Read Ntcham Néhémie 1 Bible Online

Néhémie 1 - Ntcham bible

Néhémie 1

¹Tibɔti tin Akaliya jipɔɔn Neeyeemiya máafèe. Ubɔti Aritaseerseesi nín kāl̀ dibeel abin mmuŋku, Kiisileewu ŋmaliu poonee, m nìn bí Suusi ditiŋyil,

²ní Ananii m-nabiyaamu kansikin ubɔ, u nì Juuda yab dikitil diba dɔ́miń m-cee. M nìn bālifì-bi Juuda yab bin nyáń kuyuŋu ki kùn̄ee nì Jeerusaleem pu.

³Ní bi kíí-mi yii: «Bin ŋmátì kaa kpíì kuyuŋun ní ki kóò Juuda timmunee bí falaakpaan nì icoo poon ní. Jeerusaleem gundi bátì bátì ki lítì, abun dōoǹ dōoǹ ní punuubi wùn̄ ŋŋmi.»

⁴M nín nìn gbìl̄ an bɔtee, m nìn kāl̀ ní ki bíi sūǹ. M nìn kāl̀ kunimbaaun iwiin kupaau, ki bóob́ kinyɔkɔ, ki gbāaǹ yilpu Nimbɔtiu nimbiin ki mēē.

⁵M nìn mēē yii: «Too, m-Dindaan yilpu Nimbɔtiu, Unimbɔti un sá ukpaan ki sá kuwambiiuee, sii di kaa súntí jaanjaan a nín pōoǹ bin néeń-si ki ŋúb́ a-marabee pu ní ki ŋáań-bi tiŋan.

⁶Kpòon̄ a-tafal kí pīlifì, kí ŋúbití a-nimbiliŋ kí wāl̀ man a-tɔntɔnliu nín bí ki mèé-si iyunti nee poon ŋwiimpu nì kunyeeu a-tɔntɔnliibi Isirayeel yab pu puee. M bí ki bìitī ikpiti in ní timbi Isirayeel yab ŋá-see. Ti yīntiǹ-si, tiŋman man nì m-naanjab yīntiǹ-si.

⁷Tiŋman ti baasii yīntiǹ-si ní, kun puee taa ŋúb́ marab nì abɔkpaa nì akoobil ŋin a nìn tīī a-tɔntɔnliu Mooyiisi u dūu tīī-tee.

⁸Téetí anyɔɔbun ŋin a nìn dī a-tɔntɔnliu Mooyiisi pu ki sòon̄ee. A nìn bí yii: <Ni yaa kaa yúliǹ-mi deedee, m làá dāá jà-ni ní yàl̄ kí kɔ́ atimbun aban[1].

⁹Ama ni yaa láa fātìi gítìń m-cee, ki ŋúb́ m-marab, ki ŋáań bi nín bí ní ŋá puee, báà ni yaa láa bíń kitiŋ gbeennyɔkɔ, m làá dāá kóoǹní-ni kí kpāfì kí yàntī ní dāan̄ laakin m làá lēē bí nīn jáaḿ-mee.>

¹⁰Ti-Dindaan, bi sá a-tɔntɔnliibi ní ki sá a-nibul din a dū a-pɔŋkpaaŋŋu nì a-kpabil ki dée.

¹¹M-Dindaan, m gbàam̄-si, kpòon̄ a-tafal kí pīlifì man a-tɔntɔnliu nì a-tɔntɔnliibi bin an mɔ̄ǹ bí nīn fàŋkí-see wimmeem. Yàntī án kàlīǹ man a-tɔntɔnliu tiŋan díǹ ubɔti ń fōō-mi nì tiniti.» Ŋyunti gbantee, m nìn sá un tìì ubɔti ndaamee ní.