chroniques 34 Bible Online

2 Chroniques 34 - Ntcham bible

2 Chroniques 34

¹Joosiyaasi nìn cáá abin anii ní ki kpántì ubɔti. U nìn kóò Jeerusaleem ní ki jíń dibeel abin mmuŋku nì saalaa nì diba[95].

²U nìn ŋá tin kítì ti-Dindaan nimbiinee. U nìn nóó u-naanja Daafiidi tabɔbiliŋ ní deedee, waa kpēetì ki cūtì ŋgan púɔɔɔ, ŋgiil pú.

³U nín jíń dibeel abin anii poon ki dáá sá unaacimpɔɔnee, ní u kíĺ ki bíi nyàab̀ u-naanja Daafiidi Nimbɔtiu. U nín jíń dibeel abin saalaa nì ali poonee, ní u kíĺ ki bíi kúntí iwaatootipaan nì iwindɔ nì awaa ŋin bi kpítèe nì ŋin bi dūntì tikúti ki mɔ́ɔ́yee Juuda tiŋkin nì Jeerusaleem.

⁴U-nimbiin ní bi gbáń ki wīī diwaal Baal saraafaŋyi nì talaalutuukaa saraafaŋyi in nìn tɔ́kɔ́ i-puee. Bi nìn gāatì iwindɔ ki fá ní ki nàn̄ awaa ŋin bi kpítèe nì ŋin bi dūntèe[96] dúsi dusi ki dūu yāaǹ bin nìn ŋá saraabi ki tīī-bee kaakuliŋ pu.

⁵U nìn dū awaa gbanti saraaŋaliibi kpabiŋ ki tūū bi-saraafaŋyi pu ŋŋmi[97]. Míǹ ní u nìn ŋá ki fíntì Juuda nì Jeerusaleem ki nyántì tijɔkɔndin.

⁶U nìn ŋá míǹ mbaantiim Manasee nì Eefiraayiim nì Simeeyɔn ki kpáaǹ Neefitalii timmun nì ntimu mun māntìi tú-muee.

⁷U nìn gbáń ki wīī isaraafan, ki gāatì iwindɔ ki fá ní ki nàn̄ awaa dúsi dusi ní ki kpéelikì talaalutuukaa saraafaŋyi Isirayeel beel kɔkɔn. U ŋá míǹ ki dóòyee ní ki nín gítí Jeerusaleem tiŋkin.

⁸Joosiyaasi nín jíń dibeel abin saalku nì ata poon ki fíntì Isirayeel tiŋki nì kunimbɔtidii ki nyántì tijɔkɔndin ki dóòyee, ní u tú Asaliya jipɔɔn Safan nì Jeerusaleem Gɔminau Maaseeyawuu nì Joowakaasi jipɔɔn Yoowa, ubɔti gbaŋŋmaliu bí cùú ŋāŋkì ti-Dindaan, u-Nimbɔtiu Diiku.

⁹Binibee nìn nín cá usaraaŋakpil Yilkiya cee. Bi nìn dū animbil ŋin bi cáań kunimbɔtidiinee ki tīī-u. Leefii yab bin nìn cí kipunyɔkɔee di nìn fōō animbil gbanti Manasee yab nì Eefiraayiim yab nì Isirayeel yab bin kɔkɔ kíǹee nì Juuda yab nì Beenjameen yab bin nìn kóò Jeerusaleemee cee.

¹⁰Bi nìn dū animbilee ki ŋúbiǹ bin bi nìn lēē bí nīn kpèé ditundi ti-Dindaan Diikunee, ní bíǹ cáa pà bin bí niin ki ŋáŋkí ti-Dindaan Diikuee.

¹¹Bi nìn tīī kapintab nì bidimaliibi animbil bí dūú dā ataŋkpee ŋin bi kpítèe nì idɔ in bi làá dūú kpáá kudiiyee, kí fàtīí mā adiin ŋin Juuda bɔtiibi nìn yāntì an bíil̀ee.

¹²Binibee nìn túń ditundee deedee. Leefii yab Yayati nì Oobadiya bin sá Meerarii maaliŋunee nì Seekariya nì Meesulam bin sá Keeyaati maaliŋunee di nìn kpèé-bi. Leefii yab bin nìn ŋūǹ tibɔɔkaal tiŋanee biba

¹³nìn kpèé bin tūntí tiwanee nì bitɔntɔnliibi kɔkɔ, báà udaan tundi yaa nìn sá diŋyee. Leefii yab kansikinee, biba mun nìn sá bigbaŋŋmaliibi ní biba sá bikàliŋkpilib ní bin kíǹ sá bipunyɔɔciitiliibi.

¹⁴Ŋyunti ŋun bi nìn bíi nyāntí animbil ŋin bi nìn cáań ti-Dindaan Diikunee ní usaraaŋakpil Yiilkiyaawuu ká ti-Dindaan marau un u nìn dūu tīī Mooyiisee gbɔŋku.

¹⁵Yiilkiyaawuu nìn bí ugbaŋŋmal Safan yii: «M ká Marab gbɔŋku ti-Dindaan Diikun.» U lī mimmee ní ki dū kugbɔŋuee ki tīī-u.

¹⁶Safan nìn cáań kugbɔŋuee ki tīī ubɔti ní ki kpáàa tùkū-u ditundi nín bíi còom̄ puee. U nìn bí-u yii: «Tin kɔkɔ a bí timbi a-tɔntɔnliibi ń ŋée, ti bíi ŋáań.

¹⁷Bisaraaŋaliibi yōoǹ animbil ŋin bí ti-Dindaan Diikunee ki dūu tīī bin bíi kpèé ditundee nì bitɔntɔnliibi.»

¹⁸Niinee ní ubɔti gbaŋŋmaliu Safan kútì ki tùkū ubɔti yii: «Usaraaŋakpil Yiilkiyaawuu dū kugbɔŋu kubɔ ki tīī-mi.» Safan nìn kàan̄ kugbɔŋuee ubɔti nimbiin.

¹⁹Ubɔti nín gbìl̄ tin kā Marab gbɔŋkuee poonee ní u cúú tiwan tin u pēēyee ki dáaĺ ki cátì.

²⁰Ní u tīī Yiilkiyaawuu nì Safan jipɔɔn Ayiikaam nì Miika jipɔɔn Abidɔn nì ugbaŋŋmal Safan nì u-kàliŋkpiliu Asaya mara nee yii:

²¹«Ní cùú bàlifì ti-Dindaan kí tīī man nì Isirayeel yab bin kíǹee nì Juuda yab. Ní bàlifì-u tin ŋmàn̄ ki kā kugbɔŋu nee poonee pu. Di sá yii ti-naanjab kaa pílifì u-nyɔkɔ. Baa ŋá tin ŋmàn̄ ki kā kugbɔŋu nee poonee. An pu ní ti-Dindaan gíí ti-pu diŋuul ŋkpitim pu.»

²²Niinee Yiilkiyaawuu nì bin ubɔti lēēyee nín cá Unimbɔti bɔnaatiliu Ulda cee. U-cal di nìn sá Saluum, Tiikifa jipɔɔn, Araasi naantiiu. U nìn kóò Jeerusaleem Tincaliiki Kipɔŋ poon ní. Úǹ di nìn cí bisaraaŋaliibi wampeeŋkaati ti-Dindaan Diikun[98]. Bi nìn dū tin bée ki máafì-u

²³ní u bí-bi yii: «Ti-Dindaan Isirayeel Nimbɔtiu nín sòon̄ puee sɔ̀. Ní cùú tùkù un di túnní-ni m-ceeyee yii:

²⁴<M làá cáań nnaabu kí tɔ̄ Jeerusaleem tiŋki nì bin kɔkɔ kóò ki-nee pu, kí nóó nì mbusub bin ŋmàn̄ ki kā kugbɔŋu kun ni kàan̄ Juuda bɔtiu nimbiinee.

²⁵Jeerusaleem yab dū-mi ki fá ní ki tūutì talaalub ki tīī awaa ŋin bíǹ bi-ba dū bi-ŋalii ki ŋée ki gbítì m-ŋuul. An pu ní m gíí kitiŋ nee pu diŋuul ŋkpitim pu, ní m-ŋuulee kpá kí sɔ̀ŋkì!>

²⁶Ama ní tùkù Juuda bɔtiu un di túnní-ni ní dāan̄ kí bàlifì ti-Dindaanee yii ti-Dindaan, Isirayeel Nimbɔtiu nín sòon̄ puee sèé: <A gbìl̄ tibɔti tin kā kugbɔŋu nee poonee,

²⁷ní tibɔtee gbēē-si. A nín gbìl̄ tin m sòon̄ yii an làá bàń Jeerusaleem nì ki-nib puee, a sīntiǹ a-ba m-nimbiin, ní ki dáaĺ ki cátì tiwan tin a pēēyee ní ki súń m-nimbiin. An puee ma mun gbìl̄ a-wimmeem. Man ni-Dindaan di sòon̄ míǹ.

²⁸Míǹ puee m làá yàntī á kpú kí cùú ŋàl̄ a-baabi nì ŋgbansɔŋfi ní bí síb́-si a-kaakulin. Sii kaa làá ká nnaabu ŋun m làá cáań kí tɔ̄ Jeerusaleem nì ki-nib puee.>» Ubɔti tuuŋyee nìn gítì ki dū Unimbɔti nín kíí puee ki tùkū-u.

²⁹Niinee ní ubɔti tú bi yíiń Juuda nì Jeerusaleem tindaŋkpilib ní bi kóoǹ ki kpáfì u-cee.

³⁰Míǹ boonee ní u nì Juuda yab nì bin kóò Jeerusaleemee nì bisaraaŋaliibi nì Leefii yab nì samaa kɔkɔ, kí yòon̄ bikpaambi kí cáá sāā mbiyaamu nín jɔ́ḿ kunimbɔtidiin. Niinee ní ubɔti kàan̄-bi tin kɔkɔ bi ŋmàn̄ an kā dipoondi gbɔŋku kun bi ká ti-Dindaan Diikunee.

³¹Ubɔti nìn yú u-paaŋŋu ní ki pōoǹ kí nīn yú nì ti-Dindaan deedee, kí nīn ŋúb́ u-marab nì u-dàkatam nì u-bɔkpaaŋi nì u-pɔbil kɔkɔ nì u-naŋki kɔkɔ. U nìn gíti pōoǹ kí nīn tɔ́ tin kɔkɔ ŋmàn̄ ki kā dipoondi taŋkpapilintinee.

³²Ubɔti nìn yāntì bin kɔkɔ nìn bí Jeerusaleem nì Beenjameen timmunee pōoǹ míǹ mbaantiim. Kí yòon̄ ŋyunti gbantee, bin nìn kóò Jeerusaleemee nìn ŋá ki nóó nì dipoondi din bi nìn pōoǹ bi-baabi Nimbɔtiuee.

³³Joosiyaasi nìn kúntì ntimbiil tuuŋŋi ŋin kɔkɔ ní bi nìn ŋáań Isirayeel tiŋkinee, ní ki páb́ bin kɔkɔ nìn bí Isirayeelee bí nīn jáaḿ ti-Dindaan, bi-Nimbɔtiu. An puee, u-maŋfal wiiŋyi kɔkɔ poonee, Isirayeel yab kaa nìn fātì bi-boon ki tīī ti-Dindaan, bi-baabi Nimbɔtiu.