Read Ntcham Esdras 8 Bible Online

Esdras 8 - Ntcham bible

Esdras 8

¹Ubɔti Aritaseerseesi beel yuntiŋu bin nìn nóoń-mi ti yíkìń Babiloonee dicaŋŋi kpilib nì bi nín pēē pēē mmaal puee sèé.

²Geersɔm sá Fineeyaasi maaliŋun yab kpiliu ní Daniyeel sá Itamaar maaliŋun yab kpiliu, ní Atuusi sá Daafiidi maaliŋun yab kpiliu,

³ní Seekaniya jipɔmbi kansikin ubɔ, ní Seekariya sá Pareeyoosi maaliŋun yab kpiliu. U-nib nìn nyáń bininjab dilaataal nì imuŋku ili nì saalaa,

⁴ní Seeraya jipɔɔn Eeliyooweenayi sá Pati-Moowaab maaliŋun kpiliu. U-nib nìn nyáń bininjab alaataa ali,

⁵ní Yasiyeel jipɔɔn Seekaniya sá Saatuu maaliŋun yab kpiliu. U-nib nìn nyáń bininjab alaataa ata,

⁶ní Joonatan jipɔɔn Eebeedi sá Adiini maaliŋun yab kpiliu. U-nib nìn nyáń bininjab imuŋku ili nì saalaa,

⁷ní Ataliya jipɔɔn Yeesaya sá Eelaam maaliŋun yab kpiliu. U-nib nìn nyáń bininjab imuŋku ita nì saalaa,

⁸ní Miikayeel jipɔɔn Seebadiya sá Seefatiya maaliŋun yab kpiliu. U-nib nìn nyáń bininjab imuŋku inaa,

⁹ní Yeeyiyeel jipɔɔn Oobadiya sá Joowaab maaliŋun yab kpiliu. U-nib nìn nyáń bininjab alaataa ali nì binib bili kpá mmuŋku,

¹⁰ní Yoosfiya jipɔɔn Seeloomiiti sá Banii maaliŋun yab kpiliu. U-nib nìn nyáń bininjab dilaataal nì imuŋku ita,

¹¹ní Beebaayi jipɔɔn Seekariya sá Beebaayi maaliŋun yab kpiliu. U-nib nìn nyáń bininjab mmuŋku nì binii.

¹²Akatan jipɔɔn Yoowanan sá Asigaadi maaliŋun yab kpiliu. U-nib nìn nyáń bininjab dilaataal nì saalaa.

¹³Eeliifeeleeti nì Yeeyiyeel nì Seemaya sá Adooniikam maaliŋun yab ŋwaamu. Bi-nib nìn nyáń bininjab imuŋku ita,

¹⁴ní Utayii nì Sakuur sá Biigifayi maaliŋun yab kpilib. Bi-nib nìn nyáń bininjab imuŋku ita nì saalaa.

¹⁵Niinee ní m yíiń binib gbanti ki kpáfì mbun ŋun pùub̀ ki cá Aafa watil púee. Ti nìn kāl̀ niin iwiin ita. M nìn dáań ki ká yii bisaraaŋaliibi dikitil gbanti poon, Leefii yab báà ubɔ nìn kpá.

¹⁶Niinee ní m yíiń adican kpilib Eeliyeeseer nì Ariyeel nì Seemaya nì Eelnatan nì Yariib nì Eelnatan nì Naatan nì Seekariya nì Meesulam nì Yooyariib nì Eelnatan bimaradakaliibi bilee.

¹⁷M nìn tú-bi Kasfiya timbiliiki bɔtiu Idoo cee, ní ki tùkū-bi bi nín làá tin sòoǹ tin Idoo nì u-nabiyaamu bin bí Kasfiya tiŋkin ki sá kunimbɔtidii poon tɔntɔnliibee pu bí tīiń-ti bitɔntɔnliibi bí nīn bí ti-Nimbɔtiu diiku poon ki tūǹ atuunee.

¹⁸Kii ti-Nimbɔtiu ŋal nín nìn wúń ti-pu puee, bi nìn cáań-ti uninja ubɔ bi yíì-u Seereebiya. U nìn cáá dinyil ní ki nìn sá Malii maaliŋun, Jaakɔb jipɔɔn Leefii naakookun, u nì u-nabiyaamu nì u-jipɔmbi saalku nì bita.

¹⁹Bi nìn gíti cáań Meerarii maaliŋun yab Asabiya nì u-nabiki Yeesaya nì bi-jipɔmbi. Bi nìn kpáfì binib mmuŋku.

²⁰Bitɔntɔnliibi bin Daafiidi nì u-kàliŋkpilib nìn lēē bí nīn tútúǹ Leefii yab atuun kunimbɔtidiinee kansikinee, bi nìn cáań binib alaataa ali nì mmuŋku. Bi nìn yíiń bi-kɔkɔ yiŋŋi ní ki lēē-bi.

²¹Aafa buŋŋu caŋin niin ní m lēē yii tí bóob́ kinyɔkɔ kí sìntī ti-ba taapu ti-Nimbɔtiu nimbiin kí mèè-u ú pɔ̄-ti diyimɔɔl tí còom̀ disaŋkimmɔntiil ti nì ti-biyaamu nì tin kɔkɔ ti cááyee.

²²An nìn cáá-mi icoo ḿ bàlifì ubɔti yii ú tīī-ti bijanjaliibi nì bitanjakaliibi bí céeǹ-ti ti-nannanliibi ń taa tin páb́-ti nsanni. Di sá yii ti nìn tùkū-u yii: «Ti-Nimbɔtiu ŋal wúń bin kɔkɔ yú nì u deedeeyee pu, ama ní u fòol̄ diŋuul tikpil bin dū-u ki fée pu.»

²³An pu ní ti bóob́ kinyɔkɔ ki mēē ti-Nimbɔtiu ú yūĺ ti-boon, ní u fōō ti-wimmeem.

²⁴Míǹ boonee ní m lēē bisaraaŋaliibi saalaa nì bili, ní ki dū Seereebiya nì Asabiya nì bi-nabiyaamu saalaa mun ki kútì bi-pu.

²⁵M nìn ŋmāntì animbil kúti nì sindaariya nì tigaajawan tin ubɔti nì u-saŋkiliibi nì u-kàliŋkpilib nì Isirayeel yab bin kɔkɔ bí Babiloon niinee nìn tɔ́ bí cáań kí tɔ̄ Unimbɔti diiku tuuŋŋee ki tīī-bi.

²⁶M nìn ŋmāntì animbil kúti tɔɔnib mmuŋku, animbil kúti wanti tɔɔnib bita, nì sindaariya tɔɔnib bita,

²⁷nì sindaariya sampati mmuŋku, ti-nyampooku sá sindaariya jitɔmbi kutuku, nì tasa sampeemu mun jìl̀ ki ŋān̄ ki pɔ̄ɔ̄ kudaau kii sindaariyee muli ki tīī-bi.

²⁸M nìn bí-bi yii: «Ni sá binib bin dū bi-ba ki sú ti-Dindaanee ní. Tiwan nee mun sá tin bi dūu súee ní. Animbil nì sindaariya nee sá nlammɔntiim saraau ní bi ŋá ki tīī ni-baabi Nimbɔtiu.

²⁹Ní kpèè tiwan gbanti mmɔntiim, kí ŋúb́-tì tiŋan kí cáá-tì kí bànnì Jeerusaleem bisaraaŋaliibi nì Leefii yab nì Isirayeel dicaŋŋi kpilib nimbiin kunimbɔtidii dibiyaamun.»

³⁰Niinee ní bisaraaŋaliibi nì Leefii yabee yōoǹ sindaariya nì animbil kúti nì tigaajawan tin bi ŋmāntì ki tīī-bee ki cáa cūnnì Jeerusaleem ki yóoǹ ti-Nimbɔtiu diikun.

³¹Ti nìn yíkì uŋmapeepeekaa poon iwiin saalaa nì ili dal Aafa buŋŋu caŋin ki nín cá Jeerusaleem. Ti-Nimbɔtiu nìn bīiǹ ti-saŋkindi gbanti pu, binannanliibi kaa táká-taaa, biyipɔɔdambi mun kaa kíntì-ti nsanni ki fúkúl̀-ti.

³²Ti nìn bàn̄ Jeerusaleemee ní ki dū iwiin ita ki kāl̀ ki ŋūŋfì.

³³Ŋwinnanaatee ní ti ŋmāntì animbil kúti nì sindaariya nì tigaajawanee ti-Nimbɔtiu diikun ki dūu tīī usaraaŋal Uriya jipɔɔn Meereemooti. U nì Piinaasi jipɔɔn Eeleeyasaar nì Leefii yab Joosuwa jipɔɔn Yoosabaadi nì Binuyii jipɔɔn Noowadiya di nìn bí.

³⁴Bi nìn kàan̄ tiwan gbanti kɔkɔ ní ki ŋmāntì-tì ní ki ŋmàn̄ ti-nyiŋfiŋu nín nyáń puee ki ŋá kugbɔŋun niin niin.

³⁵Bin nìn nyánní kuyuŋu ki fātìi gítìńee nìn ŋá bisaraawɔkaabi samaa kɔkɔ yil pu ki tīī Isirayeel yab Nimbɔtiu. Bi nìn dū inajaa saalaa nì ili nì ipijaa inaa kpá dilaataal nì apibil ata kpá imuŋku inaa ní ki ŋá saraawɔkaa gbanti, ní ki dū iŋɔjaa saalaa nì ili ki ŋá ikpiti pɔ̄tam saraau. Bi nìn dū tiwaŋkuti gbanti kɔkɔ ki wùn̄ ŋŋmi ki tīī ti-Dindaan.

³⁶Míǹ boonee ní bi dū kugbɔŋu kun ubɔtikpaan ŋmàn̄née ki tīī ubɔti kàliŋkpilib nì gɔminab bin bí Eefiraati mɔɔl ŋwìiń jeetilaŋki pú timmunee, ní bi-kɔkɔ tútúǹ Isirayeel yab bi máń Unimbɔti diiku.