Read Ntcham Esdras 4 Bible Online

Esdras 4 - Ntcham bible

Esdras 4

¹Juuda nì Beenjameen yab nannanliibi nìn gbìl̄ yii bin nyánní kuyuŋu ki gítìńee bíi māā bi-Dindaan Isirayeel yab Nimbɔtiu diiku.

²Niinee ní bi sútì ki pìl̄ Sooroobabeel nì adican kpilib ki bí-bi yii: «Ti làá kūtì ni-pu ní mā kunimbɔtidii nee, di sá yii ti mun pée nóó Unimbɔtibaantee ní. Kí yòon̄ daliŋkin Asuur bɔtiu Asaradɔn yōoǹní-ti ki cáań dooyee, ti pée ŋáań saraabi ní ki tìì Unimbɔti.»

³Ama ní Sooroobabeel nì Joosuwa nì Isirayeel dicaŋŋi kpilib bin kíǹee kíí-bi yii: «An kaa kítì yii ní kūtì ti-pu tí mā ti-Nimbɔtiu kudii. An sá timbi baba ní ń mā ti-Dindaan Isirayeel yab Nimbɔtiu kudii, kii Peeriisi yab bɔtiu Siirusi nín tīī-ti mara yii tí ŋá puee.»

⁴Niinee ní binib bin kóò kitiŋ gbantinee yɔ̄tì Juuda yab wunti ki kɔ́ǹ-bi tifaandi bí gbèen̄ kí taa ti mā kunimbɔtidii.

⁵Kí yòon̄ ŋyunti ŋun Peeriisi yab bɔtiu Siirusi kā dibeel ki tin cáa sāā ŋyunti ŋun Daariyusi dāa kāl̀ dibeelee, bi nìn pée tìì kitiŋ gbanti kàliŋkpilib animbil yii bíǹ ń pìin̄ Juuda yab nsan atuun ń gbèen̄ ní.

⁶Ubɔti Asuweerusi nín kāl̀ dibeel pu kpalaayee, ní Juuda yab nannanliibi ŋmàn̄ kugbɔŋu ki túǹ Juuda nì Jeerusaleem yab pu dibɔgaandi.

⁷Peeriisi yab bɔtiu Aritaseerseesi yuntiŋuee ní Biseelam nì Miitireedati nì Taabeel nì u-jutiibi mun ŋmàn̄ kugbɔŋu ki tīī ubɔti. Bi nìn ŋmàn̄ kugbɔŋu gbanti poon Aram yab ŋmaŋmabiti nì bi-sooŋyin ní.

⁸Kitiŋ gbanti gɔminau Reewum nì u-gbaŋŋmaliu Simsayi mun nìn ŋmàn̄ ubɔti kugbɔŋu ki sòon̄ Jeerusaleem pu yii:

⁹«An sá gɔmina Reewum nì ugbaŋŋmal Simsayi nì bi-tɔntɔnjutiibi bin bí Diini nì Afarsataki nì Tarpeel nì Afarasi nì Eereeki nì Babiloon nì Suusi nì Deeya nì Eelaam timmun,

¹⁰ki kpáaǹ anibul ŋin Asinapaar un nyáń diyindee nìn cáań ki kāaǹ Samaarii tiŋkinee, nì ntimu mun kíǹ ki bí Eefiraati mɔɔl ŋwìiń jeetilaŋki púee di ŋmàn̄ kugbɔŋu nee.»

¹¹Tibɔti tin bi nìn ŋmàn̄ kugbɔŋu gbanti poonee sèé: «Ubɔti Daariyusi, an sá timbi a-tɔntɔnliibi bin kóò ntimu mun bí Eefiraati mɔɔl ŋwìiń jeetilaŋki púee di ŋmàn̄-si kugbɔŋu nee.

¹²«Ti-baa ubɔti, ti là á béé yii Juuda yab bin nyánní a-cee ki fātìi bāań timbi cee Jeerusaleem dooyee kíĺ ki fātìi bíi māā kitiŋ kin kaa ŋān̄ ní ki-nib sá pɔɔgaatibee. Bi ŋáŋkì digundi din māntìi tú-kèe nyeel ki bíi māā ki tɔ̄kɔntí.

¹³Míǹ puee ti-baa ubɔti, ti là á béé yii bi yaa fātìi máń kitiŋ nee ki yōoǹ ki-gundee, baa làá gíti pà lampoobi nì patantib nì animbil ŋin bisaŋkinliibi pèe, an di làá dāá cáań sii ubɔti agìń.

¹⁴An puee timbi bin ká diyimɔɔl a-cee ki sá a-tɔntɔnliibee kaa ŋūǹ kí nīn kā ki kpèé bí nīn kpèé sii ubɔti fám míǹ. An pu ní ti bíi tùkù-si tibɔti nee

¹⁵á yàntī bí nyàab̀ bibɔtikpikib gbɔnti poon. Sii a-ba làá ká yii kitiŋ gbanti nib pée sá pɔɔgaatib ní, ki kɔ̄ntí bibɔtiibi nì ntimu yidambi agìń. Laakin kamaa ní bi yaa bée, bi pée cāabìń agìń ŋma ní. An pu gba ní bi dāa nāaǹ kitiŋ gbanti.

¹⁶Míǹ pu ní ti là sii ti-baa ubɔti ń béé yii bi yaa fātìi máń kitiŋ nee nì ki-gundee, sii di kaa ti làá nīn yì Eefiraati mɔɔl ŋwìiń jeetilaŋki timmu gbanti.»

¹⁷Ubɔti nìn ŋmàn̄ kugbɔŋu ki kíí-bi yii: «Gɔmina Reewum nì ugbaŋŋmal Simsayi nì bi-tɔntɔnjutiibi bin bí Samaarii nì ntimu mun kíǹ ki bí Eefiraati mɔɔl ŋwìiń jeetilaŋki púee, «m jáam̀-ni.

¹⁸«M fōō kugbɔŋu kun ni ŋmàn̄ní-mee, bi kàan̄-ku m-nimbiin ní ki nāatì.

¹⁹M yāntì bi nyàab̄ tibɔkpikil gbɔnti poon ní ki lafun ká yii doooo cannaakuee, Jeerusaleem yab nìn pée jáà nì bibɔtiibi ní, kaa nìn kíikí bi-ba pu, ní ki nìn gáatí binib.

²⁰Njaminee, Jeerusaleem tiŋki nìn cáá bibɔtikpaambi bin nìn cáá mpɔnee. Bíǹ di nìn kpèé Eefiraati mɔɔl ŋwìiń jeetilaŋki pú timmu kɔkɔ, ní ki nìn fòol̄ ntimu gbanti nib lampoobi nì patantib nì animbil ŋin bisaŋkinliibi nìn pèe.

²¹An puee ní yóoń mara yii binib gbanti ń gbèen̄ bi-tuuŋŋi, kí tùkù-bi yii bí taa fàtīí mā tiba kí nīn cí ŋyunti ŋun ní man làá dāá pɔ̄ kinyɔkɔee.

²²Ní kpèèmaan tiŋan kí taa ŋá bugbambu tibɔti nee poon, án nín làá ŋá pu án taa láa kpántí tibɔkpaandi kí dāá cáań bibɔtiibi agìńee.»

²³Ŋyunti ŋun ní bi fōō ubɔti Aritaseerseesi gbɔŋkuee ki kàan̄-ku Reewum nì ugbaŋŋmal Simsayi nì bi-tɔntɔnjutiibi bin kíǹee nimbiinee, dicilpu niin ní bi nín cá Jeerusaleem, ki tin dàkā Juuda yab mpɔn bí gbèen̄ atuun.

²⁴Niin ní bi gbēeǹ Unimbɔti diiku mātam tuuŋŋi Jeerusaleem tiŋkin, ki tin cáa sāā Peeriisi yab bɔtiu Daariyusi nín kāl̀ dibeelee binliliitiil poon.