Read Ntcham 2 Chroniques 8 Bible Online

2 Chroniques 8 - Ntcham bible

2 Chroniques 8

¹Abin mmuŋku ní Saloomɔn nìn dūu máń ti-Dindaan Diiku nì úǹ u-ba diiku.

²U nìn fātìi máń ntimu mun Tiir bɔtiu Yiiram nìn tīī-uee. U nìn cáań Isirayeel yab ki kāaǹ ntimuee ni.

³Míǹ boonee ní Saloomɔn cūtìi jáń ki fōō Amati-Sooba tiŋki[31].

⁴U nìn fātìi máń Tadimɔɔr tiŋki kuteeun nì ntimu mun nìn bí Amati tiŋkpaaŋkin bi kpáafí u-jintee.

⁵U nìn fātìi máń Beeti-Oorɔn tiŋki kin bí yilpu púee nì Beeti-Oorɔn tiŋki kin bí taapu púee. U nìn máń agun ki tú ntimu gbanti ní mu cáá punuubi nì tikpàlkaal.

⁶U nìn gíti ŋá Balaati tiŋki nì ntimu mun poon u nìn kpáafí u-jinti nì u-janjatɔrɔkub nì u-taamuuyee míǹ ní. Saloomɔn nìn pée máń tin ní u nìn lèe ní Jeerusaleem tiŋkin nì Leebanɔn jool pu nì ntimu mun kɔkɔ nìn bí u-taapuee.

⁷Eeti yab nì Amɔɔr yab nì Peeriisi yab nì Eefi yab nì Jeebusi yab biba nìn kíǹ Isirayeel tiŋkin, bíǹ gbanti kaa nìn sá Isirayeel tindambiyaamu.

⁸Bi nìn gbíntìi bí kun puee Isirayeel yab kaa nìn ŋúń ki kūū ki céetì-bi. Saloomɔn nìn dū bi-naantiibi ki ŋá diwɔ́bil tundin ki dāa sāā díǹ.

⁹Ama Saloomɔn kaa nìn dū Isirayeel yab ki ŋá diwɔ́bil tundi gbantin. Bíǹ di nìn sá u-janjaliibi nì bijanjakpilib nì bin ŋàal̀ janjatɔrɔkubee nì bitanjakaliibi.

¹⁰Kɔmandambi nìn lēē bikàliŋkpilib alaataa ali nì imuŋku ili nì saalaa bí nīn kpèé bin bí ki tūǹ Saloomɔn tuuŋŋee.

¹¹Saloomɔn nìn yāntì u-nimpuu Faaroo bisal nyáń Daafiidi Tiŋkin ki cūtìi kɔ́ kudii kun u nìn máń ki tīī-uee ni. Di sá u nìn lī yii: «M-nimpuu kaa máaǹ kí nīn kóò Isirayeel bɔtiu Daafiidi cindin. Di sá yii adiin ŋin poon bi dū ti-Dindaan Dakaau ki yóoǹee sá circir diiŋŋi ní.»

¹²Saloomɔn nìn ŋáań ti-Dindaan bisaraawɔkaabi nsaraafan ŋun u nìn máń ki tīī-u ŋu bí kunimbɔtidii nyɔkɔpuee ní.

¹³Kii Mooyiisi nín nìn síiǹ mara bí nīn ŋáań ŋwiin kamaa puee, u nìn ŋáań ŋwiŋŋuŋfikaa saraabi, ki ŋáań uŋmal kamaa wimpeekaaŋu saraabi nì bijiŋaakpaambi bita bin bi nìn jīǹee saraabi. Jiŋaalib gbanti di sá jiŋaal un bi jīǹ ki ŋmóò kpɔnɔb bin kaa cáá ŋkpɔnɔnyɔkɔee nì Pantikooti jiŋaaliu nì Tibìń jiŋaaliu.

¹⁴Kii u-baa Daafiidi nín nìn lēē pu ki síiǹee, Saloomɔn nìn tīī bisaraaŋaliibi nì Leefii yab bi-tuuŋŋi nín sá pu kunimbɔtidiinee, ki nóó nì bi-kitiŋi. Leefii yab biba tundi di nìn sá bí nīn nyɔ́ŋkí ti-Dindaan baabadal, àá kí tūtuǹ bisaraaŋaliibi bi-tuuŋŋi poon. U nìn yāntì bipunyɔɔciitiliibi kitiŋi ŋin nìn cí kunimbɔtidii punyɔmmuee mun kíĺ bi-tundi. Unimbɔti niliu Daafiidi nín nìn síiǹ mara bí ŋá puee dee[32].

¹⁵Daafiidi nín nìn síiǹ mara un bisaraaŋaliibi nì Leefii yab tuuŋŋi pu, nì kunimbɔtidii nimbiliŋ pu puee, míǹ deedee ní bi nìn ŋá.

¹⁶Míǹ ní Saloomɔn nìn túń u-tuuŋŋi kɔkɔ ki dóò, kí yòon̄ ŋwiin ŋun u bíl̀ kunimbɔtidii nyeelee ki cáa sāā bi nín máń-ku ki dóòyee. Saloomɔn nìn máń kunimbɔtidii ki dóò.

¹⁷Niinee Saloomɔn nín cá Eesiiyɔn-Geebeer nì Eelaati timmun. Eelaati tiŋki gbanti nìn bí Tikati Mɔɔl gbandi, Eedoom tiŋkin ní.

¹⁸Yiiram nìn dū u-tɔntɔnliibi bimeelaŋaaliliibi bin nyí tiŋku bɔti tiŋanee ki tú bí tūtuǹ Saloomɔn tɔntɔnliibi. Bimeelaŋaaliliibi gbanti nì Saloomɔn yab nìn cūtì Oofiiri tiŋkin[33] ki nyàab̄ sindaariya tɔnnib saalaa nì bili ki cáa cūnnì ki tīī ubɔti Saloomɔn.