Read Ntcham Esdras 6 Bible Online

Esdras 6 - Ntcham bible

Esdras 6

¹Niinee ní ubɔti Daariyusi tīī mara yii bí nyàab̀ Babiloon yab gbɔnti tin bí adiin ŋin poon bi kpáafí bi-gaajawantee poon kí kpèè.

²Ama Eekibataani, kitiŋ kin bi máń digundi ki māntìi tú kì bí Meedi tiŋkpaaŋki poonee ní bi tin ká kugbɔŋu kubɔ. Bi nìn ŋmàn̄ ku-poon yii: «Tibɔti tin bi ŋmàn̄ ki yóoǹ fool boon puee.

³«Ubɔti Siirusi nín nìn kāl̀ dibeel dibimpeepeekaalee, u nìn pú kinyɔkɔ yii bí fàtīí mā kunimbɔtidii Jeerusaleem, án nīn sá laakin bi làá nīn ŋáań saraabee. Bí fàtīí gíiǹ-ku kí mā kí tɔ́kɔń kukpikuu nyeel pu. Ku-fɔkɔŋŋu ń nīn sá meetab mmuŋku nì saalaa, ku-waaŋŋu mun ń nīn sá meetab mmuŋku nì saalaa.

⁴Bí kpítí ataŋkpakpaan kí dūú mā ikuul ita ní kí dū idɔ kí páań ŋkuul ŋubɔ. Dibeel nimbiliŋ poon ní bi làá lēē kí dūú tɔ̄ atuun gbanti kɔkɔ[13].

⁵Kí kūtèe, bí gíiǹ sindaariya wanti nì animbil kúti wanti tin Neebukadineesaar nìn yōoǹ kunimbɔtidiin Jeerusaleem ki cáa cūnnì Babiloonee. Bí cáá-tì kí yóoń kunimbɔtidiin Jeerusaleem, tikɔkɔ ń nīn yú ti-laŋki.»

⁶Míǹ puee, sii Tateenaayi, Eefiraati ŋwìiń jeetilaŋki pú timmu gɔminau nì Seetaar-Boosinayi nì ni-tɔntɔnjutiibi nì bikàliŋkpilib bin bí Eefiraati ŋwìiń jeetilaŋki pú timmunee: «Ní taa ti bɔ̄ ni-nyɔkɔ kunimbɔtidii gbanti mātam bɔti poon.

⁷Yàntīmaan Juuda yab ń tɔ̄ bi-ba kí mā kunimbɔtidii. Juuda yab gɔminau nì bi-kpilib ń fàtīí gíiǹ kunimbɔtidii gbanti kí mā kí tɔ́kɔń ku-nyeel ŋkpiki pu.

⁸M tīī-ni mara ní tūtuǹ Juuda yab kpilib bí fàtīí mā kunimbɔtidii. Ní dū lampoo nimbiliŋ ŋin binib bin bí Eefiraati mɔɔl ŋwìiń jeetilaŋki púee pà ki tìì ubɔtee kí dūú tīī-bi bí nīn cáa pà bitɔntɔnliibi, ditundi ń taa gbèen̄.

⁹Ní tīī-bi tin kɔkɔ pée máaǹee, an dàkà yii anajapɔmbil nì ipijaa nì apibil bí nīn cáa ŋáań bisaraawɔkaabi ki tìì Unimbɔti un náań yilpu nì taapuee, ní kí tīī bilee nì ŋyaam nì ndamam nì ŋkpam kí nóó nì bisaraaŋaliibi bin bí Jeerusaleemee nín síiǹ puee bí nīn cáa ŋáań baabadal saraau an taa lóó ŋwindal.

¹⁰Mimmee bi làá ŋmā kí nīn ŋáań saraabi bin sɔnsɔfiŋu sɔ̀ŋkī Unimbɔti un náań yilpuee pɔbil, ní kí mèè kí tīī ubɔti nì u-jipɔmbi ń nīn bí dimaŋfalin.

¹¹Un kamaa di yaa yīntì mara gbantee, bí lēē u-diiku dɔjaatiŋu kí cóoń kí dū-u kí lúntí ŋu-pu, ní u-cindi ń kpántí ditampundi.

¹²Bibɔtiibi nì atimbun ŋin kɔkɔ yaa yīntì mara un m yóoǹ nee, ki tāntì bi-ŋal kí wīī kunimbɔtidii kun bi bíi māā Jeerusaleem nee, Unimbɔti un bí niin bi yíì u-yindee ń lábití bi-beeŋi kí cìb̄. Man ubɔti Daariyusi di yóoǹ mara nee, bí ŋá m nín lī puee deedee.»

¹³Niinee Tateenaayi, Eefiraati ŋwìiń jeetilaŋki pú timmu gɔminau nì Seetaar-Boosinayi nì bi-tɔntɔnjutiibi ŋá kii ubɔti nín tīiń mara yii bí ŋá puee deedee.

¹⁴Juuda yab kpilib nìn nìkī kunimbɔtidii mātam an cōom̀ tiŋan, kii Unimbɔti bɔnaatiliibi Agaayi nì Idoo jipɔɔn Sakari nín nìn sòon̄ puee. Bi nìn máń kunimbɔtidii ki dóò kii Isirayeel Nimbɔtiu nì Peeriisi yab bɔtiibi Siirusi nì Daariyusi nì Aritaseerseesi nín nìn yóoǹ mara yii bí ŋá puee[14].

¹⁵Ubɔti Daariyusi beel dibinluluutiil, uŋmal un bi yíì Adaaree wiiŋyi ita dal ní bi máń kunimbɔtidii ki dóò.

¹⁶Isirayeel yab nì bisaraaŋaliibi nì Leefii yab nì bin kɔkɔ nìn nyánní kuyuŋuee nìn jíń kunimbɔtidii gbanti jiŋaaliu ki dū-ku ki sú Unimbɔti nì dipɔɔpindi.

¹⁷Bi nìn dū inajaa dilaataal nì ipijaa alaataa ali nì apibil alaataa anaa ní ki ŋá saraa kunimbɔtidii jiŋaaliu gbanti poon. Bi nìn dū iŋɔjaa saalaa nì ili ki ŋá ikpiti pɔ̄tam saraau Isirayeel yab kɔkɔ pu ki nóó nì Isirayeel naakɔti saalaa nì tilee nyɔkɔm.

¹⁸Bi nìn kāaǹ bisaraaŋaliibi ki nóó nì bi-tuuŋŋi nín sá puee, ní ki yākatì Leefii yab akiti akiti ki nóó nì bi-tuuŋŋi nín sá puee bí nīn tūǹ Unimbɔti tundi Jeerusaleem, kii an nín ŋmàn̄ pu Mooyiisi marab gbɔŋkunee.

¹⁹Bin nìn nyánní kuyuŋu ki bāańee nìn jíń Dilákatil jiŋaaliu uŋmapeepeekaa poon ŋwiin ŋubɔ kpá saalku dal ní[15].

²⁰Bisaraaŋaliibi nì Leefii yab nín nìn kpáfì dicilpu ki ŋá akoobil ŋin bi ŋáań kí nyā tijɔkɔndinee, bi-kɔkɔ nìn bí circir dee. An pu ní bi nìn lāntì Dilákatil jiŋaaliu pibiliŋ ki tīī bin kɔkɔ nìn nyánní kuyuŋuee, nì bi-nabiyaamu bisaraaŋaliibi nì bíǹ bi-ba mun.

²¹Isirayeel yab bin nìn nyánní kuyuŋuee nì bin kɔkɔ nìn bí kitiŋin niin ní ki dū bin kaa nyí Unimbɔtee jɔkɔntuuŋŋi ki fée nìn kpáfì ki jíń Dilákatil jiŋaaliu. Binib gbantee nìn bí ki nyàab̀ ti-Dindaan Isirayeel yab Nimbɔtiu.

²²Míǹ boonee ní bi jíń jiŋaal un bi ŋmóò kpɔnɔb bin kaa cáá ŋkpɔnɔnyɔkɔee iwiin iluli nì dipɔɔpindi. Di sá yii ti-Dindaan nìn yāntì dipɔɔpindi gbí-bi u nín kpántì Asuur yab bɔtiu pɔbil ki yāntì bi ká diyimɔɔl u-ceeyee pu. An nìn tīī-bi kunyannyaau bi ŋúń ki túń Isirayeel Nimbɔtiu diiku mātam tuuŋŋi.