Read Ntcham 2 Chroniques 5 Bible Online

2 Chroniques 5 - Ntcham bible

2 Chroniques 5

¹Míǹ ní ubɔti Saloomɔn nìn túń kunimbɔtidii tuuŋŋi kɔkɔ ki dóò. Míǹ boonee ní u yāntì bi cáań tiwan tin kɔkɔ u-baa Daafiidi nìn dūu sú ti-Dindaanee[18], an dàkà yii animbil nì sindaariya nì tiwan tikpil, ní bi dūu síiǹ ti-Dindaan Diiku nimbikpaafidiikun.

²Míǹ boonee ní ubɔti Saloomɔn yíiń Isirayeel tindaŋkpilib nì tinaakɔti kpilib kɔkɔ nì Isirayeel dicaŋŋi kpilib u-cee bí yòon̄ ti-Dindaan Poondi Dakaau Daafiidi Tiŋkin[19], an dàkà yii Siiyɔn jool pu, kí cáá cùnnì kunimbɔtidiin.

³Niinee ní Isirayeel yab kɔkɔ kóoǹ ki kpáfì ubɔti Saloomɔn cee kí jī uŋmaluluúti jiŋaaliu[20].

⁴Ŋyunti ŋun ní Isirayeel kpilib kɔkɔ bāańee ní Leefii yab yōoǹ Dipoondi Dakaau ki túǹ.

⁵Bisaraaŋaliibi Leefii yabee nìn yōoǹ ti-Dindaan Poondi Dakaau nì circir kɔŋkooŋŋu nì tiwan tin kɔkɔ bí ku-poonee ki túǹ.

⁶Ubɔti Saloomɔn nì Isirayeel samaau kɔkɔ kóoǹ ki kpáfì u-cee ti-Dindaan Poondi Dakaau nimbiin ní bi kūū ipii nì inaa ki ŋá saraabi an kaa cáá ŋkaan.

⁷Míǹ boonee ní bisaraaŋaliibi nín dū Dipoondi Dakaau ki kɔ́ǹ Circir Páaa laŋki diikun ki síiǹ u-paaŋŋu, keerubimbi feeŋyi taapu.

⁸Di sá yii keerubimbi nìn kpátì bi-feeŋyi mpaan ŋun bi nìn bɔ́ntì kí síiń Dipoondi Dakaauee yilpu, ní ki bīiǹ Dipoondi Dakaau nì idɔ in bi cáa tūntí-uee pu.

⁹Dakaa dɔi gbanti nìn fɔ̀kɔ̀ tiŋan, an puee a yaa nìn bí Circir laŋkee, a nìn wāĺ i-nyɔkɔ ní, ama a yaa nìn bí mmɔŋkee, an kaa nìn wāĺ. Idɔee dáá gbíntìi bí ki dāa sāā díǹ.

¹⁰Tiba kaa nìn bí Dipoondi Dakaau poon an yaa kaa sá ataŋkpee pilinti tili tin Mooyiisi nìn dūu ŋée. Ti-Dindaan nín nìn nyántì Isirayeel yab Eejipiti tiŋkin u nì bi ŋá mpèéyee ní Mooyiisi dū ataŋkpee pilinti gbanti ki ŋá poon Ooreeb jool pu[21].

¹¹Bisaraaŋaliibi nìn nyáń Circir laŋki. Bisaraaŋaliibi bin kɔkɔ nìn bí niinee nìn ŋá bi-ba circir, kaa nóó nì bi-kitiŋi.

¹²Leefii yab bin nìn sá biwambɔɔliibi ki bí Asafi nì Eeman nì Yeedutun kitiŋinee nì bi-jipɔmbi nì bi-nabiyaamu nìn pēē iŋaabu in bí fálfalee bɔkutiŋ. Bi nìn yú nsaraafan ŋwìiń nyalaŋki pú ki ŋúb́ cancakantib nì saŋgub nì tibati. Bisaraaŋaliibi binib dilaataal nì mmuŋku nìn yú ki kɔ́ĺ-bi ki búǹ akantán.

¹³Bikantámbunliibee nì biwambɔɔliibee nìn bíi bɔ̀ɔ́ dicilpu ki nyɔ́ŋkí ki pàkà ti-Dindaan. Ŋyunti ŋun bi bíi búǹ akantán ki bɔ̀ɔ́ cancakantib nì tiwambɔɔkaal tin kíǹee ki gà ilan ki nyɔ́ŋkí ti-Dindaan yii: «Di sá yii u ŋān̄, ní u-neendi bí kí nīn cá talkuee»[22], ní ditagbandi diba dɔ́miń ki gbí ti-Dindaan Diikun.

¹⁴Ditagbandee puee, bisaraaŋaliibi kaa nìn gíti ŋūǹ kí sīĺ poon kí tɔ̄ bi-tundi, di sá yii ti-Dindaan nyooti nìn gbí u-diiku poon[23].