Read Ntcham 2 Chroniques 7 Bible Online

2 Chroniques 7 - Ntcham bible

2 Chroniques 7

¹Saloomɔn mēē míǹ ki dóòyee ní ŋŋmi nyánní yilpu ki dɔ́miń ki wùn̄ bisaraawɔkaabi nì mpèé saraabee. Ti-Dindaan nyooti nìn gbí kunimbɔtidii[28].

²Bisaraaŋaliibi kaa nìn gíti ŋūǹ kí kɔ́ kunimbɔtidiin, di sá yii ti-Dindaan nyooti nìn gbí-kù.

³Isirayeel yab bin kɔkɔ nìn bí niinee nìn ká ŋŋmi nyánní yilpu ki kpákatìń ní ti-Dindaan nyooti jìliŋkī kunimbɔtidiin. Niinee ní bi tātìi gbāaǹ bi-nimbiiŋyi tūū kitiŋ ki jáaḿ-u ki nyɔ́ŋkí-u ki lì yii: «U ŋān̄ ní u-neendi bí kí nīn cá jaanjaan.»

⁴Ubɔti saloomɔn nì Isirayeel yab kɔkɔ kpáfì ki ŋá ti-Dindaan saraabi.

⁵Saloomɔn nìn kūū inaa kutukub mmuŋku nì bili, ní ki kūū ipii nì iŋoobu kutukub dilaataal nì mmuŋku ki ŋá mpèé saraau. Bi nín ŋá pu ki dū kunimbɔtidii ki sú ti-Dindaanee dee.

⁶Bisaraaŋaliibi nìn yú bi-tundi laŋki. Leefii yab nìn ŋúb́ tiwambɔɔkaal tin ubɔti Daafiidi nìn yāntì bi kpítì ki tīī-bee ki nyɔ́ŋkí ti-Dindaan ki lì yii: «Di sá yii u-neendi bí ní ki cá jaanjaan.» Daafiidi di nìn ŋmàn̄ nlan gbanti ki tīī-bi. Bisaraaŋaliibi nìn yú ki túĺ-bi ki búǹ akantán ní Isirayeel yab kɔkɔ yíkìi yúl̀.

⁷Niinee Saloomɔn dū dicindi din bí kunimbɔtidii nyɔkɔpuee ki sú ti-Dindaan. Di sá yii niin ní u nìn ŋá saraawɔkaa nì tijimpin saraabi nì mpèé saraabi kpam, kun puee tasa saraafaŋŋu ŋun nìn bí kunimbɔtidii punyɔkɔki caŋinee kaa nìn náaǹ bí ŋmā kí wà an pu saraawɔkaa nì tijimpin saraabi nì mpèé saraabi kpam.

⁸Ŋyunti gbanti ní Saloomɔn nì Isirayeel yab kɔkɔ kpáfìi jíń tibìń jiŋaaliu. An nìn sá dinikitikpaandi ní. Binib nìn nyánní doooo Leeboo-Amaati, kitiŋ ŋgan pú ki cáa sāā Eejipiti buŋŋu kitiŋ ŋgiil pú. Bi nìn jíń jiŋaal gbanti iwiin iluli ní.

⁹Iwiin inii dalee ní bi kóoǹ ki kpáfì ki jáam̀ ti-Dindaan. Mimmee bi nìn dū iwiin iluli ní ki jíń kunimbɔtidii jiŋaaliu ní ki dū iwiin iluli ki jíń tibìń jiŋaaliu.

¹⁰Míǹ boonee, uŋmaluluúti iwiin mmuŋku nì ita dalee ní Saloomɔn yāntì Isirayeel yab nín kùǹ bi-dumpu. Bi nìn nín kùǹ nì mmɔn nì dipɔɔpindi, kun puee ti-Dindaan nìn dàkā u-tɔntɔnliu Daafiidi nì Saloomɔn nì u-nibul Isirayeel yab kulaŋŋaŋfitiiu.

¹¹Saloomɔn nìn máń ti-Dindaan Diiku nì úǹ u-ba naakooku nì tin u nìn pée là kí mēe ki dóò.

¹²Míǹ boonee ní ti-Dindaan nyántì u-ba ki dàkā-u kunyeeu ní ki bí-u yii: «M gbìl̄ a-wimmeem ní ki lēē kudii nee kú nīn sá mpaan ŋun pu bi làá nīn ŋáań saraabi ki tìì-mee.

¹³An ŋūǹ kí bàń yii m dū kutagbɔŋu ki pīiǹ ní utaa kaa ti bíi nì. An tí ŋūǹ kí bàń mun yii m tīī inaakitoon mara í dāan̄ kí ŋmɔ́ kitiŋ nee kpaajinti, àá m cáań bìlbil kúm ki tɔ́ m-nibul pu.

¹⁴M-nibul din pu bi yíì m-yindee nib yaa sīntì bi-ba taapu, ki mēē, ki nyàab̄-mi ní ki dū bi-saŋkpitii ki fée, man làá pīlifiǹ-bi doooo yilpu, kí dū bi-kpitii kí pɔ̄-bi, ní kí fàtīí tīī bi-tiŋki ki-gaajati.

¹⁵M-nimbiliŋ làá nīn kpítì ní m-tafaliŋ ń nīn píĺ ki cí kí pīlifì ŋwimmeem min kamaa bi làá pée mèè kudii nee poonee.

¹⁶Too, m lēē kudii nee ki dū-ku ki sú m-ba kí nīn lèekī m-ba ki dàkà ku-poon kí nīn cáa cá jaanjaan. M-nimbikpeeŋu làá nīn cɔ́ ku-pu, ní m-pɔbil ń nīn kā ku-pu baabadal.

¹⁷Ama siiyee, nín̄ nóó-mi kii a-baa Daafiidee. Nín̄ ŋáań tin kɔkɔ m kpáafì-see, ní kí nīn ŋúb́ m-bɔkpaaŋi nì m-koobiliŋ.

¹⁸A yaa ŋá míǹ, m làá tīī a-beel mpɔn kii m nín nìn pōoǹ a-baa Daafiidi puee. M nìn bí-u yii: <A-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin[29].>

¹⁹Ama sii nì a-nibul yaa fātì ni-boon ki tīī-mi, ní kaa ŋúb́ m-marab nì m-koobiliŋ ŋin m tīī-nee, ní ki cūtìi nóó awaa ki gbàantí ŋi-taapuee,

²⁰m làá jà-ni kitiŋ kin pu m tīī-nee. M làá fàtī m-boon kí tīī kudii kun m dūu sú m-ba nee. Anibul kɔkɔ làá dāá nīn ŋúb́ Isirayeel ki lāā ki bèel̄.

²¹Kudii nee sá díǹ pu nee kukpaaŋŋu[30]. Ama binib bin làá dāá jītí kudii nee caŋinee làá dāá bàkatī ní kí bàlifì yii: <Ba yì-tì ní ti-Dindaan nín ŋá kitiŋ nee nì kudii nee míǹ?>

²²Ní bí dāá kíí-bi yii: <Kun yì-tèe di sá yii Isirayeel yab dū ti-Dindaan bi-baabi Nimbɔtiu un di nyántìń-bi Eejipiti tiŋkinee ki fá. Bi dū bi-ba ki yá ki nákáǹ awaa ki gbāaǹ ŋi-taapu ki jáam̀-ŋi. An pu ní ti-Dindaan yāntì nnaabu nee jéetì bi-pu.>»