Read Ntcham 2 Chroniques 6 Bible Online

2 Chroniques 6 - Ntcham bible

2 Chroniques 6

¹Niinee ní Saloomɔn téeń yii: «Ti-Dindaan, a nìn lēē yii a làá nīn kóò ditagbambɔndin.

²Ama man máń-si kudinyaaŋŋu nee, kudii kun poon ní a làá nīn kóò talkuee!»

³Isirayeel yab kɔkɔ nìn sí ní ubɔti fātì u-nimbiin ki túĺ-bi ní ki mēē ki bīiǹ bi-pu.

⁴U nìn bí yii: «Tí jāam̀maan ti-Dindaan, Isirayeel Nimbɔtiu! Úǹ u-ba ŋá kii u nín nìn pōoǹ m-baa Daafiidi puee. U nìn bí-u yii:

⁵<Man di nyántì m-nibul Isirayeel Eejipiti tiŋkin. Kí yòon̄ ŋwiin gbantee, maa lēē Isirayeel timmu[24] kɔkɔ kansikin kitiŋ kiba kin poon ní bi làá mā-mi kudii ḿ nīn lèekī m-ba ki dàkèe. Maa tí lēē unil ubɔ un nyáń u-bee ú nīn sá m-nibul Isirayeel kpootiliu.

⁶Ama m lēē Jeerusaleem kí nīn lèekī m-ba ki dàkà. M lēē sii Daafiidi mun á nīn sá m-nibul Isirayeel bɔtiu.>

⁷M-baa Daafiidi nìn cáá nlandɔkɔ kí mā kudii kí dū-ku kí sú ti-Dindaan, Isirayeel Nimbɔtiu.

⁸Ama ti-Dindaan nìn bí-u yii: <A nín ká nlandɔkɔ yii a làá mā-mi kudiiyee, an ŋān̄ tikpil.

⁹Tin bée di sá yii an kaa sá sii di làá mā kudii gbanti, ama sii a-ba jipɔɔn un a màl̄ee di làá mā-mi kudii gbanti[25].>

¹⁰Kɔŋkɔnnee, ti-Dindaan nín nìn pōoǹ puee u ŋá míǹ. Di sá yii m fōō m-baa Daafiidi yil ki jíń Isirayeel tiŋki pu dibeel, kii ti-Dindaan nín nìn lī puee. M máń kudii nee ki dū-ku ki sú ti-Dindaan Isirayeel Nimbɔtiu.

¹¹M kpáàa bɔ́ntì Dipoondi Dakaau un poon ti-Dindaan poondi nyɔɔbuŋŋi kēe mpaan. Dipoondi gbantee, u nín nìn nyántì ti-naanjab Eejipiti tiŋkinee ní u nìn pōoǹ.»

¹²Míǹ boonee ní Saloomɔn yíkìi síl̀ ti-Dindaan saraafaŋŋu nì Isirayeel yab bin kɔkɔ nìn kóoǹ ki kpáfèe nimbiin. U nìn yōoǹ u-ŋalii ki túĺ kutaa kí mèè.

¹³Di sá yii Saloomɔn nìn yāntì bi dū tasa kúti ki máń dikɔl ki síiǹ dicindi kansikin. Dikɔl gbanti waaŋŋu nìn sá meetab bili nì dijandi ní di-púuŋŋu sá meetab bili nì dijandi ní di-fɔkɔŋŋu sá meeta ubɔ nì dijandi. Saloomɔn nìn jɔ́m̀ ki tɔ́kɔǹ dikɔl pu ní ki tātìi gbāaǹ Isirayeel samaau kɔkɔ nimbiin. U nìn yōoǹ iŋal ki túĺ kutaa

¹⁴ki bí yii: «Ti-Dindaan Isirayeel Nimbɔtiu, unimbɔti ubɔ kaa bí yilpu àá kitiŋ pu ki bí kii siiyee. A ŋúb̀ a-poondi ki dàkà a-tɔntɔnliibi bin sí nì si nì dipɔbil dibee kulaŋŋaŋfitiiu.

¹⁵A nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee, a ŋá míǹ. Mbaamɔn tin a nìn pōoǹ-uee, sii a-ba ŋá míǹ ki tīī-u díǹ.

¹⁶Kɔŋkɔnnee, ti-Dindaan Isirayeel Nimbɔtiu, ŋá a nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee. A nìn bí-u yii: <A-naantiibi yaa nóó-mi ibaamɔn poon kii sii a-ba nín nóó-mi puee, ibaamɔn ní m tùkù-si, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin[26].»

¹⁷Míǹ puee ti-Dindaan Isirayeel Nimbɔtiu, m gbàam̄-si ní, ŋá kɔŋkɔnnee a nín nìn pōoǹ a-tɔntɔnliu m-baa Daafiidi yii a làá ŋá pu gbantee kí tīī-u!

¹⁸«Mimmee Unimbɔti ŋūǹ kí kɔ́ kitiŋ pu u nì binibaaa? Áli gba kutagbɔŋu nín wāā pu nee kaa bàn̄-si á kɔ́, ki dāa nín kàaǹ kudii kun m máń nee.

¹⁹Nì míǹ kɔkɔee, m-Dindaan m-Nimbɔtiu, pīlifì man a-tɔntɔnliu wimmeem nì m-gbaamii! Pīlifì m-kuŋkuuntii nì m-wimmeem min man a-tɔntɔnliu bíi mèé-si díǹ neeyee!

²⁰A-nimbikpeeŋu ń nīn pée cɔ́ kudii nee pu ŋwiimpu nì kunyeeu. Ŋú nīn pée cɔ́ mpaan ŋun pu a nìn sòon̄ yii: <M-yindi làá nīn bí niin> nee pu[27]. Pīlifì ŋwimmeem min m bí doo ki mèé-si nee.

²¹Pīlifì man a-tɔntɔnliu nì Isirayeel, a-nibul wimmeem min ti bí doo ki mèé-si nee. Pīlifiǹ-ti doooo yilpu laakin a kóòyee. Pīlifiǹ-ti kí dū ti-kpitii kí pɔ̄-ti.

²²«Ubɔ yaa yīntiǹ u-juti, bi ŋūǹ kí lì yii ú pùtī yii u yaa ká mbusu ń lítí u-pu. Udaan yaa lafun dɔ́miń kudii nee poon, a-saraafaŋŋu nyɔkɔpu ki pūtèe,

²³á pīlifì doooo yilpu kí kpèè tibɔti gbanti kí sòoǹ a-tɔntɔnliibi bɔti. Á kpɔ̀ dibɔkpil daan bɔti kí dáaĺ u-tafal, ní kí pɔ̀ un bɔti ŋān̄ee báà ŋma ń béé yii u sá maanyiiba.

²⁴«Isirayeel yab a-nibul yaa yīntiǹ-si ní bi-nannanliibi jáń ki pɔ́ɔkiǹ-bi, ní bi fātìi gítìń a-cee, ki nyɔ́ŋkì-si, ki mēē-si ní ki gbāam̀-si kudii nee poonee,

²⁵sii ti-Dindaan, á pīlifì a-nibul Isirayeel yab doooo yilpu, kí dū bi-kpitii kí pɔ̄-bi, ní kí fàtīí gíiǹní-bi kitiŋ kin a nìn dūu tīī bi-naanjabee poon.

²⁶«A-nibul yaa yīntiǹ-si ní a dū kutaa ki pīiǹ utaa kaa ti bíi nì, ní bi fātì bi-ba ki túĺ mpaan nee pú, ki mēē ki nyɔ́ŋkì a-yindi, ní ki fātì bi-boon ki tīī bi-kpitii a nín dáaĺ bi-tafal pueeyee,

²⁷sii ti-Dindaan, á pīlifiǹ a-tɔntɔnliibi Isirayeel yab doooo yilpu. Á dū bi-kpitii kí pɔ̄-bi, kí dàkà-bi nsammɔnti ŋun bi máaǹ kí nóóyee, ní kí yàntī utaa ń nì a-tiŋki nee pu, kitiŋ kin ní a dūu tīī a-nibul án nīn sá bi-fakalee.

²⁸«Ŋkùm àá bìlbil kúm yaa jéetì kitiŋ nee pu, àá tikpaajin kaa láá bīń ní ki kūń àá ki sūū, àá inaakitoon nì inaaki di ŋmɔ́ ki bíil̀ tikpaajin, àá bi-nannanliibi di māntìi tú bi-timmu kí já nì bi, àá an yaa pée sá tibumbun àá igbaŋween iŋyee,

²⁹Isirayeel yab kansikin ubɔ àá a-nibul Isirayeel yab kɔkɔ di yaa béè tin bāań-bee, ki yōoǹ bi-ŋalii ki túĺ Kudii nee watil pú ki mēē-si àá ki gbāam̀-see,

³⁰sii ti-Dindaan, á pīlifiǹ-bi doooo yilpu laakin a kóoǹnée kí dū bi-kpitii kí pɔ̄-bi, ní kí ŋá kí tīī báà ŋma kii an nín máaǹ puee, di sá yii a nyí báà ŋma pɔbil poon bɔti.

³¹Ŋá míǹ án nín làá ŋá pu ní Isirayeel yab ń fàŋkì-si iwiin in kɔkɔ bi cáá kí kàl̄ kitiŋ kin a tīī bi-naanjabee puee.

³²«Unicaan un kaa sá a-nibul Isirayeel yab kansikin ubɔee yaa nyánní kitindandatiin ki dɔ́miń a-yindi pu, di sá yii u gbìl̄ bi sòon̄ a-yiŋkpaandi nì a-pɔŋkpaaŋŋu pu, ní ki dɔ́miń míǹ ki mēē-si kudii nee poonee,

³³sii ti-Dindaan, á pīlifiǹ-u doooo yilpu laakin a kóoǹnée. Á ŋá u nín bālifì-si puee kí tīī-u. A yaa ŋá míǹ, kitiŋ pu nib kɔkɔ làá béé a-yindi, kí fàŋkì-si kii Isirayeel yab nín fàŋkí-si puee, ní bí béé yii a lafun bí kudii kun m máń nee ni.

³⁴«A yaa tīī a-nibul Isirayeel yab mara yii bí cù kí já nì bi-nannanliibi, ní bi fātì bi-ba ki túĺ kitiŋ kin a lēē nee nì kudii kun m máń-si nee watil pú ki mēēyee,

³⁵á pīlifiǹ bi-wimmeem nì bi-gbaamii doooo yilpu, ní kí tīī-bi dijajil.

³⁶«An ŋūǹ kí ŋá yii Isirayeel yab yīntiǹ-si, di sá yii unil ubɔ kpá kaa yìntī. Bi yaa ŋá míǹ ní a gíí bi-pu diŋuul ki yāntì bi-nannanliibi jáń ki pɔ́ɔkiǹ-bi ki cúú-bi ki cūnnì bi-tiŋki kin dátèe àá kin kaa dátèe ni kuyuŋu,

³⁷ní bi yaa kíĺ ki bíi dàkafī, ki kpántì bi-bimbim, ki gbāam̀-si kitiŋ gbanti poon ki lī yii: <Ti ŋá ikpiti, ti yīntì, ti jíń dibɔkpil>,

³⁸ní bi-nannanliibi tiŋki gbanti poonee, bi fātìi gítìń a-cee nì bi-pɔbil kɔkɔ nì bi-naŋki kɔkɔ, ní ki fātì bi-ba ki túĺ kitiŋ kin a tīī bi-naanjab nì kitiŋ kin ní a lēē nee nì kudii kun ní m máń ki tīī-si nee ki mēē-see,

³⁹sii ti-Dindaan, á pīlifiǹ-bi doooo yilpu laakin a kóoǹnée. Pīlifì bi-wimmeem nì bi-gbaamii kí jòò-bi, kí dū bi nín yīntiǹ-si puee kí pɔ̄-bi.

⁴⁰«Ŋúbití a-nimbiliŋ, m-Nimbɔtiu. Pīlifì m-wimmeem min m bíi mèé-si mpaan nee puee.

⁴¹Kɔŋkɔnnee, ti-Dindaan Unimbɔti, yīkìm̄, dāan̄ kí nīn bí a-ŋuŋfil paaŋŋu pu, sii nì a-dakaau un poon a-pɔŋŋu bée. Ti-Dindaan Unimbɔti, yàntī a-saraaŋaliibi ń dū difiil kí pèen̄ kii tiwampeeŋkaalee! Yàntī bin yú nì si deedeeyee ń nīn fàal̀ a-ŋanti pu.

⁴²Ti-Dindaan Unimbɔti, taa dū ubɔti un sii a-ba lēēyee kí fá. Téetí tiŋan tin kɔkɔ a ŋá ki tīī a-tɔntɔnliu Daafiidee pu!»