Read Ntcham 2 Chroniques 9 Bible Online

2 Chroniques 9 - Ntcham bible

2 Chroniques 9

¹Sabaa nimpubɔtiu nìn gbìl̄ Saloomɔn nín nyáń diyindi puee. U nìn dɔ́miń Jeerusaleem kí pɔ́ɔǹ-u ipɔɔn kí màkan̄-u kí kpèè. U nì dinikitikpaandi di nìn dɔ́miń ki kpáaǹ igutaamu in tú talaalub nì sindaariya tikpil nì ataŋkpamɔntee. U bāań Saloomɔn ceeyee ní ki bālifì-u tibɔti tin kɔkɔ nìn pée kā u-pɔbilinee.

²Saloomɔn nìn pée kíí-u tin kɔkɔ u nìn bālifì-uee ní. Tiba kaa nìn bí ki pɔ̄ɔ̄ ki tīī-u waa ŋúń ki kíí.

³Sabaa tiŋki nimpubɔtiu nín ká Saloomɔn ciiŋyi nì kudii kun u máńee

⁴nì tijin tin tɔ́kɔ́ u-teebiliu puee nì u-tɔntɔnliibi kɔŋkooŋyi nì u-tɔntɔnliibi bin tìì-u tijin u jīǹ nì nnyim u nyùee wampeeŋkaati nì saraabi bin u nìn ŋáań kunimbɔtidiinee ní an ŋá-u bitii waa ti nyí tin poon u bée.

⁵Niinee ní u bí ubɔti yii: «Tin m gbìl̄ m-tiŋkin a-tuuŋŋi pu nì a-ciiŋyi puee lafun sá mbaamɔn ní.

⁶Ama maa nìn fōō ki kíí, see m nín dɔ́miń m-ba ki ká nì m-nimbilee. Tin bi máafì-mee kaa bàn̄ tin m ká nee dijandi gba. A-ciiŋyi jítiǹ tin m gbìl̄ee pu kpataaa.

⁷A-nib nì a-tɔntɔnliibi bin bí a-nimbiin baabadal ki pílifí a-ciiŋyi nyɔɔbuŋŋee bí mmɔnneeee!

⁸Tí nyɔ̄ŋkì ti-Dindaan a-Nimbɔtiu un di lēē-si á kàl̄ Isirayeel tiŋki pu dibeelee! Kun puee u néeń Isirayeel kí nīn cáa cá jaanjaan ní, an pu ní u dū-si ki kāaǹ dibeel á yàntī tin bí deedeeyee nì ibaamɔn ń nīn bí.»

⁹Míǹ boonee ní Sabaa tiŋki nimpubɔtiu tīī ubɔti Saloomɔn sindaariya tɔnnib bita nì dijandi nì talaalub tikpil nì ataŋkpamɔnti. Sabaa nimpubɔtiu nín nìn tīī ubɔti Saloomɔn talaalub puee, baa ti pée ká an talaalub bulifi kɔ́ Isirayeel tiŋkin ki ká.

¹⁰Kí kūtì muee, Yiiram tɔntɔnliibi nì Saloomɔn yab nìn cáań sindaariya Oofiiri tiŋkin nì santaal dɔi tikpil tikpil nì ataŋkpamɔnti.

¹¹Ubɔti nìn dū idɔ gbanti ki ŋá jaantalkub ki tíkiǹ ti-Dindaan Diiku nì kubɔtinaakoou, ní ki nìn lēē ki kpítì tibati ki tīī u-laŋgaaliibi. Baa nìn pée ká míǹ Juuda tiŋkin dalba dalba.

¹²Ubɔti Saloomɔn mun nìn tīī Sabaa nimpubɔtiu tin kɔkɔ u nìn là ki bālifèe. Tin u nìn tīī-uee nìn jítiǹ tin unimpubɔti nìn cáańee pu kpataaa. Míǹ boonee ní u nì u-tɔntɔnliibi nín gítí bi-tiŋkin.

¹³Dibimbaantiil poonee, sindaariya un bi nìn cáań ki tīī ubɔti Saloomɔŋyee nìn nyáń tɔnnib mmuŋku ní,

¹⁴ní kí nín kūtì bibantiliibi nì binyampoobi nín nìn cāabìń sindaariya un ki pà patantibee. Arabii bɔtiibi kɔkɔ nì Isirayeel tiŋkpaammu gɔminab nìn cāabìń sindaariya nì animbil ki tìì Saloomɔn.

¹⁵Ubɔti Saloomɔn nìn yāntì bi dū sindaariya ki mɔ́ɔ́ agbampɔɔ akpaan alaataa ali. Bi nìn dū sindaariya kiiloobi biluu ní ki mɔ́ɔ́ digbampɔɔl kamaa.

¹⁶U nìn gíti dū sindaariya ki mɔ́ɔ́ agbampɔɔ ŋwaamu alaataa ata. Bi nìn dū sindaariya kiiloo ubɔ nì dijandi ní ki mɔ́ɔ́ digbampɔɔl kamaa. Ubɔti nìn dū agbampɔɔyee ki síiǹ kudii kun bi yíì yii <Leebanɔn Pɔɔkuee>[34] poon ní.

¹⁷Ubɔti nìn gíti kpítì dibeejal dikpaandi diba ní ki dū sindaariyamɔnti ki nyūntì ní ki dū kunti nyiŋŋi ki nákáǹ nákáǹ.

¹⁸Dibeejalee nìn cáá akɔl ŋin pu bi tà ki jɔ́ḿ-dèe aluu, ní ki cáá laakin ataa tɔ̄kɔntée an sá sindaariya. Bi nìn kpítì gbikintib bili ki síiǹ laakin bi pāantí iŋalee.

¹⁹Gbikintib nìn bí saalaa nì bili ní ki bí akɔl aluuyee nín kúntí puee. Baa nìn pée kpítì dibeejal diba míǹ dibeel diba poon ki ká.

²⁰Ubɔti Saloomɔn kɔŋkɔnnyɔkaabi kɔkɔ nìn sá sindaariya ŋma ní, ní asambil ŋin bí <Leebanɔn Pɔɔku> diikunee nìn sá sindaariyamɔnti ŋma. Baa nìn dù animbil kúti kí ŋá tiba, di sá yii Saloomɔn yuntiŋuee, animbil kúti kaa nìn cáá kunyampoou.

²¹Di sá yii ubɔti nìn cáá meelab Taarsiisi tiŋkin. Yiiram meelaŋaaliliibi di nìn ŋàal̀-bi. Abin ata poon diba puee, meelab gbanti nìn cāabìń sindaariya nì animbil kúti nì kunti nyiŋŋi nì ilantan nì ikooŋaan.

²²Ubɔti Saloomɔn nìn jítiǹ kitiŋ pu bɔtiibi kɔkɔ tigaajati poon nì iciin poon.

²³Kitiŋ pu bɔtiibi kɔkɔ nìn nyàab̀ kí ká Saloomɔn kí ŋmā kí pīlifì iciin in Unimbɔti nìn tīī-uee.

²⁴Bi yaa nìn dòońee, báà ŋma nìn cāabìń animbil kúti wanti nì sindaariya wanti nì tiwampeeŋkaal nì tijanjawan nì talaalub nì itaamu nì imamboon ki pūǹ-u. Dibindi kamaayee, binib nìn pée ŋáań míǹ ní.

²⁵Saloomɔn nìn cáá itaamu nì janjatɔrɔkub naabakati kutukub binaa, ní ki cáá itaamu kutukub saalaa nì bili[35]. Tijanjawan gbanti tiba nìn bí ntimu mun poon ní ajanjanaapaa bée, ní tiba mun bí u-cee Jeerusaleem.

²⁶Bibɔtiibi bin nìn bí kí yòon̄ Eefiraati mɔɔl kí cáá sāā Fiiliistii yab tiŋki nì Eejipiti tiŋki kpaanyɔkɔee kɔkɔ nìn bí Saloomɔn taapu ní[36].

²⁷Ubɔti nìn yāntì animbil gbí Jeerusaleem kii ataŋkpeeyee ní, ní seedir dɔi wīikí kii Seefeelaa tiŋki[37] sufii in bi yíì siikoomɔɔree.

²⁸Saloomɔn taamui nìn nyēeń Eejipiti[38] nì ntimu mun kɔkɔ kíǹee poon ní.

²⁹Saloomɔn tuuŋŋi ŋin kíǹee, kí yòon̄ tin u péé ki ŋée nì tin u ŋá ki lúŋkèe, ŋmàn̄ ki kā Unimbɔti bɔnaatiliu Naatan gbɔŋkun nì Ayiiya, ubɔnaatil un nyánní Siiloo tiŋkinee gbɔŋkun nì Unimbɔti bɔnaatiliu Idoo leedakal gbɔŋkun. Kugbɔŋu gbanti sòoǹ Neebaati jipɔɔn Jeerooboowaam mun pu.

³⁰Saloomɔn nìn kāl̀ Jeerusaleem ki jíń Isirayeel tiŋki kɔkɔ pu dibeel abin imuŋku ili ní.

³¹Saloomɔn kpíì ki cūtì ki ŋàl̄ u-naanjab ní bi síb́-u u-baa Daafiidi Tiŋkin. U-jipɔɔn Rooboowaam di fōō u-yil ki kpántì ubɔti.