Read Ntcham Esdras 5 Bible Online

Esdras 5 - Ntcham bible

Esdras 5

¹Ŋyunti gbantee ní Unimbɔti bɔnaatiliibi Agaayi nì Idoo jipɔɔn Sakari sòon̄ nì Juuda yab bin bí Jeerusaleemee nì bin bí Juuda tiŋki kɔkɔnee, Isirayeel Nimbɔtiu un nìn bí bi-nee yindi pu[11].

²Niinee Sooroobabeel jipɔɔn Saltiyeel nì Joosuwa jipɔɔn Yoosadaaki yíkì ki kíĺ ki bíi māā Unimbɔti diiku Jeerusaleem. Unimbɔti bɔnaatiliibi nìn kútì bi-pu ki tútúǹ-bi.

³Ŋyunti gbantee ní Tateenaayi un nìn sá gɔmina Eefiraati mɔɔl ŋwìiń jeetilaŋki timmunee nì Seetaar-Boosinayi nì bi-tɔntɔnjutiibi dɔ́miń bi-cee ki bālifì-bi yii: «Ŋma di pú-ni kinyɔkɔ yii ní fàtīí mā kunimbɔtidii nee nì ku-guŋŋi ní?

⁴Ní tīī-ti binib bin bíi māā kunimbɔtidii neeyee yiŋŋi.»

⁵Ama Unimbɔti nìn wúń Juuda yab kpilib pu. Baa nìn ŋúń ki pīiǹ-bi nsan bí taa ti mā, kí nīn cí tibɔti gbanti ń bà ubɔti Daariyusi, ní úǹ ń kíiń ní bí nín béé bi nín làá ŋá puee.

⁶Gɔmina Tateenaayi nì Seetaar-Boosinayi nì u-tɔntɔnjutiibi nì bikàliŋkpilib bin sá Eefiraati ŋwìiń jeetilaŋki pú timmu kpilibee nìn ŋmàn̄ kugbɔŋu ki tīī ubɔti Daariyusi.

⁷Bi nìn ŋmàn̄ yii: «Ubɔti Daariyusi, Unimbɔti ń yàntī á nīn bí ŋgbansɔŋfin.

⁸«Ti là ti-baa ubɔti ń béé yii ti cūtì Juuda tiŋkin áli ki bàn̄ Unimbɔtikpaan diiku laŋki. Bi fātìi kíĺ ki bíi māā kunimbɔtidii. Ataŋkpakpaan ní bi kpítì ní ki cáá idɔjaa ki kútí ki māā agun. Bi baasii bíi tūǹ ditundi mmɔntiimin, ní an bíi cá malaa malaa mun.

⁹Ní ti bālifì bi-kpilib yii: <Ŋma di pú-ni kinyɔkɔ yii ní fàtīí mā kunimbɔtidii nee nì ku-guŋŋi ní?>

¹⁰Boonee ní ti fōō bi-yiŋŋi ki ŋmàn̄ kí dūú tīiń-si á béé bikpilib bin di bíi kpòotī atuunee.

¹¹Kpèè binib gbanti nín kíí-ti tibɔti tiŋyee sèé: «<Timbi sá Unimbɔti un náań yilpu nì taapuee tɔntɔnliibi ní ki fātìi bíi māā kunimbɔtidii kun Isirayeel bɔtikpaaŋwu ubɔ nìn máń ki dóò dooooyee.

¹²Ama ti-naanjab nìn kɔ́ǹ Unimbɔti un náań yilpuee diŋuul ní u dū-bi ki líiǹ Babiloon tiŋki bɔtiu Neebukadineesaar, ní úǹ dɔ́miń ki gbáń ki wīī kunimbɔtidii ní ki cúú-bi ki cūnnì kuyuŋu Babiloon tiŋkin[12].

¹³Nì míǹ kɔkɔee, Siirusi nín kāl̀ dibeel Babiloon tiŋkinee, u-bimpeepeekaal poon ní u pú-ti kinyɔkɔ yii tí fàtīí mā kunimbɔtidii.

¹⁴Ubɔti Neebukadineesaar nìn yōoǹ sindaariya nì animbil kúti sambiliŋ ŋin nìn yú kunimbɔtidiin Jeerusaleemee ki cáa cūnnì ki yóoǹ Babiloon yab waadiikun. Ama ní ubɔti Siirusi nìn yōoǹ tiwan gbanti Babiloon yab waadiikun ki dūu tīī Seesbasaar un u nìn kāaǹ ú nīn sá gɔmina Juuda tiŋkinee.

¹⁵U nìn bí-u yii ú yòon̄ tiwan gbanti kí cáá cùnnì kunimbɔtidiin Jeerusaleem. Bí fàtīí mā kunimbɔtidii ku-paaŋŋu ŋkpiki pu ní kí dū tiwan gbanti kí yóoń poon.>

¹⁶Di sá ní Seesbasaar gbanti dɔ́miń Jeerusaleem doo ki bíl̀ Unimbɔti diiku nyeel. Kí yòon̄ ŋyunti gbanti kí dāá sāā díǹ ti pée bí ku-pu dimal ní an kaa láá dóò.

¹⁷Kɔŋkɔnnee ti-baa ubɔti, a yaa là, a ŋūǹ kí yàntī bí nyàab̀ Babiloon niin, bibɔtiibi gbɔnti poon kí kpèè yii ubɔti Siirusi yaa nìn lafun pú kinyɔkɔ bí fàtīí mā kunimbɔtidii Jeerusaleem. Boonee sii ti-baa ubɔti ń yàntī tí gbìl̄ a nín síiǹ-ti puee.»