Read Ntcham Esdras 7 Bible Online

Esdras 7 - Ntcham bible

Esdras 7

¹Míǹ jítì boon, Peeriisi yab bɔtiu Aritaseerseesi beel yuntiŋuee, uninja ubɔ nìn bí bi yíì-u Eesiraasi. U-baa di nìn sá Seeraya ní u-naanjab nìn sá Asariya nì Ilikiya nì

²Saaluum nì Sadooki nì Ayiituub nì

³Amariya nì Asariya nì Meerayooti nì

⁴Seeraya nì Usii nì Bukii nì

⁵Abiisuwa nì Piinaasi nì usaraaŋakpil Aarɔn jipɔɔn Eeleeyasaar.

⁶Eesiraasi gbanti nìn nyánní Babiloon ní. U nìn sá unil un nyí Mooyiisi marab bin ti-Dindaan Unimbɔti nìn tīī u-nibul Isirayeel yabee tiŋan. Ti-Dindaan Unimbɔti nìn yú u-boon, an puee tin u yaa nìn bālifì ubɔtee, u nìn tìì-u ní.

⁷Ubɔti Aritaseerseesi beel dibinluluútiil poon ní Isirayeel yab kansikin bisaraaŋaliibi nì Leefii yab nì biwambɔɔliibi nì bipunyɔɔciitiliibi nì bin bí kunimbɔtidiin ki tútúǹ atuunee biba nìn yíkì ki nín gítí Jeerusaleem.

⁸Bi nì Eesiraasi di nìn nóó ki dɔ́miń Jeerusaleem ubɔti beel dibinluluútiil uŋmaŋmooŋmooti poon.

⁹U nìn bɔ́ntì ki yíkìń Babiloon uŋmapeepeekaa wimpeekaaŋu dal, ní ki dāa dūu bāań Jeerusaleem uŋmaŋmooŋmooti wimpeekaaŋu dal, kun puee u-Nimbɔtiu nìn yú u-boon.

¹⁰Di sá yii Eesiraasi nìn dū u-pɔbil kɔkɔ ki tīī ti-Dindaan marau bīfitam. U nìn ŋáań marabee nín lī yii bí ŋá puee, ní ki nìn cáá mara gbanti bɔkpaaŋi nì u-koobiliŋ ki dàkà Isirayeel yab.

¹¹Kugbɔŋu kun ubɔti Aritaseerseesi nìn ŋmàn̄ ki tīī Eesiraasi un sá usaraaŋal ki sá un nyí ti-Dindaan marab nì u-koobiliŋ tiŋan pu ki cáa dàkà Isirayeel yabee sèé:

¹²«Man Aritaseerseesi, bibɔtiibi kɔkɔ bɔtiu di ŋmàn̄ kugbɔŋu nee ki tīī sii usaraaŋal Eesiraasi un nyí Unimbɔti un bí yilpuee marabee.

¹³«M yóoǹ mara yii m-beel jaaŋŋi kɔkɔnee, bisaraaŋaliibi nì Leefii yab nì Isirayeel yab bin kíǹee kɔkɔ kansikin bin yaa là kí cù Jeerusaleemee ń nóó-si kí cù.

¹⁴Man ubɔti nì m-saŋkiliibi bilulee di tú-si á cù Jeerusaleem nì Juuda timmu mun kíǹee poon kí cɔ̄ŋkì kí kpèè yii binib nóó a-Nimbɔtiu marab bin kā a-ŋaanee mana.

¹⁵Sii ní man nì m-saŋkiliibi tú á cáá animbil nì sindaariya un ti ŋá saraa kí tīī Isirayeel yab Nimbɔtiuee kí cùnnì Jeerusaleem laakin Unimbɔti kɔŋkooŋŋu bée.

¹⁶Á kpáaǹ animbil nì sindaariya nì tin kɔkɔ Babiloon timmu kɔkɔ yab tɔ́ ki tīī-see, nì Unimbɔti nibul nì bisaraaŋaliibi nín ŋá nlammɔntiim saraabi bin kí tūtuǹ bi-Nimbɔtiu diiku kun bí Jeerusaleemee tuuŋŋee.

¹⁷Á tin dū animbil ŋin bi tɔ́ ki tīī-see kí dā inajaa nì ipijaa nì apibil nì tin kɔkɔ bi cáa ŋáań saraayee nì ndaam min bi làá fée, kí dūú ŋá saraabi ni-Nimbɔtiu diiku saraafaŋŋu pu Jeerusaleem.

¹⁸Sii nì a-nabiyaamu ń kpèè kí dū animbil nì Sindaariya un kíǹee kí ŋá min ŋān̄ ni-ceeyee kí nóó ni-Nimbɔtiu nín là puee.

¹⁹Tiwan tin bi tīī-si bí nīn cáa tūǹ kunimbɔtidii poon tuuŋŋee, á cáá-tì kí yóoń Jeerusaleem Nimbɔtiu nimbiin.

²⁰Á dāá lēē lampoo nimbiliŋ ŋin ntimu pà ki tìì ubɔtee kí pà atuun ŋin kíǹ ki sá á púntí kí tɔ̄ a-Nimbɔtiu Diikunee.

²¹«Man ubɔti Aritaseerseesi, m yóoǹ mara ntimu mun bí Eefiraati ŋwìiń jeetilaŋki púee nimbiŋubiliibi yii usaraaŋal Eesiraasi un dàkà Unimbɔti un bí yilpuee marabee yaa bālifì tiŋyee, bí ŋá míǹ kí tīī-u deedee.

²²Bí tīī-u animbil kúti kii kiiloobi kutukub bita nì bilee kiiloobi kutukub mmuŋku nì saalaa nì ndamam liitirib kutukub binaa, nì ŋkpam liitirib kutukub binaa nì ŋyaam u yaa là puee.

²³Tin kɔkɔ Unimbɔti un náań yilpuee bālifèe, ŋámaan míǹ deedee, án nín làá ŋá pu ú taa fōō diŋuul m-beel nì m-jipɔmbi puee.

²⁴Ti gíti là ní béé yii mara kaa pú yii bisaraaŋaliibi nì Leefii yab nì bilaŋgaaliibi nì bipunyɔɔciitiliibi nì bitɔntɔnliibi nì bin tūǹ kunimbɔtidii poon atuunee ń pà lampoo nì patantib nì animbil ŋin bisaŋkinliibi pèe.

²⁵«An yaa kíǹ sii Eesiraasee, á dū iciin in Unimbɔti marau un kā a-ŋaanee dàkèe kí kàan̄ bibɔsoonliibi bí dū ibaamɔn kí sòoǹ ntimu mun bí Eefiraati ŋwìiń jeetilaŋki púee nib bin kɔkɔ nyí a-Nimbɔtiu marabee bɔti, ní kí dàkà bin kaa nyí marabee bí béé-bi.

²⁶Un sá kamaa kaa tɔ́ a-Nimbɔtiu marau kaa tɔ́ ubɔti marauee, bí dáaĺ udaan tafal. An yaa sá bí kpɔ̀-uee, bí kpɔ̀-u. An yaa sá bí jà-u kí nyāntí kitiŋ puee, bí jà-u. An yaa sá bí gíí-u dipɔndee, bí gíí-u, an yaa tí sá bí pìin̄-u sarkee, bí pìin̄-u.»

²⁷«Ti jáam̀ ti-Dindaan ti-naanjab Nimbɔtiu un gbēē ubɔti pɔbil ki yāntì u tīī ti-Dindaan Diiku kun bí Jeerusaleemee tinyoolee.

²⁸Ubɔti nì u-saŋkinliibi nì u-kàliŋkpilib nimbiin ní ti-Dindaan dàkā-mi u-ŋanti yii u bí m-cee. Di sá yii ti-Dindaan m-Nimbɔtiu ŋal nìn pá m-pu ní m ŋúń ki kpáfì Isirayeel yab kpilib biba ní man nì bi yíkìń Babiloon.»