Read Ntcham Esdras 1 Bible Online

Esdras 1 - Ntcham bible

Esdras 1

¹Peeriisi yab bɔtiu Siirusi beel bimpeepeekaal poonee, ti-Dindaan nìn là kí ŋá min u nìn dī u-bɔnaatiliu Yeereemii pu ki sòon̄ee. U nìn tīī ubɔti Siirusi nlandɔkɔ ú bāakì u-beel kɔkɔ poon, kí ŋmà kugbɔŋu mun ki síiń yii:

²«Man Peeriisi bɔtiu nín sòon̄ tiŋyee sèé: <Ti-Dindaan yilpu Nimbɔtiu dū kitiŋ pu kɔkɔ beeŋi ki ŋá m-ŋaan, ní ki bí-mi yii ḿ mā-u kunimbɔtidii Jeerusaleem, Juuda tiŋkin[1].

³Ni-kansikin un kamaa sá u-nibul yɔuee, ti-Dindaan u-Nimbɔtiu ń nīn bí udaan cee ú jɔ̄m̀ Jeerusaleem, Juuda tiŋkin kí fàtīí mā ti-Dindaan Isirayeel yab Nimbɔtiu kunimbɔtidii. Úǹ di sá Unimbɔti un bí Jeerusaleemee.

⁴Laakin kamaa ní u-nibul din kíǹee yaa bée, niin yab ń tīī-bi animbil kúti nì sindaariya nì tigaajawan nì tiwaŋkuti nì nlammɔntiim saraabi bí dūú tɔ̄ kunimbɔtidii kun bí Jeerusaleemee tundi.»

⁵Niinee ní Juuda yab nì Beenjameen yab dicaŋŋi kpilib nì bisaraaŋaliibi Leefii yab, an dàkà yii bin kɔkɔ Unimbɔti nìn tīī nlandɔkɔee yíkì ki nín jɔ́ḿ Jeerusaleem kí fàtīí mā kunimbɔtidii kun bí niinee.

⁶Bi-kɔŋkɔnnaatɔb nìn cáań animbil kúti nì sindaariya wanti nì tigaajawan nì tiwaŋkuti nì tiwan tin pɔ̄ɔ̄ kudaauee kí tūtuǹ-bi, ní kí nín kūtì tiwan tin bi nìn tīī-bi nì dipɔbil dibee.

⁷Ubɔti Siirusi nìn kóoǹ tiwan tin kɔkɔ ubɔti Neebukadineesaar nìn yōoǹ kunimbɔtidiin Jeerusaleem ki cáań ki yóoǹ u-waadiiŋŋinee ki kpáfì[2].

⁸Peeriisi yab bɔtiu Siirusi nìn yāntì Miitireedati un kpèé animbil bɔtee dū an wantee ki ŋúbiǹ Seesbasaar, Juuda yab kpiliu.

⁹Bi nín kàan̄ tiwan gbantee, ti-nyɔkɔm sɔ̀. Sindaariya sambiliŋ nìn sá mmuŋku nì saalaa, animbil kúti sambiliŋ nìn sá kutuku ubɔ, njimu nìn sá kiba kpá mmuŋku nì saalaa,

¹⁰sindaariya sampeemu nìn sá mmuŋku nì saalaa, animbil kúti sampeemu nìn sá alaataa anaa nì saalaa, ní tiwan tin kíǹee kɔkɔ nìn sá kutuku ubɔ.

¹¹Sindaariya nì animbil kúti wantee kɔkɔ nìn nyáń kutukub biŋmoo nì alaataa anaa ní. Ŋyunti ŋun bi nìn nyáń kuyuŋu Babiloon ki fàtīi gítí Jeerusaleemee ní Seesbasaar kpáaǹ an wanti gbanti kɔkɔ.